د خېبر پښتونخوا وزیرعلا ښاغلی علي امین ګنډا پور نن په دویمه ورځ هم د اسلام اباد څخه لادرکه دی اؤ د پښتونخوا حکومت ویاند وایي هغوي ته هیڅ معلومه نه ده چې وزیراعلا ګنډا پور چرته اؤ په څه حال دی.

د هیواد د کورنیو چارو وزیر محسن نقوي ویلي علي امین ګنډا پور نه خو پولیسو نیولی اؤ نه د ایجنسیو سره شته بلکې هغه د خېبر پښتونخوا هاوس څخه تښتیدلی دی.

د اسلام اباد څخه د وزیراعلا علي امین ګنډا پور د مرموزې بې درکۍ په معامله د خېبر پښتونخوا اسمبلۍ بېړنۍ غونډه نن د اتوار په ورځ رابلل شوي اؤ تحریک انصاف ګوند د صوبایي اسمبلۍ مخې ته د احتجاج کولو اعلان هم کړی دی.

د خالي په ورځ د تحریک انصاف قافلې سره اسلام اباد ته د احتجاج لپاره له رسېدو وروسته علي امین ګنډا پور د خېبر پښتونخوا هاوس څخه د رینجرز اؤ پولیس ځواکونو پخپله ولکه کې اخستی ؤ اؤ په قامي اسمبلۍ کې د اپوزیشن مشر عمر ایوب خان دعوه کړې وه چې وزیراعلا په ناقانونه توګه نیول شوی دی.

د پاکستان سرکاري ټي وي اؤ نورې میډیا هم په وړومبي سر کې د وزیراعلا د نیول کېدو خبر ورکړی ؤ خو وروسته بیا میډيا د سرکاري سرچینو له خولې وویل چې علي امین ګنډا پور په باضابطه توګه نه دی نیول شوی.

پاکستان تحریک انصاف ګوند پخپله رسمي ایکس پاڼه لیکلي "د یوې صوبې موجوده وزیر اعلا لادرکه دی اؤ ټول پوهیږي چې هغه چا په غیر قانوني ډول په حراست کې ساتلی دی"

پي ټي آي په سمدستي توګه د علي امین ګنډا پور د خوشې کولو غوښتنه کړې ده اؤ ویلي یې دي "د ټولې نړۍ په مخکې دې پاکستان پسې له خندا کولو لاس واخستل شي"

د خېبر پښتونخوا اسمبلۍ د سیکرټریټ لخوا د اسمبلۍ د رابلل شوې غونډې په اړه خپره شوې اعلامیه کې ویل شوي چې غونډه کې به د خېبر پښتونخوا د وزیراعلا د تښتول کېدو په معامله بحث کولی شي.

د پښتونخوا حکومت ویاند بېرسټر سیف هم د اسمبلۍ د بېړنۍ غونډې رابلل کېدو پخلی کړی اؤ پخپل بیان کې یلي ویلي دي چې دوي ته هیڅ نه ده معلومه چې دا مهال وزیراعلا علي امین ګنډا پور چرته دی.

د تحریک انصاف ګوند د پېښور صدر عرفان سلیم رسنیو ته ویلي چې د وزیراعلا علي امین ګنډا پور پراسراره جبري لادرکي د ولس د رایو سپکاوی دی.

د کورنیو چارو وزیر محسن نقوي دا تورونه رد کړي چې ګنې علي امین ګنډا پور د اسلام اباد څخه نیول شوی دی.

خبریالانو ته ښاغلي نقوي ویلي علي امین ګنډا پور د خېبر پښتونخوا هاؤس څخه تښتېدلی اؤ د هغې د تېښتې عکسونه هم شته.

