د بهرنۍ زرِمبادله په ذخیرو کې له بهترۍ سره سره د پاکستان مالي حالت خراب دی او د خزانې په اړه د قومي اسمبلۍ قایمه کمېټۍ ویلي، هیواد په راتلونکو څلورو کلونو کې 100 ارب ډالرو بهرنۍ مالي مرستې ته اړتیا لري.

د پاکستاني مطبوعاتو د رپوټونو له مخې له دې پرته هم پاکستان په راتلونکو درو کلونو کې د خپلو روانو اقتصادي ستونځو د حل کولو لپاره نورو 12 ارب ډالرو ته اړتیا لري.

پاکستان تمه لري چې د پیسو له نړیوالې ادارې ای ایم ایف څخه به د پور د پروګرام له مخې اووه ارب ډالر تر لاسه کړي او نورې پینځه اربه ډالره به د تجارتي بېنکونو او نورو مختلفو مالياتي ادارو له خوا ورکړل شي.

خو له دې سره سره بیا هم پاکستان په راتلونکو څو کلونو کې د چین، سعودي عرب او متحده عرب اماراتو په ګډون له مهم اتحادي ملکونو هم اضافي پورونو ته اړتیا ولري.

د قومي اسمبلۍ قایمه کمېټۍ ته ويل شوي وو چې په تېرو پینځو کلونو کې قرضې په اوسط ډول 14 فيصده زياتې شوې دي او له ای ایم ایف څخه د اووه ارب ډالرو مجوزه نوي بېل آوټ پیکج ترلاسه کولو باوجود هم د پاکستان بهرنۍ مالياتي ستونځې نه شي کمېدای.

د پاکستان د خزانې وزارت چارواکو د خپلې راتلونکې تګلارې په اړه قایمه کمېټۍ ته معلومات ورکړي. په غونډه كې د خزانې وفاقي وزير محمد اورنګزېب كمېټۍ ته د ای اېم اېف له خوا د اووه اربه ډالرو تجويز شوي بېل آوټ پېكیج د سختو شرطونو په اړه معلومات وركړي دي.

ښاغلي اورنګزېب یوه تګلاره په ګوته کړه چې د اضافي قرضونو تر لاسه کولو لپاره دوامداره هڅې په ګوته کوي چې د ای ایم ایف څخه د اټکل له مخې 12 ارب ډالر باید تر 2027 پورې ترلاسه شي. په دغو کې باید اووه ارب ډالر له ای ایم ایف څخه او پینځه ارب ډالر له نورو لارو او تجارتي بېنکونو باید واخیستل شي.

د پاکستان د خزانې وزیرِ مملکت علي پرویز ملک ویلي، د پاکستان د پور انتظام به ډېر مهم وي او وایي اړتیا ده چې په راتلونکو څلورو کلونو کې د 100 ارب ډالرو قرضې پرې کولو ستونځه حل شي او له دې سره سره به د چین، سعودي عرب او متحده عرب اماراتو پورونه هم په راتلونکو کلونو کې ورکړل شي.

د هېواد د بهرنۍ زرِمبادله ذخیرې له درې ارب ډالرو 9.5 ارب ډالرو ته لوړې شوې دي او دا یواځې د دوو میاشتو په ارزښت د درآمدتو یا وارداتو لپاره کافي دي.

د پاکستان مطبوعات وایي، که څه هم له پور څخه د جي ډي پي په تناسب کې له 75 فیصده څخه 65 فیصده ته کمی راغلی دی خو پر دې باوجود د ملک بهرنۍ کاته پر خپل ځای یا مستحکم نه ده.

د قایمه کمېټۍ غونډې ته دا هم ویل شوي چې په تیرو پینځو کلونو کې د حکومت قرضونه په اوسط ډول د کال 14 فیصده زیات شوي دي، چې په مالي کال 2020م کې ټول پورونه له 36 ټریلین یا کرب روپیو په مالي کال 2024م کې 71 ټریلین روپیو ته زیات شوي دي.

