د پښتونخوا اسمبلۍ یو ناساپي رابلل شوې غونډه د تېرو څو ورځو راھېسی دوام لری چې پکې د تحریک انصاف ګوند غړي وار په وار د اسلام اباد په سنجاني سیمه کې د تحریک انصاف له ترسره شوې جلسې وروسته په رامنځته شوي صورتحال او د خپل بندي مشر عمران خان په بند کې د ساتلو په اړہ قهرجنې ویناګانې کوي.
اپوزیشن ګوندونه وایي پکار دہ چې صوبایي حکومت او تحریک انصاف د خپل ګوند د مشر تر څنګ د صوبې امن او پریوتي معاشي وضعیت ته ھم پام وکړي.
د صوبایي اسمبلۍ دا غونډہ نن د جمعی په ورځ هم روانه دہ.
په اسمبلۍ کې د زیات په ورځ د مخالفو ډلو مشر ډاکټر عباد الله خان خپله وینا کې وویل په صوبه کې د امنیت خراب صورتحال او نورو پرمختیایي چارو نه د تحریک انصاف حکومت خو چا نه دی منعې کړی.
د هغه وینا وه "د ورځې ستاسو حکومت وي خو د ماښام وروستو بیا د بل چا حکومت وي، نن مونږ ټول سیاسی قوتونه که چرته خلکو ته ووایو چې تاسو بهر رااوځئ د امن پہ خاطر نو د اعتماد کمی دی سپیکر صېب خلک نه را اوځی او د امن پاڅون پہ نامه چې کومې جرګې دي هغوي چې غږ وکړي نو بیا د خلکو دومرہ ګڼه وي چې صرف سرونه ښکاري"
د اسمبلۍ د روانې غونډې نه مخکی مخالفو ګوندونو څلور وارې د صوبې د امنیت په وضعه د بحث کولو لپاره د اسمبلۍ د غونډی رابللو درخواست جمع کړی و خو حکومت د اپوزیشن په دغه خواست د اسمبلۍ اجلاس نه ؤ راغوښتی خو د پي ټي آي د اسلام اباد د سنګجاني له جلسې وروسته یې ناساپي د اسمبلۍ غونډہ را وبلله۔
د صوبې د اعلا تعلیم وزیر مینا خان اپریدي ایوان ته وویل”مونږ د ایین د سرغړونې خبرہ کوؤ، دوی وايي ستاسو کارکردګي دا دہ۔ مونږ وایو د ایین سرہ ودریدل پکار دي او دوی زمونږ په وزیرانو او وزیراعلا پوښتنې راپورته کوي"
د هغه وینا وه "مونږ به دا هر څه وکړو خو ړومبی ایین بچ کول ضروري دي، د کوم آیین لاندې چې مونږ په دې ایوان کې موجود یو، کوم آیین چې اسمبلۍ ته اختیار ورکوي، له ھغې وروستو به د حکومت په کارکردګۍ ھم خبرہ وکړو"
د مخالفو ګوندونو مشران دعوہ کوي چې تحریک انصاف ګوند د پښتونخوا اسمبلي او حکومت د خپلو ګوندي ګټو دپارہ کاروي او په داسې حال کې د صوبې مجموعي امنیتی او معاشي وضیعت د حکومت او اسمبلۍ په ترجیحاتو کې نه ښکاري۔
د باجوړ نه د صوبایي اسمبلۍ غړي نثار باز ډیوہ ته وویل”دلته اسمبلۍ کې په بدامنۍ بحث نه کيږي د سنجیدګۍ دپارہ پلاننګ نه کيږي چې دوی سنجیدہ شي، نہ د وفاقي حکومت سرہ د قبایلي اضلاع څہ غم شته او نه د صوبایي حکومت سرہ کوم غم شته، ځکہ چې قبایلي اضلاع کې ډير واقعات کیږي ھسې خو ټوله پښتونخوا کې د بدامنۍ تسلسل روان دی"
د زیات د ورځې په غونډه کې اپوزیشن او حکومت په یو بل سختې نیوکې کړي.
د اسمبلۍ سپیکر بابر سلیم سواتي ایوان ته وویل د حکومت کار جواب ورکول دي ، او دا چې په صوبه کې د صوبایي حکومت د واک نه ځینې برخې امنیتي ادارو ته د کومو صوبایی قوانینو، اختیار او شرایطو لاندې ورکړی شوي او پI ھغې د صوبې څومرہ مصارف کېږي؟
نوموړي وویل”کوم څیز چې ستاسو د واک لاندې دی هغې کې تاسو بدلون راوستی شئ، د صوبی ولس تاسو ته ووټ درکړی دی، د صوبې عوامو تاسو ته حکومت درکړی دی ،د مرکز قانون کې تاسو بدلون نه شئ راوستی ھیڅ خبرہ نه دہ خو د دې صوبې قانون خو ستاسو لاس کې دی کوم قانون که بدلول غواړي سهار یې راوړئ، دا ټول به ستاسو ملاتړ کوي دا څه خبرہ شوہ چې حکومت بہ ودریږي او پخپله بہ سوال کوي"
اپوزیشن ګوندونه او حکومتي ګوند تحریک انصاف د قامی اسمبلۍ د ودانۍ دننه په عامو جامو کې د پولیسو د چاپې پہ کشاله تر څه حدہ پہ یو دریځ ولاړ وؤ او دا یې په جمهوریت او د پارلیمان په خپلواکۍ ګزار وبللو خو څیړونکي د دواړو خواؤ د مشرانو په تقریرنو کې پراخه سیاسي اختلاف او یو بل تہ د زغم او برداشت کمی دغہ لږ یووالی د ولسي ګټو دپارہ بې معنې ګرځوي.
اپوزیشن ګوندونه وایي پښتونخوا اسمبلۍ کې د عمران خان په بند خبرې کیږي خو د صوبې په امن پکې بحث نه کیږي
پېښور (وي او ای ډیوه) —
1
Forum