له خېبر پښتونخوا سره د فاټا د گډولو بِل به اوس د زیارت- پنجشنبې په ورځ پارلمان ته وړاندې کېږي.
د پاکستان د مرکزي حکومت د کابینې یو غړي ویلي دي، له خېبر پښتونخوا سره د قبایلي سیمو د گډولو لپاره به اوس مجوزه بِل د زیارت یا پنجشنبې په ورځ قامي اسمبلۍ ته وړاندې کېږي.
ددې نه وړاندې امکان څرگند کړی شوی وو چې د دېرشم ائیني بدلون په نوم د فاټا اصلاحاتو بِل به د شورو یا پنجشنبې په ورځ قامي اسمبلۍ ته وړاندې کوي.
د کابینې دغه غړی چې د فاټا اصلاحاتو لپاره د وړاندیزونو راټولولو په کار کښې یې هم اهم رول لوبولی دی وي.او.اې ډیوه ته د نوم نه ښودلو په شرط ویلي:
"حکومت هڅه کوي چې د فاټا اصلاحاتو بِل د منظورولو لپاره په قامي اسمبلۍ کښې د غړو مطلوبه شمېر موجودگي یقیني کړي، ځکه به دا بل اوس د زیارت په ورځ پارلمان ته وړاندې کېږي".
د باجوړ نه د قامي اسمبلۍ غړی شهاب الدین خان وايي، چې د نهې- سه شنبې په ورځ د کابینې په غونډه کښې دوه نورې اهمې پرمختیاوې هم شوي دي او د دې له وجې به اوس بل د شورو په ځای د زیارت په ورځ وړاندې کېږي.
شهاب الدین وايي چې په دغو دوو نوو پرمختیاوو کښې یوه دا چې په مجوزه بِل کښې د فاټا نه د صدر اختیار په مکمله توگه ختم کړل شوی دی. تر دې په وړاندې مسوده کښې ددغې خبرې ذکر ښکاره نه وو شوی.
د شهاب الدین له قوله بله اهمه پرمختیا دا شوې ده چې د بلوچستان او خېبر پښتونخوا نه د هغه ټولو نیمو قبائلي سیمو حېثیت ختم کړل شوی دی چې د انگرېز په حکومت کښې ورته حاصل شوی وو.
د نهې یا سه شنبې په ورځ د وزیراعظم شاهد خاقان عباسي په مشرۍ کښې د مرکزي کابینې په غونډه کښې فاټا په خېبر پښتونخوا کښې د ورگډولو تر څنگ د دغه نوو ائیني وړاندیزونو باضابطه منظوري ورکړل شوې ده.