کمېټۍ ته ویل شوي چې په دې کې 66 فیصده داخلي او 34 فیصده بهرني پورونه دي. په تېرو پینځو کلونو کې د پورونو له کبله د جي ډي پي تناسب له 76.6 فیصده څخه 67.2 فیصده ته راټیټ شوی، چې دا په پینځو کلونو کې ترټولو ټیټه کچه ده.

پاکستان به په اوسنيو مالياتي ادایګیو کې په روان مالي کال کې ټولې 18.83 ارب ډالره بهرنۍ قرضې پرې کوي چې په هغوی کې تر 2029م کال پورې اضافي ادایګۍ هم ټاکل شوې دي.

ټاکل شوې چې پاکستان به په 2026م کې 9.23 ارب ډالره، په 2027م کې 8.71 ارب ډالره، په 2028م کې 7.68 ارب ډالره او په 2029م کال کې به 6.88 ارب ډالره قرضې پرې کوي.

له دغو قرضو سره سره د پاکستان حکومت هغه پیسې هم بیرته ورکوي چې له خپلو دوستو هیوادونو یې په تېرو څو کلونو کې اخیستې دي.

د مملکت په چارو کې د خزانې وزیر علي پرويز ملک کميټۍ ته دا هم وويل چې له اای ايم ايف څخه د اووه اربه ډالرو نوې قرضې د لومړي قسط له تر لاسه کولو شپږ مياشتې وروسته به د اقتصادي راهدارۍ لومړۍ جایزه ترسره کيږي.

د کميټۍ غړي عمر ايوب خان وويل د جيو پوليټيکل یا د ملک د سیاسي جغرافیایي حالاتو له امله کېدای شي روپۍ بیرته د ډالر په مقابل کې وغورځېږي او د تيلو بيې په راتلونکو ورځو کې زياتې شي. وایي نهه ارب ډالره بهرنۍ زېرمې یا زرِمبادله د راتلونکو حالاتو مخنیوی نه شي کولای.

حنا رباني کهر په غونډه کې د اوږدې مودې اقتصادي تګلارې پر نشتوالي اندېښنه ښکاره کړې چې وایي له امله یې د هېواد اقتصاد په دوامداره توګه په "ای سي یو" کې دی.

د خزانې وزارت چارواکو منلې چې د یوې پایداره اوږدمهاله اقتصادي تګلارې جوړولو لپاره هڅې روانې دي او د پاکستان په مالي حالت کې د استحکام پر اړتیا ټینګار کوي.

د امریکا ولسمشر جوبایډن ټینګار کړی چې د پاکستان او امریکا تر منځ دوامداره ملګرتیا د نړیوال او سیمه ییز ثبات لپاره مهمه ده .

څيړونکي وايي چې په سيمه کې د امنيتي وضعې په اړه چين انديښنې څرګندوي خو د ترهګرۍ ضد جګړه کې د پاکستان هغه ډول مرستې نه شي کولې څنګه چې امريکا کولی شي.

د صدر بايډن دا بيان په داسې حال کې مخې ته راغلی چې امريکا په يو کال کې په دويم ځل په هغو چینايي تحقيقي ادارو او کمپنیو بنديزونه لګولي چې د پاکستان بيلسټک ميزايل پروګرام د پاره په الاتو ورکولو تورن کړی شوي دي.

د امریکې له لوري په چینایي کمپینو اؤ تحقیقي ادارو د بندیزونو لګولو باجود څيړونکي بيا هم امريکا او پاکستان د ترهګرۍ ضد جګړه کې مهم ملګرې بولي.

پيښور پوهنتون کې د جرنلزم د څانګې استاز ډاکټر سید عرفان اشرف وي او اې ډیوه ته وایي که چرې پاکستان په معاشي توګه د نظامي مرستو له پلوه چین سره خپلې اړیکې په وړاندې بوځي نو امریکا به ورته خنډان راپورته کوي.