د محسن نقوي په خبره "زه تاسو ته په ددې خبرې پخلی کوم چې هغه نه د پولیسو سره دی،اؤ نه د کومې بلې ادارې په حراست کې دی، هغه پخپله تښتېدلی دی"

تر دې وړاندې هم تېره میاشت په اتم ستمبر د اسلام اباد تر څنګ یوې جلسې ته له وینا کولو وروسته علي امین ګنډا پور په مرموزه توګه بې درکه کړل شوی ؤ اؤ د تحریک انصاف مشر عمران خان بیا ویلي وؤ چې هغه ایجنسیو پورته کړی خو د تحریک انصاف مشرانو ویلي وؤ "له یو اوږد میټنګ وروسته علي امین ګنډا پور پېښور ته رارسېدلی دی"

د علي امین ګنډا پور د وړومبۍ بې درکۍ وروسته د هیواد ددفاع وزیر خواجه اصف ویلي وؤ چې هغه په کوهسار کې د آي ایس آي میلمه ؤ اؤ په منتونو یې بیا پرېښودی دی.

پاکستاني رسنۍ وایي د پاکستان حکومت د پښتون ژغورنې په غورځنګ یا پي ټي ایم بندیز ولګولو.

د کورنیو چارو وزارت په ټي ایم دا بندیز په داسې حال کې لګولی چې یاد تحریک د قامي عدالت په نوم په ۱۱م اکتوبر د پښتنو قامي جرګه خېبر ضلعې ته رابللې ده اؤ ددې جرګې لپاره یې ټول انتظامات سرته رسولي دي.

څېړونکي وایي په پي ټي ایم له بندیز لګول کېدو وروسته دا تنظیم اوس په قانوني توګه هیڅ فعالیت نه شي کولی اؤ ښیي حکومت یې د ۱۱م اکتوبر د جرګې مخه ونیسي.

د پښتون ژغورنې غورځنګ لخوا د حکومت دې ګام ته سخت غبرګون ښودل شوی اؤ په ټولنیزه رسنۍ ایکس د پښتون ژغورنې غورځنګ د رسمي اکاونټ نه ټویټ شوی چې" دا وړومبی ځل نه دی چې مونږ د پاکستان په ریاست کې پښتون مخالفه تعصب وینو"

پي ټي ایم ویلي د بابړې د قتل عام نه راواخله په خدایي خدمتګارو د بندیز پورې اؤ تر ننه د پښتنو هر سیاسي فعالیت ته د پاکستان ریاست د دښمنۍ په سترګه ګوري.

د کورنیو چارو د وزارت له لوري په پي ټي ایم د لګول شوي بندیز په اعلامیه کې ویل شوي چې دا تنظیم په ملک کې امنیت لپاره خطره ده.

د اعلامیې له مخې په پي ټي ایم دا بندیز د 1997 دترهګرۍ د مخنیوي د قانون د 11BK دفعې د لاندې لګول شوی دی.

وي او ای ډیوه په دې حکومتي اقدام د پي ټي ایم د مشر ښاغلي منظور پښتین د نظر اخستو لپاره هغه سره د تماس نیولو هڅه وکړه اؤ د واټساپ له لارې یې هم پېغام ور ولېږلو خو د هغه واټساپ اؤ ټيلي فون هیڅ ځواب ونه ویلو.

خو پښتین په اېکس (پخواني ټوېټر) باندې ویلي چې ډېر ژر به په دې اړه ویډیویي پیغام جاري کړي. هغه د یو بل چا د لیکنې په جواب کې چې پي ټي اېم یې شهباز شریف ته په رایه ورکولو تورن کړی، لیکلي دي چې پي ټي اېم هېڅکله پارلېماني ووټ کې ندی شامل شوی، بلکې "هر حکومت د پوځي جرنیلانو په حکم باندې ورباندې ظلم جبر کړی، مګر [پي ټي اېم تحریک] نه د اودرېدو نوم یادوي او نه به واپس ګام کیږدي. مزاحمت به جاري پاته شي."

ایا د پي ټي ایم لخوا رابلل شوې جرګه به اوس وشي؟

په اسلام اباد کې میشت وتلی خبریال طاهر خان وایي د کورنیو چارو د وزارت په اعلامیه کې ادعا شوې ده چې د پي ټي ایم ځينې کارونه اؤ فعالیتونه د امن سره په ټکر دي خو نوموړی زیاتوي چې ددې باوجود پي ټي ایم دا حق لري چې د کورنیو چارو د وزارت ددې اقدام په ضد د عدالتونو دروازه وټکوي.

