د ایران ستر مذهبي مشر آیت الله علي خامنایي وویل، د تهران او واشنګټن ترمنځ د خبرو اترو لپاره د امریکې د صدر ډانلډ ټرمپ غوښتنه ردوي ځکه چې وایي د هغه مقصد به دا وي چې د ایران د میزایلو په واټن او په سیمه کې د ایران په اغېز باندې بندیزونه ولګوي.
خامنایي د شنبې- خالي په ورځ د ایراني چارواکو له یوې ډلې سره په خبرو کې د امریکې نوم یاد نه کړ، خو ویې ویل چې یو "سرزوری حکومت" د خبرو اترو لپاره پر خپلو هڅو ټینګ ولاړ دی:
"د دوی خبرې د ستونځو د حل کولو لپاره نه دي، دا د دې لپاره دي ... راځئ خبرې وکړو هغه څه چې موږ یې غواړو په بل فریق باندې یې مسلط کړو چې د مېز په مخالف اړخ باندې ناست دی."
د امریکې صدر ډانلډ ټرمپ د جمعې په ورځ منلې وه چې له ایران سره په اېټمي تړون باندې خبرې اترې کول غواړي او د دې لپاره یې د ایران روحاني مشر آیت الله علي خامنايي ته یو خط لېږلی دی.
ټرمپ خامنايي ته د خط ذکر د امریکې له فاکس بزنس نیوز سره د جمعې په ورځ په نشر شوې مرکه کې کړی وو.
د ټرمپ د خط مقصد له تهران سره د نوي تړون غوښتنه ده او د ایران د ایټمي پروګرام د چټک پرمختګ مخه ونیسي او غواړي هغه ایټمي تړون بدل کړي چې هغه د خپلې لومړۍ دورې په وخت امریکا ترې ایستلې وه.
خامنایي په خپلو تازه خبرو کې وویل، د امریکې غوښتنې به پوځي او په سیمه کې د ایران په اغېز دواړو پورې اړه ولري.
د خامنایي په وینا د ټرمپ د انتظامیې ممکنه خبرې به د خپلو دفاعي وړتیاوو او د هیواد د نړیوالو وړتیاوو په اړه وي:
"[دوی به له ایرانه وغواړي] چې [ځینې] شیان ونه کړي، له ځینو ځانګړو خلکو سره ونه ویني، یو ځانګړي ځای ته لاړ نه شي، ځینې توکي جوړ نه کړي، ستاسو د میزایلو واټن باید تر یوې ټاکلې فاصلې زیات نه وي. ایا دا ممکنه ده چې څوک دا ومني؟".
د خامنایي خبره د ایران په ټولو ریاستي چارو کې حتمي حیثیت لري، هغه وویل دا ډول خبرې اترې به د ایران او لوېدیځ ترمنځ ستونځې حل نه کړي.
که څه هم خامنایي د کوم کس یا هیواد نوم نه دی اخیستی، خو هغه وویل چې د خبرو اترو لپاره له فشار اچولو سره د خلکو په رایه کې پر ایران فشار راځي. هغه وویل، "دا خبرې اترې نه دي. دا امر کول او مسلط کول دي."
ټرمپ د جمعې په ورځ په اوول دفتر کې خبریالانو ته په مخامخ ډول د خط یادونه ونه کړه، خو هغه د ممکنه پوځي اقدام په اړه پټه اشاره وکړه او ویې ویل، "موږ له ایران سره په داسې حالت کې یو چې ډیر زر به یو څه پیښ شي. ډیر زر به پیښ شي."
اسرایل او امریکې دواړو خبرداری ورکړی دوی به هیڅکله ایران ته اجازه ورنه کړي چې ایټمي وسله ترلاسه کړي، چې ترې د پوځي شخړې پیدا کېدو ویره ده، ځکه چې تهران د وسلو کچې ته نیزدې یورېنیمو ته وده ورکوي او دا هغه څه دي چې یواځې د ایټمي وسلو لرونکي هیوادونه یې کوي.
د ایران ستر مشر آیت الله علي خامنایي په فرورۍ میاشت کې هم د خپل هیواد د ایټمي پروګرام په اړه له امریکې سره د خبرو امکان رد کړی وو او ټینګار یې کړی وو چې خبرې به د ایران ستونځې هوارې نه کړي.
خامنایي هغه وخت دا څرګندونې وروسته له هغه کړې وې چې ایراني چارواکو په وروستیو څو میاشتو کې داسې نخښې ښودلې وې چې ګواکې تهران چمتو دی د صدر ډانلډ ټرمپ له ادارې سره خبرې وکړي.
صدر ټرمپ هم له ایران سره د نوي ایټمي تړون غوښتنه کړې ده او ویلي یې دي، دی غواړي چې ایران په سوله ییز ډول پرمختګ وکړي او سوکالۍ ته ورسیږي خو وایي په یو شرط چې ایټمي وسلې ونه لري او ایران بیا بیا ویلي چې د ایټمي پروګرام مقصد یې سوله ییز دی.
یادونه:- د رپوټ اکثر معلومات له اې پي خبري ایجنسۍ اخیستل شوي دي.
Forum