د افغانستان ولسمشر محمد اشرف غني نن د شورو یا چهارشنبې په ورځ د افغان سولې لپاره د امریکا له ځانګړي استازي زلمي خلیلزاد سره لیدنه کې ویلي، چې افغان حکومت ته د سولې مشورتي لویې جرګې سپارل شوې تګلاره د عملي کیدو په حال کې ده.
د سولې د مشورتي لویې جرګه هغه غوښتنه چې د افغان حکومت له زندانونو څخه یې د طالب بندیانو د ازادولو لپاره کړې وه هغه عملي شوه.
د کابل د څرخي پله، بګرام او د افغانستان د ۱۵ ولایتونو له زندانونو څخه۴۹۰ تنه طالب بندیان ازاد شوي دي.
طالبانو په لومړي ځل د خپلو بندیانو د ازدېدو په تړاو د افغان حکومت له دې اقدام څخه هرکلی کړی دی.
ولسمشر غني له خلیلزاد سره په دې ناسته کې چې د افغانستان یوشمیر سیاسي مشرانو، د مدني ټولنو استازو، علماوو، د ښځو استازو او د ولسي جرګې استازو ګډون درلود ویلي، د سولې په پروسه کې افغان حکومت ته د معلوماتو د رسولو پروسه هم چټکه شوې ده.
د ارګ په بیان کې چې د چهارشنبې په ورځ خپور شوی راغلي له خلیلزسره په دې ناسته کې ولسمشر غني ویلي افغان حکومت د سیمه ییزې اجماع د منځته راتلو په هدف عملي پروګرامونه لري اوپه پلي کیدو سره به یې دا اجماع لا پیاوړې شي.
د بیان ترمخه د افغان سولې لپاره دامریکا متحدو ایالتونو د بهرنیو چارو وزارت ځانګړي استازي زلمی خلیلزاد په دې ناسته کې د سولې په پروسه کې د بشپړې همغږي په منځ ته راتلو ټنګار وکړ اوپه دې کې یې د سیمې د هیوادونو ونډه مهمه وګڼله.
خلیلزاد ویلي، د سیمې له هیوادونو سره بحث شوی اوهغوی ته ډاډ ورکړل شوی چې د افغانستان د سولې په پروسه کې به هغوی ته د ونډې ورکول په پام کې نیول کیږي.
ولسمشر اشرف غني د سولې په پروسه کې له ټولو ګډنوالوڅخه دهغوی د فعالې ونډې له اخیستلو څخه مننه وکړه.
د ارګ په خپاره شوي بیان کې اشرف غنی ویلي، نړیواله ټولنه دې اجماع ته رسیدلې چې پرافغانستان لنډمهاله نه بلکې منځ مهال او اږود مهال فکر وکړي او د یوې واضع لار نقشې له موجودیت پرته د افغانستان پریښودلو اراده وجود نه لري.