ښاغلی طاهر خان وایي دا چې اوس په پي ټي ایم د حکومت لخوا بندیز لګول شوی نو تر دې وروسته به دا ډله هم د نورو ناقانونه ګرځول شوؤ ډلو په څېر د فعالیتونو اجازه ونه لري .

هغه وایي پي ټي ایم به اوس په قانوني توګه ددې جوګه پاتې نه شي چې په ۱۱م اکتوبر خپله رابلل شوې جرګه وکړي.

پېښور کې قانون پوه او سیاسي فعال طارق افغان وایي چې د حکومت دا ګام چې پي ټي اېم یې کالعدم وګرځولو، دا به نفرت خپور کړي.

له بندیز وروسته پي ټي ایم سره څه لاره پاتې ده؟

په پېښور کې میشت وتلی خبریال اؤ څېړونکی محمود جان بابر هم وایي چې دې حکومتي اقدام وروسته داسې نه ښکاري چې پي ټي ایم به په ۱۱م اکتوبر قامي جرګه وکړل شي.

ډیوه سره خبرو کې ښاغلي بابر وویل،دا وړومبی ځل نه دی چې پاکستان کې په یو تنظیم یا ګوند پابندي لګول شوې ده بلکې دې نه وړاندې هم مختلفو وختونو کې په بیلابیلو تنظیمونو اؤ ګوندونو بندیزونه لګول شوي دي.

هغه وایي د حکومتي بندیزونونه نه د ځان بچ کولو لپاره اکثره بیا د بندیز سره مخ شوي تنظیمونه اؤ ګوندونه په نورو نومونو خپل فعالیتونه په مخکې وړي اؤ پي ټي ایم که اوس له دې وروسته فعالیت کول غواړي نو خپل نوم به ورته بدلول وي .

خو د محمود جان بابر په خبره پي ټي ایم که پخپل نوم فعالیت کولو نو هم په مقتدره طبقې ښه نه لګیدو اؤ که په بدل نوم فعالیت وکړي نو هم دې تنظیم ته به د خپل کار په مخکې د بوتلو اجازه ورنه کړل شي.

"که پي ټي ایم د هر نوم لاندې کار کوي خو که دده ایجنډه اؤ خبره هم هغه وي کومه چې مخکې کوله نو بیا به پرې بندیز لګي اؤ بیا به کار نه شي کولی ، جلسه اؤ جلوس به یې بند وي ، څنګه چې مخکې بند ؤ ، بیا به هم بند وي"

خبریال طاهر خان وایي ددې حکومتي اقدام نه وروسته پي ټي ایم اوس قانوني حق نه لري چې یوه غونډه وکړي اؤ یا ددې تنظیم نوم په رسنیو کې واخستل شي.

د طاهر خان په خبره "ددې فیصلې نه وروسته ګمان نه کووم چې حکومت به هغوي ته (د جرګې کولو) اجازه ورکړي ځکه چې د مرکزي حکومت کومه فیصله ده هغه په صوبایي حکومتونو اؤ د ضلعو په انتظامیو هم لاګو کیږي".

د حکومت کمزوري دلایل:

طاهر خان وایي اوس داسې نه ښکاري چې پي ټي ایم به په ۱۱م د اکتوبر خپله رابلل شوې جرګه وکړي.

هغه وایي که په بل نوم هم اوس پي ټي ایم فعالیت کوي نو زیات امکان شته چې بیا پرې هم بندیز ولګي.

هغه وایي د کورنیو چارو د وزارت اعلامیه ډیره کمزورې ښکاري اؤ دلایل یې ضیعف دي ، که چرې پي ټي ایم د دې پرېکړې خلاف عدالت ته لاړ شي نو د مرکزي حکومت لپاره به ډیره مشکله وي چې په عدالت کې د خپلو هغو دلیلونو نه دفاع وکړي یا یې ثابت کړي کوم چې یې په اعلامیه کې راوړي وي.

