د افغانستان سره په پوله پرتې د خېبرپښتونخوا جنوبي وزيرستان ضلعې جنوبي وزيرستان کې د پوليو ټيمونو ساتنې له روانو پوليسو په ګاډي چاودنه شوې، د اووه پوليس اهلکارو په ګډون پکې 13 تنه ژوبل شوي دي.
خېبرپښتونخوا کې د پوليو مخنيوي د پروګرام ترمخه، د بر جنوبي وزيرستان په ګډون د صوبې په 27 مخصوصو ضلعو کې نن د نهم ستمبر څخه د پوليو ضد څاڅکو کمپاين پيل شوی دی.
د جنوبي وزیرستان د پوليسو په وينا، د پوليسو په ګاډي چاودنه په واڼه کې شوې ده.
د ژغورنې ادارې رېسکيو 1122 او طبي چارواکو په وينا، په چاودنه کې د اووه پوليس اهلکارو او شپږو ملکي وګړو په ګډون 13 تنه ژوبل شوي دي.
د واڼه روغتون د سرچينو ترمخه په ژوبلو کې ځینې معمولي ژوبل شوي د واڼه روغتون ته منتقل کړل شوي او يو ډېر ژوبل ډېره اسماعيل خان ته منتقل کړل شوی دی.
د واڼه تاڼې چارواکو وي او اې ډیوه ته ويلي، ياد پوليس اهلکار د پوليو ډيوټۍ دپاره راغوښتل شوي، سهار په ګزمه وو، چې اېښودل شوی بم پرې چاودلی دی.
د چارواکو په وينا، چاودنه په داسې ځای کې شوې چرته چې د موټر ګاډو د ټېکسيانو اډه ده ځکه عام خلک هم په چاودنه کې ژوبل شوي دي.
چارواکو ويلي، د پېښې وروسته ټوله علاقه په ګېره کې اخستل شوې، د لټون عمليات پيل کړل شوي دي.
په سمدستي ډول د پېښې زمه واري چا نه ده منلې.
پرون په اتم ستمبر هم د جنوبي وزیرستان واڼه سره نزدې کړي کوټ سیمه کې د ځايي مشر ملک جمیل په ګاډي چاودنه شوې، چې پکې د هغه 25 کلن زوی شمس الدین وژل شوی او د ملک جمیل په ګډون څلور نور کسان ژوبل شوي وو.
په دې وروستیو کې په وزیرستان او افغانستان سره په پوله پرتو نورو قبایلي ضلعو کې د ناامنۍ پېښې زیاتې شوې دي.
د پاکستان حکومت د وسله والو د ختمولو لپاره د عزم استحکام په نوم د نوو عملیاتو پیلولو منظوري ورکړې ده، خو د سیمې خلک د دې عملیاتو مخالفت کوي.
Forum