چیمپینز ټرافي: افغانستان له اسټریلیا ټاس ګټلی اؤ وړومبی بیټنګ کوي

د چمیپینز ټرافۍ د سیالیو په لړۍ کې نن د افغانستان اؤ اسټریلیا تر منځ د کېدونکې مهمې سیالۍ پچه افغانستان ګټلې اؤ وړومبی بیټنګ کوي.

نن د جمعې په ورځ د لاهور په قذافي اسټيډیم کې کېدونکي دا سیالي د افغانستان لپاره زیاته مهمه ده ځکه چې که افغانستان دا لوبه وګټي خو نیمه پاي لوبې یا سیمي فاینل ته لاره پېدا کوي اؤ که چرې سیالي اسټریلیا وګټله نو افغانستان به د سیمي فاینل له زغله بهر شي.

تر دې دوه ورځې وړاندې افغانستان د یوې سختې مقابلې په ترڅ کې انګلینډ ته په اتوؤ منډو ماتې ورکړې وه اؤ دغه لوبډله یې له ټورنامنټ ویستلې وه.

همدا شان اسټریلیا پخپله وړومبۍ لوبه کې انګلیند ته ماتې ورکړې وه.

دا د افغانستان دریمه د ګروپ سیالي ده چې د پاتې راتلو په صورت کې به پکې له ټورنامنټه بهر شي.

پاکستان کې د لوبو خبريال کرکټ پوهه محمود رياض وايي، "زما په حساب خو افغانستان چېمپينز ټرافي ګټلې، څنګه یې چې انګلېنډ ته ماتې ورکړې ده".

وي او اې ډیوه سره خبرو کې نوموړي وويل، "د اسټريليا لوبډله ډېره ښه ده، خو درې بالران ورسره نه دي راغلي، بل لور ته افغان لوبډله يو موټی لوبيږي، د پاکستان په ميدانونو خبر ده، بل مهمه خبره یې دا ده چې افغان لوبډله کوم هيواد ته ځي هلته کوربه مېنټور کوچ نيسي، نو دلته ورسره د پاکستان پخوانی ستوری لوبغاړی يونس خان کوچ دی".

هغه وويل، "د افغانستان ټول لوبغاړي هر يو په خپل خپل ځای لوبيږي، نن څه هم کېدی او د افغانستان لوبډله ګټه ترلاسه کولی شي".

يو بل خبريال کرکټ پوه فهيم پټېل وايي، د اسټریليا او افغانستان لوبډلې له دې وړاندې څلور ځله په يو ورځنيو سياليو کې مخامخ شوي، ټولې اسټريليا ګټلي، "خو که تاسو ته د 2023م نړيوال کپ نه هېرېدونکي سيالي ياده وي نو نن په دواړو کې يوه لوبډله غوره ګرځول به ګران کار وي".

پټېل زياته کړې، "د 2023م نړیوال کپ کې افغانستان لومړی بېټنګ کړی، 291 رنزونه یې جوړ کړي او په ځواب کې د اسټريليا اووه لوبغاړي په 91 رنزونو اوټ شوي خو بيا مېکسويل په يواځې سر 201 رنزونه جوړ کړي وو".

د نوموړي په خبره، "څنګه چې افغانستان د 2022 په ټي ټوينټي نړيوال کپ کې اسټريليا ته ماتې ورکړې عېن ممکن ده چې دغه کار په يوه ورځنۍ سيالۍ کې هم وشي که څه هم دا کار دومره اسان نه دی خو ناممکنه هیڅ هم نه دي"

د افغانستان لوبډله د چیمپینز ټرافۍ په ګروپ بي کې لوبېږي چې دې ګروپ کې کوربه پاکستان او بنګله دېش هم له ټورنامنټ وتلي، هند او نيوزي لېنډ سيمې فاينل ته رسېدلي دي.

(دې رپورټ کې ځېنې معلومات د ډیوه همکار فضل عزیز شامل کړي دي)