د پاکستان د قامي اسمبلۍ د سېفران کميټۍ په غونډه کې تېره ورځ د افغانستان سره په پوله د ګورسل او ناوا پاس دلارو په پرانستو خبرې شوې دي۔
کاروباريان وايي که دغه لارې پرانستل شي په سيمه کې به ځوانان په روزګار شي او معيشيت په وده وومي۔
د قامي اسمبلۍ د سېفران دسټېنډنګ کمېټۍ مشر ساجد مومند وي او ای ډيوه ته وويل د کمېټۍ په تېره غونډه کې هم د مومندو د ګورسل او د باجوړ د ناوا پاس لارو په پرانستو خبرې شوې وي۔
نوموړي وويل دوئ په دغه لړ کې ټول اړونده حکومتي چارواکي راغوښتي وؤ او د سپارښتنو جمع کولو وینا یې ورته کړې وه.
ساجد مومند وويل تر اوسه دغه لارې د بدامنۍ له امله تړل شوې وې خو په افغانستان کي د حکومت بدليدو سره دوئ هیله لري چې دغه لارې پرانستل شي۔
د باجوړ او مومندو اوسيدونکي وايي په دغه لارو يې د افغانستان سره د کلونو راهسې تجارت روان ؤ، پاکستان نه به خوراکي توکي، سبزيانې او نور د ورځني استعمال شیان افغانستان ته ليږل کيدل او د افغانستان نه مېوې، د ګاډو سامان او نور ګڼ شمېر شیان پاکستان ته راتلل.
خو د باجوړ چېمبر اف کامرس مشر لالي شاه وايي د کال دوه زره شپږم، اووم نه راپدېخوا بد امني سېوا شوه او دغه لارې د تجارت لپاره وتړل شوي چې ورسره په سلګونو د سيمي خلک بې روزګاره شو۔
په کال ۲۰۲۰م کې د وزيراعظم عمران خان د افغانستان لپاره ځانګړي استازي محمد صادق ويلي وؤ د کرمې خرلاچي او د جنوبي وزيرستان انګور اډې لارې د تجارت لپاره پرانستل شوې دي.
د غلام خان، تورخم او د چمن لارې هم د ډير وخت راهسې پرانستې دي خو د مومندو د ګورسل او د باجوړ ناواپاس لارې لا هم بندې پرتې دي۔
په کال ۲۰۱۹م کې هم د خېبر پښتونخوا وزير اعلا محمود خان مومندو ته د دورې په مهال ويلي وؤ د دغه لارو د پرانستو هڅې کوي او اعلا فوځي او حکومتي چارواکو سره په خبرو بوخت دی۔
