څېړونکي: حقانیه مدرسه کې شوی ځانمرګي برید د مختلفو مسلکونو تر منځ د تضاداتو نتیجه کېدای شي

څېړونکي اټکل کوي چې د اکوړي خټک په حقانیه مدرسه کې په اته ویشتمه فرورۍ شوی ځانمرګي برید د مختلفو مسلکونو ترمینځه د تضاداتو نتیجه کیدای شي.

څیړونکي وایي ددې پیښې نه وروسته چې سیمه کې د امن د بحالۍ د پاره کوم کوششونه روان شوي وو. په هاغه کوششونو هم منفي اغېزې کیدای شي.

د جمعې په ورځ د دارالعلوم حقانیه په جومات کې د جمعې له لمانځه وروسته ترسره شوي ځانمرګي برید کې ددغه مدرسې د مرستیال مهتمم اؤ د جمعیت علماء اسلام (س) ډلې د مشر مولانا حامد الحق په ګډون اووه کسان وژل شوي اؤ ۲۰ نور ژوبل شوي وؤ.

ددغه برید ذمه واري لا په واضحه توګه چا پغاړه نه ده اخستې خو په سوشل میډیا وسله والې ډلې داعش ته نزدې ګڼل کیدونکو سرچینو دعوه کړې چې دا ځانمرګي برید داعش کړی دی.

پاکستاني اؤ افغان طالبانو پخپلو بیلابیلو بیانونو کې ددې برید غندنه کړې ده

د امنیتي چارو څیړونکی اؤ د خېبر پښتونخوا د پولیسو پخوانی مشر سید اختر علي شاه وي او اې ډیوه ته وایي کله چې یوه فرقه په بلې د مذهب نه د خارجیدو تور پورې کړي نو بیا د هغې فرقې د منونکو خلاف جهاد ضروري ګڼي.

ډاکټر شاه زیاتوي د جامعه حقانیه بنیاد هم د جهاد په فلسفه ایښودل شوی دی

"ځکه چې دا یو تخم خو کرلی شوی دی. زه به دا ووایم چې جامعه حقانیه کې پخپله هم دا څیز پاتې شوی دی، د جهاد فلسفې او ددې. افغانستان کې جهاد. چې ضیا الحق سره او دا ټول چې دي د دې ټولو په هغه زمانه کې ذهن سازي شوې ده. د عربو نه د مختلفو ذهینیتونو خلک چې راغلي وو نو هاغه ټایم کې دا ټولې فلسفې راغلې دي"

ډاکټر اختر علي شاه زیاتوي ددې نه وړاندې افغانستان کې هم آیي ایس یا داعش د تحریک طالبان افغانستان غړي په نښه کړي دي.او طالبانو د داعش مهم تنان د مینځه وړي دي. دغه شان د طالبانو خپل منځي اختلافات هم اوس پټ نه دي پاتې.

ماهران وایي که وسله والو ډلو د افغانستان د پولو نه بهرپاکستان کې په یو بل حملې شروع کړې نو دې سره به دلته حالات نورهم خراب شي

خبریال اؤ څیړونکی طارق وحید ډیوه سره په خبرو کې وایي، په حقانیه مدرسه کې د شوي برید له امله د خېبر پښتونخوا د حکومت لخوا افغانستان ته د لېږل کېدونکې جرګې اؤ افغان حکومت سره وړاندیز شوي مذاکراتي عمل ته زیات زیان رسیدلی دی.

د هغه په خبره "نو زه دا ګڼم چې دا کوم دریمګړی فریق دی. هغه ددې کوششونو د ورانولو د پاره یا ختمولو د پاره چې کوم دی، دا برید کړی دی. او اوس زه دا ګڼمه چې ددې پیښې نه پس چې کوم دا مذاکراتي عمل دی. د جرګې دا عمل دی. ختمیږي خو نه. خو دې ته ډیر زیات نقصان ورسیدو"

د روان کال ۲۰۲۵م د جنورۍ په میاشت کې چې د خیبر پښتونخوا وزیراعلا سردار علي امین ګنډاپور افغانستان ته طالبانو سره د امن مذاکراتو د پاره د وفد لیږلو کوم اعلان کړی وو. مولانا حامدالحق د هغې پوره مرسته کړې وه او د افغانستان په طالبانو یې غږ کړی و چې په پاکستان د حمله کونکو ملاتړ دې نه کوي.

د خبري شبکې اې ایف پي د رپورټ له مخې دارالعلوم حقانیه د پاکستان له سترو اؤ زړو مدرسو څخه یوه ده چرته چې نزدې تر څلورو زرو زیات دیني طالبان میشت دي اؤ هغوي ته ویړیا دیني زده کړې،کالي اؤ خوراک ورکول کیږي.

د حقانیه مدرسې د ویب پاڼې له مخې د طالبانو یو شمیر مشرانو چې د حقاني نیټ ورک مشر سراج الدین حقاني هم پکې شامل دی ددغه مدرسې څخه دیني زده کړې کړې دي.

مولانا حامد الحق پروسکال د مذهبي سفارتکارۍ د یوې برخې په توګه د دیني عالمانو د یو پلاوي په مشرۍ افغانستان ته تللی ؤ اؤ هلته یې د طالب مشرانو سره لیدنې کړې وې.

مولانا حامد الحق کابل ته د خپل دغه سفر په اړه ویلي وؤ چې د دیني عالمانو کابل ته د سفر سره به د کابل اؤ اسلام اباد تر منځ بې باورۍ ختمېدو کې لاس امداد وشي.

مولانا حامد الحق حقاني، نزدې دوه اوونۍ وړاندې د خيبر پښتونخوا د وزيراعلا سردار علي امين ګنډاپور، په کوربه‌توب اسلام آباد کې يوې مهمې غونډې ته تللی و.

ددغه غونډې پر مهال پرېکړه شوې وه چې د مولانا حامد الحق په مشرۍ به يو پلاوی کابل ته واستول شي.