د بلوچستان صوبې په هرنايي ضلعه کې د کولې يا سکرو د کانونو د خواريکښو په يو ګاډي چاودنه وشوه، چارواکي پېښه کې د 11 وژنه او شپږو ژوبلېده تاييدوي.
د هرنايي ضلعې مرستيال کمشنر حضرت ولي وي او اې ډيوه ته چاودنه او مرګ ژوبلې تاييد کړې، خو وی نه ويل چې مزدوران د کوم ځای دي.
هغه وويل، د کولې مزدوران په شاهرګه سيمه کې په يو پک اپ ګاډي کې روان وو، د سړک غاړې پروت ماين پرې چاودلی دی.
نوموړي زياته کړه، سمدستي امدادي ټيمونه د پېښې ځای ته رسېدلي، مړي او ژوبل ځايي روغتون ته منتقل کړل شوي، او ژوبل بیا کوټې ته منتقل کولی شي.
مرستيال کمشنر وويل، مزدوران د جمعې په ورځ رخصت وي، په ګاډي کې بازار ته روان وو، چاودنه پرې شوې ده.
خو نوموړي ونه ویل چې د چاودنې هدف هم دوی وو که بل څوک، هغه زياته کړه علاقه په ګېره کې اخستل شوې او د پېښې پلټنې پيل کړل شوي دي.
د بلوچستان صوبې هرنايي ضلعه د کوټې څخه څه دپاسه 150 کلوميټره لرې او په شاهرګه سیمه کې یې اکثره د کولې په کانونو کې پېښې کيږي.
دغلته نه يواځې د کولې په کانونو کې د خواريکښو د مړينو بلکې وخت په وخت وسله وال بريدونه او چاودنې هم شوي دي.
Forum