ډاکټر اشرف وایي د افغانستان له اړخه امریکا د پاکستان د پاليسيانو په تناظر کې مرستې هم کوي او د ترهګرۍ ضد جګړې په حواله امریکا به د پاکستان د پوځ اخلاقي ملاتړ کوي:

"خو که چرې پاکستان په معاشي توګه يا بيا د ملټري اکوپمنټ باندې چین سره اړيکې مخ په وړاندې بوځي نو امريکا به ورته د خنډ په توګه مخې ته راځي او په میزایل پروګرام باندې به بنديزونه برقراره ساتي".

درې ورځې وړاندې د امریکې د بهرنیو چارو د محکمې ویاند مېتیو میلر ویلي وو، "مونږ تل د پاکستان د بیلسټک میزایلي پروګرام مخالفت کړی او هم په دې پالیسۍ ولاړ یو".

پاکستان د خپلو بېلسټک میزایلو په اړه د امریکې وروستي بندیزونه جانبدارانه او په سیاسي مقصدونو ولاړ بللي دي.

په دې ورستيو کې په پاکستان کې ترهګریزو بریدونو چين هم اندېښمن کړی دی او ځينې څيړونکي په افغانستان او سيمه کې د نړیوالې ترهګرې ډلې داعش موجودګي هم د امریکا لپاره د انديښنې وړ ګرځوي.

د نړیوال چارو کارپوهه ډاکټر منور حسین ډیوه ته وایي "د ترهګرو ضد به د خفيه اطلاعاتو په بنياد محدود عمليات کول وي، او د امريکې، چين، ايران او د مينځنۍ اېشيا هېوادونو لخوا به په افغانستان فشار اچول وي چې د هغو ترهګرو خلاف ګامونه پورته کړي څوک چې د سيمې امنیت ګواښوي".

صدر بایډن د پاکستان او امریکا د همکارۍ ستاينه په داسې حال کړي چې د غير دولتي تنظيمونو رپورټونه وايي چې په پاکستان کې ترهګرۍ يو ځل بيا سر راپورته کړی او پاکستان پرله پسې په افغانستان کې د ټي ټي پي د شتون اؤ خوندي ځالو تورونه لګولي.

په افغانستان واکمنو طالبانو مدام دا تورونه رد کړي اؤ دریځ لري چې نه خو په افغانستان کې وسله والې ډلې شته اؤ نه څوک د افغانستان خاوره د بل هیواد په ضد کارولی شي.

د پاکستان پولیسو تېره اوونۍ د پولیو ضد کمپاین په مهال د پولیو په یوه ښځینه کارمنده شوي ډله ییز جنسي تیري کې ککړ یو مهم ملزم نیولی اؤ دوه نور ملزمان لا هم پولیسو ته په لاس نه دي ورغلي.

د زیارت یا پنجشنبې په ورځ د جنوبي سیند صوبې په جیکب اباد سیمه کې د پولیو په ډله کې شامله ښځینه کارمنده باندې د پولیو ضد کمپاین په مهال شوی دا جنسي برید د پولیو نه د خوندیتوب په کمپاین چلوونکو ډلو له شوؤ بریدونو څخه یو ناوړه برید ګڼل کیږي.

د پولیسو یو ځایي مشر محمد سیفل اې پي خبري ایجنسۍ ته ویلي د ډله ییز جنسي تیري سره مخ شوې مېرمنې پولیسو ته ویلي هغې جیکب اباد کې د یو کور دننه ماشوم ته د پولیو نه د خوندیتوب څاڅکي ورکول اؤ بیا روانه وه چې دریوؤ کسانو راونیوله اؤ د هغې عزت یې خراب کړو.