محمود جان بابر بیا وایي د حکومت لخوا په پي ټي ایم د بندیز لګولو سره د پي ټي ایم په جرګه ډیر غټ اثر پریوتی شي ځکه چې یو خو دوي اوس په قانوني توګه ددې غونډې جوړولو وړتیا نه لري اؤ بل کومو ګوندونو یا تنظیمونو ته چې یې جرګه کې دګډون بلنې ورکړي هغوي به هم د یو ناقانونه تنظیم په غونډه کې ګډون کولو ته زړه ښه نه کړي

پښتون تحفظ موومنټ د روانې میاشتې په ۱۱مه نیټه د قامي عدالت په نوم خېبر ته د پښتنو یوه استازې جرګه رابللې چې ددغه جرګې لپاره پي ټي ایم د صوبې ټولو سیاسي ګوندونو ، تنظیمونو اؤ د مدني ټولنو استازو ته بلنې ورکړې دي.

پي ټي ایم وایي د جرګې له لارې به نړۍ ته د پښتنو وطن کې په جنګونو اؤ ترهګرۍ کې د وژل شوؤ اؤ بې درکه کړل شوؤ پښتنو کره شمیرې وړاندې کړي اؤ نړۍ به له حقایقو خبر کړي.

پي ټي ایم د خپلې جرګې لپاره د پېښور سره نزدې په ریګي للمه سیمه کې کمپ لګولی چې په دغه انتظامي کیمپ هم تېره اوونۍ څو ځله پولیسو یرغل کړی ؤ اؤ د پي ټي ایم د پلویانو لخوا لګول شوې خیمې یې سوځولې وې.

منظور پښتین له وړاندې ویلي چې هغه اؤ پلویان به یې په اوچ زور د پښتنو رابلل شوې قامي جرګه کوي.

امنیتي سرچینې وایي د پاکستان د ناکراره صوبې بلوچستان په قلات سیمه کې په امنیتي ځواکونو بمي برید شوی چې پکې لږ تر لږه درې عسکر وژل شوي اؤ څلور نور ژوبل شوي دي.

د پاکستان آج ټي وي د قلات انتظامیې د یو لوړ پوړي چارواکي له خولې ویلي چې دا چاودنه د خالي په ورځ د قلات ښار سره نزدې په اسکلکو روډ د امنیتي ځواکونو په یو ګاډي شوې ده.

د پولیسو ویناده چې چې دغلته د دشت محمود په مقام نامعلومو ترهګرو د سړک په غاړه چاودیدونکي مواد اېښودي وؤ اؤ کله چې د امنیتي ځواکونو ګاډی په دغه سړک تېرېدو نو چاودنه پرې شوې ده.

پاکستاني رسنۍ د پولیسو له خولې وایي چې په دې چاودنه کې درې امنیتي عسکر وژل شوي اؤ څلور نور ژوبل شوي دي.

له چاودنې وروسته په ګڼ شمیر کې امنیتي ځواکونه د پېښې ځاي ته رسیدلي اؤ سیمه یې پخپله ولکه کې اخستې اؤ د لټونې عملیات یې پېل کړي دي.

د چاودنې ذمه واري په سمدستي توګه چا پغاړه نه ده اخستې خو تر دې وړاندې چې په نزدې وختونو کې په بلوچستان کې په امنیتي ځواکونو څومره بریدونه شوي هغې کې د زیاترو ذمه واري بیلتون پاله بلوڅ وسله والو ډلو پغاړه اخستې ده.

پاکستان کې په دې وروستیو کې یو وارې بیا د ترهګریزو بریدونو لړۍ زیاته چټک شوې اؤ تېره ورځ هم د خېبر پښتونخوا په قبایلي ضلعه شمالي وزیرستان کې د ټي ټي پي وسله والو سره نښته کې د پوځ د یو افسر( لیفټننټ کرنل) په ګډون شپږ عسکر وژل شوي وؤ.

آي ایس پي ار دعوه کړې وه چې په دغه نښته کې یې شپږ وسله وال هم وژلي دي.

