د کوټې مرستیال کمېشنر پښتو اکېډمي تړلې ده

د کوټې پښتو اکېډمۍ مشران وايي، د کوټې مرستيال کمېشنر، ډي سي په غېر قانونه توګه د پښتو اکېډمۍ تړلې، سيل کړې ده. مرستیال کمشنر د اکېډمۍ تړل منلي دي.

د کوټې پښتو اکېډمۍ جنرل سیکرټري نقيب احساس وي او اې ډيوه ته وويل، اکېډمي تړل شوې ده.

هغه وويل، "اکېډمۍ ته د بهر څخه مطالعه کوونکي ورتلل، د پښتو ريسرچ پکې نه کېدو، يواځې د بهر نه خلکو د ليبارټرۍ اسانتیاوې ترلاسه کولې، دا د اکېډمۍ لايبريرۍ ده، د پښتو ادب او ژبې د ريسرچ دپاره، خو دغو لوستونکو په دوه درې کاله کې د پښتو يو کتاب نه دی لوستلی".

نقيب احساس زياته کړه، "دا نزدې 20، 25 کسان وو چې لايبرېرۍ ته به ورتلل، اکېډمۍ دوی ته د وتلو دپاره د يوې نيمې میاشتې وخت ورکړی وو، چې اکېډمۍ سره ځای کم دی، اکېډمي ريسرچ پروجکېټونه شورو کوي، ځکه اکېډمۍ د دوی وتلو دا فيصله کړې وه".

د احساس په خبره، "په دغو کسانو کې دوه ورغلي ډي سي ته یې شکايت کړی او هغه بيا عمله رالېږلې او اکېډمي یې تړلې ده".

د کوټې مرستیال کمشنر لیفټننټ (ریټایرډ) سعد بن اسد د وي او اې ډیوه بارکوال مياخېل ته تاييد کړې، "د اکېډمۍ د لايبرېرۍ په اړه ورته شکایت شوی وو"، او زياته کړې یې ده د اکېډمۍ مشرانو د "پي ټي اېم مخکښ علي وزير وربللی وو".

خو د اکېډمۍ مشران دغه دعوه ردوي چې علي وزير یې نه وو وربللی، او علي وزير د تېرو شاوخوا اووه میاشتو راهسې بندي دی.

د کوټې پښتو اکېډمۍ پخوانی جنرل سيکرټري او غړی خليل باور وايي، د کوټې پښتو اکېډمي په 1971 کې جوړه شوې، دا ازاده خپلواکه اداره ده او صوبايي حکومت سره رجسټرډ ده.

وي او اې ډيوه سره خبرو کې هغه وویل، "د صوبې پرايمري اېجوکېشن د کال په سر اکېډمۍ ته فنډ ورکوي، ځکه چې دا يوه تعليمي اداره ده، د خواندګۍ شرحه سېوا کوي".

نوموړي د پښتو اکېډمۍ د هدف په اړه وويل، "بنيادي مقصد یې د پښتو ژبې او ادب دپاره کار کول دي، د تېرو څو کلونو راهسې هر دوه کاله وروسته نړیوال سيمينارونه کوي، د ليکوالانو، شاعرانو اديبانو کتابونه او ريسرچ مقالې چاپ کوي".

د خليل باور په وينا، "د پښتو اکېډمۍ جوړېدو په وخت چې کوم ايين جوړ کړل شوی او رجسټرېشن یې شوی، په هغې کې د کوټې، پشين کمېشنر د اکېډمۍ سرپرست اعلا جوړ کړل شوی، خو په 2022م کې اکېډمۍ پرېکړه کړې چې د کمېنشر سرپرستي یې ختمه کړې وه".