پولیس چارواکي سیفل ویلي چې په دغه پېښه کې د ککړ یو ملزم پېژندګلو د احمد جاکراني په نوم شوې چې هغه پولیسو شپه په شپه نیولی دی.

سیفل وایي پولیس اوس په پېښه کې د ککړو نورو دوؤ ملزمانو د ګرفتارۍ هڅې کوي.

د پولیو د مخینوي په ښځینه کارمنده له دې برید وروسته د پولیسو یو سیمه ییز مشر اؤ یو ضلعي منتظم د پولیو ورکرانو ته په زړه پورې امنیت ورکولو کې په ناکامۍ له خپلو دندو ګوښه کړل شوي دي.

په ښځینه کارمنده شوي دې جنسي برید زیاتره پاکستانیان حیران کړي دي ځکه چې پاکستان کې تر دې وړاندې داسې رقم بریدونه ډيره کم شوي دي حالانکې په ماضي کې هم د پولیو ضد کمپاینونو په مهال د ښځينه مامورینو د ځورونې شکایتونه مخې ته راغلي دي خو په کومه ماموره جنسي تېری نه دی شوی.

د سیند صوبایي حکومت ویلي په ښځینه ماموره د شوي جنسي تیري به بشپړ پلټنې کوي.

پولیسو د برید سره د مخ شوې مېرمنې مېړه هم پخپله ولکه کې اخستی چا چې له دې پېښې وروسته خپله ښځه له کوره ویستې وه اؤ په مبینه ډول یې هغې ته له دې امله د وژنو ګواښونه کړي وؤ چې د کورنۍ عزت ته یې ورله زیان رسولی دی.

د سیند حکومت ویاندې سعدیه جاوید ویلي چې په جنسي تیري کې ککړ نور کسان به هم زر ونیول شي.

هغې وویل د برید سره مخ شوې میرمنې ته تحفظ ورکوي اؤ حکومت دا خبره باوري کوي چې راتلونکي کې ټولو د پولیو ښځینه ورکرانو ته د پولیو ضد کمپاین په مهال زیات نه زیات امنیت ورکړي.

پاکستان کې اکثره د پولیو ضد مهم ډلې د بریدونو اؤ تشدد سره مخ کیږي اؤ وسله وال زیاتره د پولیو ډلو په حفاظت ماموره پولیسو باندې بریدونه کوي.

په پاکستان کې زیاتره خلک داسې د دروغو پروپېګنډې کوي چې ګنې د پولیو څاڅکي د مغرب سازش دی اؤ له دې لارې د ماشومانو د زیږون مخه نیول کیږي.

د جنورۍ نه تر اوسه پاکستان کې د پولیو 18 تازه پېښې مخې ته راغلي دي.

پاکستان اؤ افغانستان په نړۍ کې هغه یوازیني دوه هیوادونه دي چې تر اوسه پکې د پولیو ناروغي شته.

یادونه:- د رپوټ ډېر معلومات له اې پي خبري ایجنسۍ اخیستل شوي دي.

د پاکستان د قامي اسمبلۍ د سپیکر ایاز صادق له لوري چیف الیکشن کمشنر ته په لیکل شوي خط کې ویل شوي وؤ چې د الیکشن د ترمیمي ایکټ په اساس د یو ګوند سره خپل تړون ښودونکی ازاد امیدوار اوس خپل ګوند نه شي بېلولی.

د سپیکر لخوا چیف الیکشن کمشنر ته د لېږل شوي دې لیک نه وروسته اوس په قامي اسمبلۍ کې د ګوندونو پوزیشن یا د غړو شمېره هم بدله کړی شوې ده اؤ د تحریک انصاف 80 د قامي اسمبلۍ غړي د سني اتحاد کونسل غړي ګرځول شوي دي.

د جمعې په ورځ د قامي اسمبلۍ سیکرټریټ د ګوندونو نوی پوزیشن مخې ته راوړی چې هغې کې د پاکستان تحریک انصاف غړي د سني اتحاد کونسل غړي ښودل شوي دي.

