د پاکستان وزیراعظم شهباز شريف په مرکزي او صوبايي حکومتونو ټينګار کړی چې په ملک کې کوم 22.8 ميلينه ماشومان د سکولونو نه بهر دي، هغوی دې داخل کړل شي چې په وروستيو کې پيل کړل شوې تعلیمي اېمرجنسۍ هدف ترلاسه کړل شي.
پښتونخوا اسمبلۍ وفاق او نورو صوبو ته په يو قرارداد کې ويلي، د پخوانۍ فاټا پښتونخوا صوبې سره ضم کېدو په وخت چې کومې وعدې شوې وې هغه نه دي پوره شوي، دغه قرارداد په متفقه توګه منظور کړل شوی، د وفاق او نورو صوبو نه غوښتنه شوې چې د وعدې مطابق دې د ضم شوو ضلعو د پرمختګ د پاره فنډونه جاري کړی شي.
د کوټې سره نزدې د کولې په کان کې لاندې د ګېر شوي خواريکښ مړی نن په پينځمه ورځ را ايستل شوی دی، د خواريکښ تعلق د شانګلې سره دی، امدادي کار کوونکي وايي، مړی به یې هم نن خپلې پلارنې علاقې ته ولېږل شي.
د پاکستان پوځ دعوه کړې، بلوچستان صوبه کې یې عمليات کړي، 27 وسله وال یې وژلي دي. پوځ ويلي د ترهګرو د موجودګۍ په اطلاع د استخباراتو په بنياد دغه عمليات شوي دي.
په بلوچستان کې په دوو جلا جلا مرګونو پېښو کې د کولې له کانونو څخه د 13 خواريکښو مړي را ايستل شوي، د يو خواريکښ مړی تر څلور ورځو تيريدو پس هم لا نه دی را ايستل شوی. صوبه کې د قدرتي افتونو په وخت د انتظام اداره وايي د بند پاتې مړي را ايستلو دپاره عمليات دوام لري.
د جنورۍ پر اوومه د ږوب او قلعه سیف الله ضلعو منځنۍ سيمه ګوال اسماعیلزۍ څخه دوه تنه تښتول شوي وو، د ليويز چارواکو په وينا چې د وسلوالو ترهګرو اغوا کارانو له لوري يو تن په هم هغه مازيګر وژل شوی او یو تښتول شوی تن په 24 ساعتونو کې ژغورل شوی دی.
نور کتل
