پېښور هايکورټ پاکستاني امنيتي ادارو ته حکم کړی، د پاکستان او افغانستان ترمنځ مالونه وړونکي ګاډي دې بې ځايه نه ځوروي، د کراچۍ نه د تورخم پورې جوړو چيک پوستو دې د ګاډو کتنه کيږي، په غټو لارو د جوړو چيک پوستو نه علاوه دې ټرانسپورټران تنګ نه کړل شي.
افغانستان ته د مال وړونکو ګاډو اتحادیې پېښور هايکورټ ته په دغې اړه خواست کړی وو.
د اتحادیې وکیل امين رحمان يوسفزی وايي، افغان ټرانزټ ټرېډ کې چلېدونکو ګاډو والو لومړی په کال2019م د پاکستان وزيراعظم ته خواست کړی وو، چې دوی ته د کراچۍ نه تر تورخم پورې په غټه لاره ډېر زيات چيک پوستې جوړې دي، د اې اېن اېف نشه یې توکیو د مخنيوې ادارې، ملېشې، ځنګلاتو او پوليسو ځان ځانله چیک پوستې جوړې وې، تول يا کانټو والو به ځانله ګاډي ودرول.
د نوموړي په خبره، د هلته نه بيا حکم شوی چې ټولې ادارې دې په ګډ يو ځای دغه ګاډي ګوري، خو په هغې عمل ونه شو، بيا ټرانسپورټرانو د پېښور هايکورټ د بشري حقونو څانګې ته خواست وکړو، او یادې څانګې د ټولو ادارو نه معلومات وکړه او بيا پېښور هايکورټ ته په خواست کې ټولو ادارو ته نوټسې ورکړل شوې.
يوسفزي وويل، پېښور هايکورټ اوس د ټرانسپورټرانو په شکايتونو فيصله واوروله، او د هغوی د 70 فيصدو نه زيات شکايتونو یې حل کړه، د غېر قانونه چيک پوستو ختمولو، قانوني کتنې او بډو رشوتونو نه اخستو حکم یې وکړو.
نوموړي وويل، د پېښور هايکورټ چيف جسټس شکيل احمد او جسټس ثاقب الله په خواست اورېدنه کړې او فيصله یې اورولې ده.
د مال وړونکو ګاډو د اتحادیې مشر محمد نور احمدزی وايي، دوی د پېښور هايکورټ په فيصله خوشاله دي چې د ګاډو نه تنګولو دپاره یې حکم وکړو، خو نوموړی وايي بايد اوس په دغه فيصله عمل هم وشي.
خو د افغانستان او پاکستان ترمنځ تجارت کوونکي وايي، د افغانستان او پاکستان ترمنځ تجارت کې سوداګرو او ګاډو ته ستونزې شته، خو په ځینې ځايونو کې ټرانسپورټران هم د قانون سرغړونه کوي.
د پاکستان او افغانستان او منځنۍ اسيا د تجارتي کمېټۍ مشر شاهد حسېن وايي، په ځينو ځايونو کې ګاډو د حساب نه سېوا بارونه په ګاډو کې واچوي، او بيا په خپله د دغه سرغړونې په سر پوليسو او نورو ادارو ته پيسې ورکوي.
د پاکستان او افغانستان ترمنځ د مودې راهسې دوه اړخيزه تجارت کې وخت په وخت سوداګر شکايتونه کوي، چې دوی د ويزو نه واخله تر د مالونو وړلو راوړلو، په پوله د ګمرک سره نور مشکلات جوړيږي او اکثره د دواړو هيوادو ترمنځ تجارت د سياستونو ښکار شي.
دوی وايي، بايد تجارت د سیاسي شخړو څخه په ډډه وساتل شي.
د سرحد چېمبر اف کامرس چارواکي وايي، د پاکستان او افغانستان ترمنځ د کال 2011م پورې د دوه اعشاريه شپږ بيلينه امريکايي ډالرو دوه اړخيزه تجارت خو د هغې وروسته دا تجارت راکم شوی او د 700 ميلينه ډالرو پورې راټيټ شوی دی.
دوی وايي، څنګه چې د سيمټو، اوسپني، اوړو او ځينې نورو توکيو د پاکستان مارکيټ افغانستان کې نورو ملکونو ونيولو، ښيې د تازه سبزو د تخم مارکيټ کې ايران او د مينځنۍ اسيا ملکونو ته لاړ شي.
Forum