د بلوچستان په دالبندین سیمه کې په ډزو د وژل شوو پنځو تنو جسدونه د بجلۍ ستنو پسې ځوړند موندل شوي.پولیس وایي د وژل شوؤ کسانو شناخت لا ھم نه دی شوی او نه یې د وژنې کوم لامل معلوم شوی۔
د دالبندین د پولیس په وینا دغه مړي د چاغي ضلعې دالبندين د هلکانو کالج ته څېرمه په يوه ګڼ مېشته سيمه کې موندل شوي دي.
د بلوچستان صوبې چاغي ضلع د ایران سره په پوله پرته ده.
د دالبندین پولیس تاڼې د یوہ چارواکي خلیل الرحمان په وینا ځايي خلکو د جمعې په سهار وختي دغه مړي موندلي وو، او بیا یې لیویز او پولیسو ته خبر ورکړی:
"پولیس چې ھلته ورغلي د یادو کسانو جسدونه د بجلۍ په ستنو پسې را ځوړند لیدلي. دغه مړي یې هسپتال ته وړي اؤ ھلته د دوی پوسټ مارټم روان دی".
د پولیسو په وینا، یاد کسان پر سینه او د بدن پر نورو برخو په ګولیو ویشتل شوي دي خو دا معلومه نه دہ چې دا خلک چیرته وژل شوي، او یادې سیمې ته ولې راوړل شوي،د پېښې ذمه واري چا نه دہ منلې۔
د دالبندین د ځایي خبریالانو عبدالستار او علي رضا په وینا، دا کسان له جامو او رنګه افغانان معلومېږي، خو دا تایید شوې نه دہ، داسې شک کیږي چې دا پیښه د جیش العدل له وسله والې ډلې سره تړاو لري چې په ایران کې فعاله ده.
هغوي وایي دې ډلې څه مودہ وړاندې د خپل یوہ مشر د وژنې په تړاو د نیول شویو پنځو کسانو اعترافي ویډیو خپره کړې وه، ښایي دا ھم ھغه کسان وي.
د یادو خبریالانو د دې خبرې تصدیق کومو نورو سرچینو نه دی کړی او نه ھم د مذھبي تندروې ډلې جیش العدل په دې باب کوم بیان مخې ته راغلی۔
Forum