په پاکستان کې د پولیو خلاف کمپاين روان دی، ورسره په ملک کې د پوليو مثبتې پېښې رپوټ کېدل هم دوام لري، د سږني کال تراوسه پورې 43مه پېښه هم د بلوچستان صوبې په چاغي ضلعه کې رپوټ شوې ده.
د تازه پېښې وروسته بلوچستان صوبه کې د پوليو ټولې پېښې 22 ته ورسېدې.
پرون د خېبر پښتونخوا څخه د پولیو پېښه رپورټ شوې وه.
د پرونۍ پېښې په اړه پاکستان کې د پوليو مخنيوي د پروګرام د پېښور څانګې خبر پاڼه کې ويلي وو، د نوښار په ګنډهیري سیمه کې د 29 میاشتو یوې ماشومې ته پولیو وایرس ورپورې کېدو پخلی شوی دی.
دا پېښه په داسې حال کې مخې ته راغلې چې د 28م اکتوبر نه پاکستان کې د پولیو په ضد کمپین پېل شوی او ټاکل شوې چې دا کمپاين به تر درېم نومبر روان وي.
دوه ورځې وړاندې د خېبر پښتونخوا د بره اورکزۍ په ډبوري بادان کلي کې د پولیو په یوه ډله برید هم شوی وو چې پکې د پولیو ډلې په حفاظت مامور دوه پولیس عسکر وژل شوي او پولیسو دعوه کړې وه، په ځوابي ډزو کې درې برید کوونکي هم وژل شوي وو.
راپورونه ښيي چې سږ کال په ټول پاکستان کې د پوليو 42 پېښې ريورټ شوې، چې پکې 22 په بلوچستان، 12 په سیند، 7 په خیبر پښتونخوا یوه په پنجاب او یوه په اسلام آباد کې مخې ته راغلې ده .
د صحت نړیواله اداره (ډبلیو ایچ او ) د پوليو پېښو زیاتېدو په اړه ژوره اندېښنه ښودلې او خبرداری یې ورکړی چې له پاکستان څخه پوليو وايرس نورو هېوادونو ته د انتقالېدو فوري خطر شته.
په پاکستان کې د پوليو د خاتمې لپاره د ایمرجنسي آپریشن سينټر له خوا په پيل شوي کمپین کې 81 زره پوليو ټیمونه کار کوي، چې د هغوی د خونديتوب لپاره 19 زره امنيتي اهلکاران ګمارل شوي دي.
په پاکستان کې 1994 کال راهیسې د پوليو مخنيوي پروګرام روان دی، او دعوه کوي چې د دې پروګرام له امله په هېواد کې د پوليو پېښو کچه 99 سلنه کمه شوې. خو بيا هم، له افغانستان وروسته پاکستان په نړۍ کې يواځينی هغه هېواد دی چې لا هم پکې د پوليو پېښې په دوامداره توګه رپوټ کیږي.
Forum