د افغانستان د سوداګرۍ او صنایعو خونې چارواکو ویلي پاکستان ته د افغانستان د مالوچو صادرولو ته اجازه ورکړې شوې او په مالوچو بار شاوخوا ۱۷۰ موټرې، چې د تورخم په دواړو طرفونو کېله تیرو ۳۵ ورځو را په دیخوا ولاړې وې د پاکستان په لوري يې حرکت کړی.
د افغانستان د تجارانو د خصوصي ادارې سلاکار رحیم الدین اغا وي او ای ډیوې سره په خبرو کې ویلي، پاکستان ته د افغانستان د مالوچو د تلو اجازه د افغانستان او پاکستان د تجارانو او د سوداګرو د ګډو ادارو د هڅو له امله د پاکستان د اقتصاد شورا په غونډه کې دوه ورځې وړاندې شوې ده.
نوموړي ډیوه ته وایي: ٫٫ د پونبې تجارت د بیا پیل غوښتنه د دواړو هیوادونو تجارانو کوله او په پاکستان کې د فابریکو مالیکانو غوښتنه لرله چې د افغانستان پونبه باید پاکستان ته ورشي او وړمه ورځ د پاکستان د وزیرانو شورا دا فیصله وکړه چې د افغانستان مالوچوته یې اجازه ورکړه.٬٬
نوموړي د افغان تجارانو په استازیتوب د مالوچو تجارت د بیا پیل په تړاو د شوې پریکړې هرکلی کړی او زیاتوي په تورخم کې په مالوچو بار ایسار شوي موټرې د پاکستان په طرف خوځیدلي دي.
٫٫ له تیرو ۳۵ ورځو راهڅې د افغانستان په مالوچو بارموټرې دتورخم دواړو خواوو ته ولاړې وې او نن یې د پاکستان په طرف حرکت کړی دی. د دواړه هیوادونو تر مېنځه د پونبې تجارت د پخوا په شان یو وارې بیا پیل شو.٬٬
پاکستان ته د افغانستان پونبې یا مالوچو صادراتو ته اجازه په داسې حال کې ورکړل شوې چې د کابل او اسلام اباد ترمنځسیاسي اړیکې تر ډیره ترینګلي دي.
رحیم الدین اغا وايي د دواړو ګاونډیو هیوادونو ترمنځ د تجارت د سېوا کولو لپاره حکومتونه باید تجارت له سیاسته لرې وساتي.
٫٫ دپونبې له کرکیلې او تجارت سره د دواړو هیوادونو د فابریکو مالیکان، کرونډګر او سوداګر تړلي دي، په دواړو حکومتونو باندې غږ کوم چې د سیاسي اړیکو په خرابیدو سره هیڅ وخت تجارت ترخپل منفي اغیزلاندې را نه وړل شي او تجاران او صنعت کاران پریږدي چې خپل عادي تجارت جاري وساتي.٬٬
د افغانستان د سوداګرۍ خصوصي ادارې د معلوماتو له مخې د افغانستان او پاکستان ترمنځ دا مهال د سوداګرۍ کچه ډیره کمه شوې او د تجارت دا کچه په کال کې له ۵ ملیارد څخه یوملیارد ډالرو ته ټیټه شوې ده.