د غېر دولتي څیړنیزې ادارې [پيکس] د رپورټ ترمخه تېر د ستمبر په میاشت کې پاکستان کې 77 ترهګریزې حملې شوي اؤ په دې کې تر ټولو زياتې 47 حملې خېبرپښتونخوا صوبه کې شوي دي.

په رپورټ کې ويل شوي، په 77 بريدونو 77 کسان وژل شوي، چې پکې 38 امنيتي اهلکار، 23 ملکي وګړي او 16 جنګيالي شامل دي.

د رپورټ ترمخه، د پاکستان امنيتي ځواکونو 34 مشکوکه جنګيالي وژلي او 16 یې نيولي دي.

د پيکس په رپورټ کې ويل شوي، د ستمبر په میاشت کې بلوچستان صوبه کې 27 حملې شوي، 22 کسان پکې وژل شوي او 48 پکې ژوبل شوي دي. په اګست کې په 43 حملو کې 125 کسان وژل شوي وو.

بلوچستان صوبه کې تېر د د 25م او 26م اګست) په مينځنۍ شپه کې په مختلفو پېښو کې د چارواکو په وينا، د 14 پوځيانو او امنيتي اهلکارو په ګډون د 70 پورې کسان وژل شوي او پوځ د 21 ترهګرو وژلو دعوه کړې وه.

پيکس ويلي، خېبرپښتونخوا کې په 47 حملو کې 54 کسان وژل شوي، او قبايلي ضلعې د ترهګرۍ نه تر ټولو اغېزمنې پاتې شوي، په قبايلي ضلعو کې 26 حملو کې 37 کسان وژل شوي دی.

د ترهګرۍ ضد محکمې (سي ټي ډي) دعوه کړې ده چې د پنجاب په بیلابیلو سیمو کې یې د عملیاتو په مهال 18 ترهګر نیولي چې درې پکې د ټي ټي پي خطرناک ترهګر هم شامل دي.

د پنجاب د سي ټي ډي ویاند پخپل یو بیان کې ویلي چې د پنجاب په بیلابیلو سیمو کې یې د استخباراتي معلوماتو په اساس 134 عملیات کړي دي.

سي ټي ډي وایي دا عملیات یې د پنجاب په سر ښار لاهور، خوشاب، ګوجرانواله، پاک پتن، بہاول نګر، راولپنډۍ، فیصل آباد، شیخوپورہ، منډي بہاؤالدین اؤ میانوالي کې کړې دي.

د ویاند په وینا عملیاتو کې ټول 18 ترهګر نیول شوي چې درې پکې د ټي ټي پي اهم وسله وال هم شامل دي .

د ترهګرۍ ضد محکمې پخپل بیان کې د نیول شوؤ ترهګرو پېژندګلو مخې ته نه ده راوړې خو دعوه یې کړې ده چې هغوي د ترهګرۍ په یو شمیر پېښو کې لاس درلودو.

سي ټي ډي ویلي له نیول شوؤ ترهګرو یې وسلې اؤ چاودیدونکي مواد هم ترلاسه کړي دي.

پاکستان کې په دې وروستیو کې یو وارې بیا د ترهګریزو بریدونو لړۍ زیاته چټک شوې اؤ تېره ورځ هم د خېبر پښتونخوا په قبایلي ضلعه شمالي وزیرستان کې د ټي ټي پي وسله والو سره نښته کې د پوځ د یو افسر( لیفټننټ کرنل) په ګډون شپږ عسکر وژل شوي وؤ.

آي ایس پي ار دعوه کړې وه چې په دغه نښته کې یې شپږ وسله وال هم وژلي دي.

د غېر دولتي څیړنیزې ادارې [پيکس] د رپورټ ترمخه تېر د ستمبر په میاشت کې پاکستان کې 77 ترهګریزې حملې شوي اؤ په دې کې تر ټولو زياتې 47 حملې خېبرپښتونخوا صوبه کې شوي دي.

په رپورټ کې ويل شوي، په 77 بريدونو 77 کسان وژل شوي، چې پکې 38 امنيتي اهلکار، 23 ملکي وګړي او 16 جنګيالي شامل دي.

