پاکستان کې د یوې تولې سرو زرو بیه تر درو لکو روپو اوښتې ده

پاکستان کې د سرو زرو بیعې په بره تللي اؤ ددغه هیواد په تاریخ کې په وړومبي ځل د یوې تولې سرو زرو بیه تر دریو لکو روپو هم اوښتې ده.

د سرو زرو د بیعو لوړېدو سره د کالو پترو یا د ګاڼو کاروباریان وایي چې کارونه یې په ټپه ولاړ دي اؤ هم عام خلک هم فریاد کوي چې اوس په ودونو ښادو کې د کالیو جوړولو له یا اخستلو توان نه لري.

د جمعې په ورځ د پاکستان سرکاري خبري شبکې اې پي پي پخپل رپورټ کې د زرګرانو د مرکزي اتحادیې له قوله ویلي چې د 24 قیراطه سرو زرو د یوې تولې بیه کې یو زر اؤ 346 روپو اضافه شوې اؤ دا اوس دریوؤ لکو اؤ 46 روپو ته رسېدلې ده.

همدا شان د 24 قېراطه د 10 ګرامه زرو بیه کې 1154 روپۍ اضافه شوې اؤ بیا یې دوه لکه ،57 زره اؤ 812 روپو ته رسېدلې ده.

د سرو زرو د کاروباریانو اتحادیې ویلي چې په نړیوال مارکیټ کې هم د سرو زرو د اونس په بیه کې 10 ډالره اضافه شوې اؤ نرخ یې 2 زره اؤ 869 ډالرو ته رسېدلی دی.

تر دې وړاندې په پینځمه فرورۍ هم د زرو زرو بیې یو ناڅاپه په بره تللې وې اؤ په یوه توله کې د 5 زره اؤ 300 روپو له اضافې وروسته ددې نرخ په وړومبي ځل دریوؤ لکو روپو ته ورنزې شوی ؤ.

د پېښور په اندر شېر بازار کې د سرو زرو یو کاروباري یا زرګر فضل واحد وي او اې ډیوه ته وایي د سرو زرو د بیو لوړېدو سره د هغوي روزګار د ختمېدو درشل ته ننوتی دی اؤ اوس ترې څوک د ودونو اؤ ښادیو لپاره کالي پتري نه اخلي.

هغه وایي د سرو زرو بیې چې د کله نه مخ په بره روانې شوې دي نو د دوي روزګار ورسره اغېزمن شوی اؤ حتی اوس ددې جوګه هم نه دي پاتې شوي چې په اندر شېر بازار کې د خپلو دوکانونو کرایانې اؤ یا هم د بجلۍ بٍلونه پرېکړي.

"مخکې خو سره زر ارزان وؤ خلکو به ودونو له د شلو،شلو تولو جوړولو ارډرونه راکول،اوس خو غږ مه کوه ،هر څه تباه دي،خلک اندر شېر بازار ته د راتلو پځای مینه بازار ته ځي اؤ ارټيفیشل کالي اخلي،ځکه چې سره اخستی نه شي"

د پېښور نعیم الله چې ټاکل شوې ده د فرورۍ میاشت کې خپله لور ودوي ، ډیوه ته وایي کالي پتري دومره ګران شوي دي چې د خپلې لور واده له یې د خپلې ښځې د زوړ کالي نه څه کالی په زرګر نوی کړو اؤ هغه به خپلې لور له ورکوي

"نه یې شو اخستی، په درې لکه روپۍ به یې د چا پلار واخلي،ښځې ته مې ویل چې دا خپلې دوه کړې لور له ورکړه، ګنې مانه خو پاتې ده"

نعیم الله وایي هغه په یوه سرکاري محکمه کې ملازم دی اؤ د میاشتې 82زره روپۍ تنخا اؤ الاونس اخلي چې په هغې کې په ګرانه د خپل کور ضروریات پوره کوي نو په داسې حال کې تصور هم نه شي کولی چې کالي پتري به جوړ کړي.