جنرال منیر: د کشمیر پر سر مو درې جګړې کړې دي او 10 نورې به هم وکړو

د پاکستان د پوځ سرلښکر جنرال سید عاصم منیر وایي پاکستان د کشمیر پر سر درې جګړې کړې دي اؤ که 10 جګړې نورې ورپه غاړه شي نو هم به یې وکړي.

ډان ورځپاڼه وایي هغه دا څرګندونې په پینځمه فرورۍ د پاکستان تر واک لاندې کشمیر سرښار مظفر اباد ته د سفر په مهال پوځي ځوانانو ،افسرانو سره اؤ مخورو ته په وینا کې کړې دي.

په پاکستان کې پینځمه فروري هر کال کشمیریانو سره د یووالي د ورځې په توګه نمانځل کیږي خو د پاکستان ګاونډي هیواد هند بیا پاکستان د خپل واک لاندې جمو و کشمیر کې په لاسوهنه اؤ د وسله والو ډلو په سرپرستۍ تورنوي.

د آي ایس پي ار بیان کې ویل شوي جنرال عاصم منیر مظفراباد ته د خپل سفر په مهال د وسله والو ځواکونو په جنګي تیاریو د بشپړه ډاډ څرګندونه کړې اؤ ویلي یې دي چې د پاکستان پوځونه د هر تیري په وړاندې غاښ ماتوونکي ځواب ویلو ته چمتو دي.

د آي ایس پي ار د بیان له مخې،د پوځ مشر د وسله والو ځواکونو پر جګړه ییز چمتووالي بشپړ باور څرګند کړ او ټینګار یې وکړ چې د هر ډول تېري ځواب به ورکول کېږي.

هغه ژمنه وکړه چې د پاکستان پوځ به د هېواد حاکمیت او د هغې د ځمکنۍ بشپړتیا دفاع په پوره هوډ سره وکړي.

وروسته، د پوځ مشر د کشمیر له مخورو شخصیتونو او متقاعدو پوځي افسرانو سره ولیدل او د هندي تر ولکې لاندې جمو او کشمیر د خلکو لپاره یې د پاکستان کلک ملاتړ بیا تکرار کړ.

جنرال عاصم منیر وویل چې د هند ظلمونه او زیاتېدونکې “هندوتوا انتهاپسندي” د کشمیري ولس د خپلواکۍ د غوښتنې اراده لا پیاوړې کوي.

هغه ټینګار وکړ چې پاکستان به د دوی د عادلانه او جایزې مبارزې ملاتړ ته دوام ورکوي او د دولتي ظلم او جبر پر ضد به ورسره ولاړ وي.

د آي ایس پي ار د بیان له مخې جنرال منیر وویل"هیڅ شک نشته چې کشمیر به یوه ورځ آزاد شي او د کشمیري ولس د آزادې ارادې او برخلیک له مخې د پاکستان برخه به وګرځي."

د هغه وینا وه چې د کشمیر په اړه هره فېصله به د کشمیر ولس پخپله کوي نه چې د هند پوځ یې وکړي.

ډان وایي پخپله دغه وینا کې د پاکستاني پوځ مشر جنرال عاصم منیر کشمیر یو ځل بیا د پاکستان د "مرۍ د رګ" په نوم یاد کړی دی اؤ ویلي یې دي چې "د مرۍ د رګ له بدنه د غوڅولو مطلب د ژوند خاتمه ده".

د ایټمي وسلو لرونکو دواړو ګاونډیو هیوادونو هند اؤ پاکستان تر منځ اړیکې دلسیزو راهسې تاوجنې دي اؤ په کال 1947 کې دبرتانیې څخه د ازادۍ ترلاسه کولو راپدیخوا دې دواړو هیوادونو خپلو کې دکشمیر د شخړې پسر درې سترې جګړې کړې دي.

هند دکلونو راهسې په پاکستان د هغو اسلام پاله وسله والو ډلو د مرستې تورونه لګوي چې د1980م د لسیزې د وروستیو نه دهند د واک لاندې کشمیر کې دهندي ځواکونو پرضد په جګړه بوخت دي.

پاکستان دهند دا تورونه ردوي اؤ وایي هغه یوازې د خپلواکۍ دحق غوښتونکو کشمیریانو سفارتي اؤ اخلاقي مرسته کوي.

د هند لخوا په کال 2019 کې دخپلې برخې دکشمیر دځانګړي حیثیت ختمولو اقدام دپاکستان اؤ هند اړیکې نورې هم ترینګلې کړې دي.