د اسرائیل پوځ د زیارت/پنجشنبې په ورځ د لبنان په جنوب کې د څه باندې شلو (۲۰) ښارګوټو او کلیو اوسېدونکو ته په تعدۍ سره خبرداری ورکړ چې په فوري توګه دې خپل کورونه پرېږدي او شمالي علاقو ته دې ولاړ شي چې د حزب الله ډلې په ضد د اسرائیلي ځواکونو د عملیاتو نه بچ پاته شي.
د اسرائیل د دفاعي ځواکونو د عربي ژبې ویاند لفټننټ کرنل اویچای ادرايي پخپل اېکس (پخواني ټوېټر) د هغو سیمو اوسېدونکو ته خبرداری ورکړ چې د خپل ژوند د تحفظ دپاره دې د نهر الأولي نه پورې غاړه ولاړ شي. هغه دا خبرداری هم ورکړ چې که چېرته دا خلک د جنوب خوا ته حرکت وکړي، نو د خطرې سره به مخ شي.
د اسرائیلي ځواکونو دې ترجمان زیاته کړې: "د حزب الله فعالیتونه د اسرائیل دفاعي ځواکونه مجبوره کوي چې د هغو په ضد په قوت عمل وکړي" او چې کله حالات محفوظه شي، بیا به هغوی ته خبر ورکړي چې بېرته خپلو کورونو ته راستانه شي.
د اسرائیل دفاعي ځواکونو (آی ډي آېف) یوه وېډیو هم خپره کړې چې وایي د لبنان په جنوبي علاقو کې د هغوی د عسکرو عملیات ښيي. د پوځ په یو بیان کې راغلي چې د اسرائیل د پوځ شپږم برېګېډ اوس مهال په جنوبي لبنان کې دی چې هلته کې "د حزب الله ترهګر تنظیم د ترهګرې اډانې تباه کولو او له منځه وړلو دپاره، هدفي چاپې لګوي."
آی ډي اېف د زیارت/پنجشنبې په ورځ دا هم وویل چې د اسرائیل جنګي جټ جهازونو د چهارشنبې په ورځ یوې حملې کې د حزب الله یو کمانډر خدر الشهابیه ووژلو. په بیان کې دا هم ویل شوي چې خدر د هغې راکټي حملې ذمه وار و کوم چې په تېره جولائی میاشت کې د اسرائیل قبضې لاندې ګولان غونډیو په مجدالشمس کې شوې وه او د فټبال په میدان کې یې دوولس تنه تنکي هلکان وژلي و.
د لبنان د صحت چارواکو د زیارت/پنجشنبې به ورځ وویل چې په بېروت کې د اسرائیل په بمبارۍ کې د فلېټونو یوه ودانۍ لګېدلې او په کې لږ تر لږه شپږ تنه مړه او اووه تنه نور زخمیان شوي دي.
د تېرې نهې/سې شنبې د ماخوستن راهیسي، چې ایران په اسرائیل باندې د شاوخوا دوه سوو میزائیلو بریدونه وکړل، په منځني ختيځ کې حالات ډېر تاوجن شوي دي.
ایران دا حمله د یهودانو د نوي کال په شپه وکړه، او دا یې د اسرائیل د هغو یو لړ حملو په جواب کې انتقامي ګام یاد کړ چې د ایران د حمایت لاندې پراکسي ډلو او مشرانو باندې شوي دي. ایران ویلي و چې د تهران کې د حماس د مشر اسماعیل هنیه او بېروت کې د حزب الله د مشر حسن نصرالله د وژل کېدو انتقام به اخلي.
د اسرائیل وزیراعظم بنیامین نتنیاهو خبرداری ورکړی چې ایران لویه خطا کړې او خپل د دې حملې قیمت به ادا کوي.
د ایران صدر مسعود پزشکیان ویلي چې چېرته اسرائیل کومه انتقامي کاروايي وکړه، ایران به سخت جواب ورکړي.
Forum