د رپورټ ترمخه، د پاکستان امنيتي ځواکونو 34 مشکوکه جنګيالي وژلي او 16 یې نيولي دي.

پيکس ويلي، خېبرپښتونخوا کې په 47 حملو کې 54 کسان وژل شوي، او قبايلي ضلعې د ترهګرۍ نه تر ټولو اغېزمنې پاتې شوي، په قبايلي ضلعو کې 26 حملو کې 37 کسان وژل شوي دی

د خېبر پښتونخوا ګورنر ښاغلي فیصل کریم کنډي پښتونخوا صوبه کې د ګورنر راج پځای کولو اشاره ورکړې اؤ ویلي یې دي که چرې معاملې له حده واوښتې نو په ګورنر راج لګولو کې هیڅ بدی نشته.

تر دې وړاندې چې اوړمه ورځ ګورنر فیصل کریم کنډي د تحریک انصاف د سختو احتجاجونو په ترڅ کې د وزیراعظم شهباز شریف سره لیدنه کړې وه نو په پاکستاني میډیا اؤ سوشل ميډیا داسې ګنګوسې راپورته شوې چې ګنې حکومت په پښتونخوا صوبه کې ګورنر راج پځای کوي.

د ډان ټي وي په یو پروګرام کې د خبرو په مهال ګورنر فیصل کریم کنډي وویل هغه د وزیراعظم شهباز شریف سره لیدنه کې صوبه کې د ګورنر راج پځای کولو په اړه هیڅ خبرې نه دي دي کړي.

خو وي ویل که چرې معاملې حده ورتېري شي نو بیا د ملک اؤ جمهوریت په خاطر په ګورنر راج پځاي کولو کې هیڅ بده خبره نشته.

هغه وویل کوم څه چې په ایین کې موجود وي، د( ګورنر رول) لاره ضرور موجود وي اؤ په ماضي کې هم ګورنر رول پځاي کړل شوی دی.

ښاغلي فیصل کریم کونډي وویل کله چې یو مرض لاعلاجه شي نو که بیا څوک نه هم غواړي خو فیصله ور پغاړه شي.

په پښتونخوا صوبه کې واکمن ګوند تحریک انصاف لا د ګورنر فیصل کریم کنډي دې څرګندونو ته کوم غبرګون نه دی ښودلی خو دغه ګوند دریځ لري چې موجوده حکومت د مارشل لاء په څېر اقداماتو ته لاس اچولی اؤ د ولس راي له نظره غورځوي.

تحریک انصاف ګوند له تېرو دؤؤ ورځو راهسې په سر ښار اسلام اباد اؤ لاهور کې د احتجاجونو لړۍ پېل کړې ده اؤ د پاکستان د کورنیو چارو وزیر ښاغلي محسن نقوي تېره شپه رسنیو ته ویلي د وزیراعلا علي امین ګنډا پور په مشرۍ کې په اسلام اباد حمله شوې ده.

د خالي په ورځ د تحریک انصاف مشرانو دعوه کړې وه چې د پښتونخوا وزیراعلا په اسلام اباد کې د خېبر پښتونخوا هاؤس څخه نیول شوی خو وروسته بیا تحریک انصاف له خپلې دغې دعوې پشا شو اؤ پاکستاني رسنیو هم د سرکاري سرچینو له خولې وویل چې علي امین ګنډا پور لا په رسمي توګه نه دی نیول شوی.

د تحریک انصاف یو مرکزي مشر اسد قیصر ویلي پي ټي آي دا احتجاج د عمران خان په وینا پیل کړی اؤ یوازې د هغه په وینا به یې ختموي.

د کورنیو چارو مرکزي وزیر محسن نقوي ویلي د پي ټي آي له احتجاج څخه په اسلام اباد کې ددغه ګوند 564 فعالان نیول شوي چې 11 پکې د خېبر پښتونخوا پولیس هم دي.

هغه ویلي مظاهره چیانو غوښتل چې د شنګهاي د همکاریو د سازمان تر غونډې پورې اسلام اباد کې پرلت وغځوي خو وایي حکومت ډير په تحمل سره حالات قابو کړي دي