د افغانستان په پروان ولایت کې د ولسمشریزو ټاکنو په کمپاین د ځانمرګي برید پړه طالبانو منلې چې په کې ۲۶ تنه ولسي وګړي وژل شوي او لږترلږه ۴۲ کسان ژوبل شوي دي.
افغان چارواکي او د رسنیو راپورونه وايي، په افغانستان کښې په اته ویشتم (۲۸) جولای د ولسمشرۍ لپاره د ټاکنو د کمپاین پېل کېدو وروسته دا په ټاکنیزه غونډه لومړۍ حمله ده.
د افغانستان د کورنیو چارو وزارت مرستیالې ویاندې مروه امیني ډیوه راډیو ته وویل:
"په ټوله کې د ټاکنو د امنیت لپاره مونږ له اتو میاشتو مخکې په یو جامع پلان کار کړې وو چې له نېکه مرغه تر نن پورې د کمپاینونو مجلسونو، ، د شکایاتو کمیسیون د کار محل او د دوي دفترونو کې امن وو او داسې کومه پیښه نه وه رامنځ ته شوې چې چا ته مرګ ژوبله واوړي".
د طالبانو وسله والې ډلې د وړاندې لا په هېواد کې د ولسمشرۍ لپاره د ټول ټاکنو مخالفت کړی وو. طالبانو ولسي وګړو ته خبردارۍ ورکړی وو چې د انتخابي غونډو جلوسونو کې دې ګډون و نه کړي.
د طالبانو ویاند ذبیح الله مجاهد په یو پیغام کښې ويلي که خلک اوس هم په انتخاباتي غونډو کې برخه اخلي او زیانمن شي نو د دې ذمه وار خلک په خپله دي.
د کورنیو چارو مرستیاله ویانده مېرمن مره امیني وايي:
"د افغانستان دښمنانو مخکې هم کوشش کولو چې دغه بریدونه زیات کړي او پر امنیتي او دفاعي ځواکونو باندې فشار راولي خو له نېکه مرغه مونږ د دوي ملا ماته کړې، په تیرو څو ورځو کې چې مونږ کومه ماته دوي ته ورکړې هغه په تيرو ډیرو کلونو کې نه وه ورکړل شوې او دا د دې ضامن دی چې حکومت د دښمنانو په وړاندې د کورنیو چارو وزارت، دفاع وزارت او ملي امنیت همغږي زیاته شوې او هدف مو همدا دی چې ملکي وګړو ته د مرګ ژوبلې اوښتو کچه راټیټه کړو او امینت ټینګ کړو".
په افغانستان کې د ناټو چارواکو مخکښې نه اټکل کړی وو چې کیدای شي په افغانستان کې د تشدد پيښې نورې زیاتې شي.
د دې یو لوی علت دا دی چې امریکا د طالبانو سره د سولې خبرې ختمې کړې.
د امریکا ولسمشر ډونلډ ټرمپ د سولې د خبرو اترو په اخیرې شېبو کې طالبان په ترهګرۍ ګرم کړل او په کابل کې یې په یوه حمله کې د یو امریکايي پوځي د وژلو غندنه وکړه.
