وزیراعلا ګنډا پور د کورمې انتظامیې ته په جګړه د بوختو خواؤ د مورچو نړولو امر کړی

د خېبر پښتونخوا په ناکراره قبایلي ضلعه کورمه کې د سولې د پرله پسې هڅو له ناکامېدو وروسته د صوبې وزیراعلا ښاغلي علي امین ګنډا پور پولیسو ته لارښوونه کړې چې په جګړه د بوختو خواو مورچې را ونړوي اؤ وسلې ترې باید خپله ولکه کې واخلي.

کورمه کې د څو ورځو د پرله پسې نښتو اؤ پکې له شوؤ وژنو وروسته د خالي - شنبې په ورځ کوهاټ کې د سیمې د مشرانو، حکومت اؤ انتظامیې تر منځ د لوړې کچې یوه جرګه شوې چې پکې د صوبې وزیراعلا علي امین ګنډا پور هم برخه اخستې ده.

مطبوعاتي رپورټونه وایي چې په کرمه کې د تېرو لسو ورځو نه په روانو فرقه ییزو نښتو کې لږ تر لږه 124 کسان وژل شوي اؤ 178نور ژوبل شوي دي.

د خېبر پښتونخوا صوبې د وزیراعلا د ویاند له مخې د کوهاټ په ترسره شوې جرګه کې کورمه کې د تاو تریخوالي په ختمولو اؤ د امن په ټینګښت ټینګار شوی دی.

ویاند وایي جرګې ته پخپله وینا کې وزیراعلا ګنډا پور ویلي دي چې حکومت یې سیمه کې د امن د ټینګښت لپاره تر هره حده تګ ته تیار دی.

په کورمه کې د روانو فرقه ییزه نښتو نه وروسته د صوبې په حکومت مطبوعاتو اؤ ټولنیزو رسنیو کې سختې نیوکې روانې دي چې کورمه کې د ولس په توهیدونکو وینو یې ځان ناجاڼه کړی اؤ ټول پام یې د خپل ګوند د مشر عمران خان راخلاصولو لپاره احتجاجونو ته ورکړی دی.

د وزیراعلا ویاند پخپل بیان کې ویلي چې وزیر اعلا چارواکو ته لارښونه کړې چې د امن د ټینګښت لپاره باید انتظامیه اؤ پولیس په سیمه کې په جګړه د بوختو خواؤ مورچې ونړوي اؤ د سیمې نه د بې کوره شوؤ خلکو پځای کولو لپاره دې ګامونه واخلي.

وزیراعلا لارښونه کړې چې په سمدستي توګه دې له فریقینو وسلې په ولکه کې واخستی اؤ د امن تر بحالۍ پورې دې دا وسلې انتظامیه د ځان سره د امانت په توګه وساتي.

همدا شان وزیراعلا ویلي چې کورمه کې کوم خلک د سوشل ميډیا له لارې د انتشار جوړولو هڅې کوي هغوي دې ګرفتار اؤ په ضد دې یې مقدمې درج کړل شي.

هغه ویلي د ولس له مرستې پرته په سیمه کې امن نه شي ټینګیدای اؤ باید په حکومت د ولس اعتماد پرځای کړل شي.

هغه په جګړه په بوختو خواؤ هم غږ کړی چې په سمدستي توګه باید اور وکړي اؤ د سولې په مخکینو تړونونو دې عمل وکړي.

په 21 م نومبر کورمه کې د مسافرو په ګاډو د وسله والو ډزو کې د 52 کسانو له وژل کېدو وروسته سیمه کې د شیعه ګانو او د سنيانو تر منځ فرقه ییزه نښتې پیل شوي چې تر دې مهاله پکې په لسګونو کسان وژل شوي اؤ ژوبل شوي دي.

د نومبر په 22مه دکوزې کورمې د عليزئ سيمې خلکو په بګن کې اوسېدونکو ځايي خلکو باندې يرغل کړی ؤ او په کې يې 35ؤ پورې کسان وژلي او د 100نه زيات یې ژوبل کړي وو.

د کورمې انتظاميه او ځايي خلک تاييدوي چې په دې پېښو کې د 200پورې دوکانونه په بګن کې سوځول شوي وو او 500نه زيات کورونو ته اورونه وراچول شوي وو.

د سیمې نه د خلکو بې کوره کېدل

د بګن اوسېدونکي وايي د 22نومبر د يرغل وروسته د بګن، اوچت، مندوري او بادشاه کوټ سيمو څخه څه 1000پورې کورنيو ټل، هنګو، کوهاټ او په لږ شمېر کې خلکو پېښور ته کډه کړې ده.

د ځايي انتظاميې چارواکو د کډه شوؤ خلکو د شمېر په اړه څه نه دي ويلي خو د کوزې کورمې اوسېدونکي وايي خلکو خپل کورونه پرېښودي او خوندي ځايونو ته يې ځانونه رسولي دي.

د راپورونو له مخې، تازه جګړې د جالمې، چادریوال او تالو کنج سیمو ترمنځ شوې دي.

پاکستاني مطبوعات د پولیسو له خولې وایي چې د کوزې اؤ بره کورمې په مختلفو سیمو کې د وقفې وقفې ډزې روانې دي اؤ په جګړه بوختو ډلو د یرغمل شویو کسانو او مړو تبادله هم کړې ده.

د سولې ناکامې هڅې

د نومبر په 24مه د شپې ناوخته د خېبرپښتونخوا حکومت وياند او د حکومتي جرګې مشري کوونکي بېرسټرمحمد علي سېف ويلي وؤ چې په کورمه کې يې د شيعاګانو او سنيانو مشرانو سره د جرګې کولو نه وروسته اووه ورځنی اوربند کړی دی.

خو د صوبایي حکومت د ویاند لخوا د اوربند له اعلان وروسته مطبوعاتو بیا هم سیمې نه د تازه نښتو رپورټونه ورکړل .

تر هغې وروسته د کورمې ډپټي کمشنر جاوېد الله مسید، قومي مشرانو او د پولیسو چارواکو هڅه وکړه چې د سپينو بیرغونو لاندې په جګړه ځپلو سیمو کې اوربند وکړي. خو په تازه نښتو کې د ډزو له امله دا هڅې هم بې پایلې شوې.

د کورمې ضلعې مرستيال کمشنر جاوېدالله مسيد د شورو، چهارشنبې، په ورځ وي او ای ډيوه ته ویلي وؤ په کورمه کې يې د شیعه او سني مسلمانانو ترمېنځ، يو ځل بيا د جرګې وروسته، د 10و ورځو لپاره اوربند پر ځای کړی دی.

په ورته وخت کې د کوزې کورمې اسسټنټ کمشنر حفیظ الرحمان، سپرنټنډنټ پولیس جهانزیب، او قومي مشرانو په بالیچ خېل، مارګنايي او خارکلي سیمو کې هم د اوربند لپاره هلې ځلې وکړې، خو جګړه لا هم روانه پاتې شوه.