افغان طالبانو د امریکا د صدر جو باېډن بیان ته خپل غبرګون کې ويلي چې د افغانستان نه د ځواکونو په ویستلو کې د پاتې راتلو په ترڅ کې امریکا د سختو پاېلو سره مخ کیدی شي.
د امریکا صدر جو باېډن تېره ورځ د ای بي سي نيوز سره مرکه کې ویلي وؤ، د افغانستان څخه دامریکایي ځواکونو وتل د مئ په وړومبۍ نېټې کېدی شي خو ګرانه به وي.
هغه ویلي وؤ که چرې امریکا ته افغانستان څخه دخپلو ځواکونو د ویستلو نېټه غځول وي نو دا به ډېره لېرې نه وي.
څېړونکي د جو باېډن دا بیان په طالبانو د فشار هڅه بلي او وايي امریکا به غواړي چې د طالبانو څخه نور رعایتونه ترلاسه کړي.
د امریکا صدر جو باېډن د ای بي سي نيوز سره مرکه کې ویلي د پخواني صدر ډونالډ ټرمپ د واکمنۍ په مهال شوې لوظنامه ډېره ښه نه وه او دا لوظنامه په کوټلو خبرو نه وه ولاړه.
افغان طالبانو د امرېکايي صدر دغه تازه بیان ته په خپل غبرګون کې خبرداری ورکړی چې د افغانستان نه د ځواکونو په ویستلو کې د پاتې راتلو په ترڅ کې امریکا د سختو پاېلو سره مخامخ کېدی شي.
ای اېف پي خبري اژانس د طالبانو د ویاند ذبيح الله مجاهد د قوله وايي چې امریکا له د دوحې د تړون په اساس خپله قبضه ختمول پکار دي او زياتوي باید چې امریکا د مئ د وړومبۍ نېټې پورې د خپلو ځواکونو د وېسلتو عمل بشپړ کړي.
ذبيح الله مجاهد دا هم ویلي که امریکا د کوم عذر له کبله داسې ونکړی شول نو بيا به هغه د پاېلو په خپله ذمه واره وي.
د امريکا صدر جو باېډن په ضمني توګه له افغانستان نه د امريکايي پوځونو وتلو کې د ځنډ دا خبره داسې وخت کې کړې ده چې نن په روس کې د افغان دولت، طالبانو، امریکا، چین، پاکستان او روسيې داستازو په ګډون ېوه غونډه پېلېږي.
تمه کیږي چې دې غونډه کې به د افغان سولې بهیر د چټکتیا په لارو چارو بحث وشي.
تیرکال دپخواني امریکایي صدر ډانلډ ټرمپ انتظامیې طالبانو سره دوحه کې دسولې تړون کړی ؤ له مخې به یې امریکا ته د راتلونکي مئ میاشتې پورې افغانستان څخه خپل ځواکونه ویستل اؤ طالبانو ته ځان دالقاعده اؤ نورو ترهګرو ډلو څخه جلا کول اؤ بین الافغاني خبرو ته کښیناستل وؤ.
په دې لوظنامه د یو کال نه زياته موده وشوه او تر اوسه بېن الافغاني مذاکراتو کې هېڅ قسمه پرمختګ نه دی لیدل شوی او په افغانستان کې مرګ ژوبله کې هم څه کمی نه دی راغلی.
څېړونکي دصدر بائیډن لخوا افغانستان څخه دځواکونو د ویستلو دنیټې غځولو دا اوسنی اعلان په طالبانو دفشار هڅه بولي او وايي امریکا په داسې کولو د طالبانو څخه نور رعایتونه ترلاسه کول غواړي.
د افغانستان په کشاله ژور نظر لرونکی څېړنکار او خبريال رحيم الله يوسفزۍ وايي د امريکا د صدر لخوا د طالبانو سره شوې لوظنامې ته د بيا کتنې د اعلان وروسته دا امکانات وؤ چې د افغانستان څخه د امریکايي ځواکونه به د مئ د وړومبۍ نېټې پورې ونه اوځي.
وي او ای ډیو سره خبرو کې هغه ویلي امریکا به د طالبانو نه څه نور رعاېتونه وغواړي،ترڅو هغوئ پابند کړي چې د دوحې دتړون په کړو لوظونو عمل وکړي لکه القاعدې او نورو ترهګرو ډلو سره اړیکې ختمې کړي، حملې کمې کړي او چې کومې دامن خبرې کېږي هغې کې سنجيدګي وښایي.
د دفاعي چارو څېړنکار او د پاکستان د پوځ پخوانې افسر برګېډېر رېټاېرډ سعيد نذېر وايي د باېډن بیان طالبانو ته يو پېغام دی.
ډیوه سره خبرو کې هغه ویلي ددې بیان يو مقصد دا هم کېدی شي چې طالبان اور بند ته تېار کړي.
هغه واي طالبانو ته معلومه ده چې هوايي طاقت امریکا سره دی او دا کره ده که جنګ ګرمېږى نو دغه هوايي طاقت طالبانو ته نقصان رسولی شي نو که طالبان ډز بندې ته غاړه کېږدي بیا امکان شته چې امریکا په ټاکل شوې نېټه خپل ځواکونه له افغانستانه وباسي.
څو ورځې وړاندې د امریکا لخوا افغان حکومت او دسولې فريقېنو ته لېږل شوي لیک کې د امریکا خارجه وزیر انتوني بلنکن ښکاره کړې وه چې د ځواکونو د ويستلو نېټه په خپل ځائ موجوده ده.
په دغه دستاویز یا لیک کې د اور بند او شراکتي حکومت خبرې هم شاملې وې.