د پاکستان وزيراعظم عمران خان ويلي غواړي چې په جنګ ځپلي افغانستان کې امن راشي.
د افغانستان سره په پوله د مومند قبایلي ضلعې په د غلنۍ کې د لوبو په مېدان کې يوې دستورې ته خپله وينا کې عمران خان وويل چې خدای دې وکړي چې د امریکا او د طالبانو ترمنځ د سولې لوظنامه کامیابه شي ځکه چې دا د دواړو هېوادونو د ولس په گټه ده.
عمران خان وویل په افغانستان کې د امن له امله به د دواړو هېوادونو ترمنځ تجارت وده ومومي او د خېبر پښتونخوا د نویو ضلعو او د افغانستان ولس به ترې اقتصادي گټې ترلاسه کړی شي.
عمران خان په خپله وينا کې د افغان اولسمشر ډاکټر اشرف غني د لوړي مراسمو او کورونا وايرس د خورېدو په اړه هېڅ ونه وېل.
خو پاکستاني وزیراعظم بیا د ټوېټر د لارې اشرف غني ته د صدارت سوگند په پورته کولو مبارکي او د افغانستان سره د همکارۍ ژمنه وکړه. "پاکستان به په سیمه کې د امن او ثبات دپاره هر ممکن کوښښ کوي."
افغان اولسمشر اشرف غني د گل، دوشنبې، په ورځ د صدارت د دویمې دورې سوګند په داسې حال کې پورته کړو چې د په صدارتي انتخاباتو کې د هغه حریف عبدالله عبدالله په متوازي دستوره کې لوړه وکړه.
د اشرف غني د سوگند پورته کولو په دستوره کې په افغانستان کې د امن دپاره د امریکې استازی زلمی خلیلزاد او په افغانستان کې د امریکايي ځواکونو مشر سکاټ مېلر هم شامل و. د نړۍ يو شمېر هېوادونو اشرف غني ته د مبارکۍ پېغام ورکړل.
د دې ترڅنګ په نړۍ کې د کورونا وايرس د خورېدو وروستو په پاکستان کې هم اووه کېسونه رپورټ شوي خو وزيراعظم عمران خان تر دې دمه د دې مرض د مخنيوي لپاره پورت شویو ګامونو په اړه په اولسي کچ کومه وينا نه ده کړې.
دې دستورې ته د خېبرپښتونخوا وزيراعلی محمود خان او د دفاع وزير پروېزخټک هم ويناوې وکړې.
دستورې ته په وينا کې د خېبرپښتونخوا وزيراعلی محمود خان وويل چې عمران خان د پخوانۍ قبايلي سيمې د اولس سره کوم لوظونه کړي وو، ټول يې پوره کړي. خاصه دارو ته يې د پوليس درجه ورکړه، عدالتي نظام يې هم غځولی. د احساس کفالت پروګرام پرانسته وشوه او د دې سيمو د پرمختيايي پروژو لپاره يې ۸۳ اربه روپۍ مختص کړې دي.
د ځايي خلکو په وينا چې دوی د وزيراعظم عمران خان د دورې نه ډېر اميدونه لرل خو له بده مرغه کوم لوی اعلانونه ونه شو
يو ځايي ځوان مراد افغان ډيوه ته وويل، د دوی امید و چې عمران خان به په دې دوره کې د کالجونو، پوهنتون د څانګې، د ورانو ودانيو د بيا ودانۍ او د ګورسل لارې د پرانستلو اعلانونه کوي خو دا ځل هم لکه تېر په شان د اولس سره يواځې وعدې وشوې.