د سپیکر په خط کې ویل شوي وؤ چې الیکشن کمیشن باید د روان کال د اګست په میاشت کې د پارلیمان نه منظورکړل شوي د الیکشن ترمیمي ایکټ لاندې د ځانګړو څوکیو په اړه پرېکړه وکړي.

خط کې ویل شوي چې د سپریم کورټ له اړخه د ځانګړو څوکیو په اړه د 12مې جولاي فیصله په الیکشن ایکټ کې له بدلونونو وړاندې وه ځکه نو اوس په هغې عمل درامد ممکن نه دی.

سپریم کورټ په 12مه جولاي خپله اورول شوې پرېکړه کې ویلي وؤ چې د انتخابي نخښنې د ختمېدو سره د کوم سیاسي ګوند په انتخاباتو کې د برخې اخستو حق نه ختمېږي.

سپریم کورټ ویلي وؤ چې پاکستان تحریک انصاف باید په 15ؤ ورځو کې د ځانګړو څوکیو په اړه فهرست جمع کړي.

د سپریم کورټ له 13 ججانو څخه اتوؤ ددې پرېکړې ملاتړ کړی ؤ اؤ پينځوؤ نورو ورسره اختلاف ښودلی ؤ.

په عین حال کې وزیراعظم اؤ وفاقي کابینې د سپریم کورټ ترمیمي پریکټۍ اینډ پروسیجر ارډیننس مظور کړی چې ورسره به د سپریم کورټ د چیف جسټس د مقدمو په ټاکلو کې واک سیوا شي.

د پاکستان د قانون وزارت تېره ورځ دغه ارډیننس وزیراعظم اؤ کابینې ته لېږلی ؤ چې له مخې به چیف جسټس،د سپریم کورټ سینیر جج اؤ د چیف جسټس لخوا مقر شوی جج د کیس یا مقدمې ټاکنه کوي.

تر دې وړاندې به د قانون له مخې چیف جسټس اؤ دوؤ سینیر ترین ججانو د مقدمو لپاره د بینچ ډټاکنه کوله.

د ترمیمي ارډیننس له مخې هره مقدمه به پخپل وار اورېدل کیږي اؤ که نه اورېدل کیږي نو بیا به یې علت ښودل کیږي، همدا شان هره مقدمه اؤ اپیل به ریکارډولی اؤ ټرانسکرپټ به یې تیارولی شي.

د ترمیمي ارډیننس له مخې د مقدمو ټول ریکارډنګ اؤ ټرانسکرپټ ته به د ولس لاسرسی وي.

د افغانستان سره په پوله پرتې د خېبرپښتونخوا جنوبي وزيرستان ضلعه کې د امنيتي ځواکونو په پوسته وسله وال بريد کې شپږ عسکر وژل شوي دي. تحریک طالبان پاکستان د بريد زمه واري منلې ده.

د پاکستان پوځ په رسمي خبر کې وویل، پرون په 19م ستمبر شمالي او جنوبي وزيرستان کې دوه ځايه د پوځ او ترهګرو ترمنځ نښتې شوي او د 12 وسله والو د وژلو یې ويلي دي، د پاکستان پوځ تحريک طالبان پاکستان په فتنه الخوارج ډله يادوي.

د پوځي بيان ترمخه، پرون د افغانستان سره په پوله د شمالي وزيرستان په سپين وام علاقه کې اووه ترهګر راوړېده، پوځ معلوم کړي، نښته یې ورسره شوې او اووه سره ترهګر یې وژلي دي.

د پاکستان پوځ چې کومو سيمو کې عمليات کوي هلته جرنلسټان يا مطبوعات رسايي نه لري، ځکه د ازادو سرچينو څخه د عملياتو په اړه تاييد نه کيږي.

پوځ د جنوبي وزيرستان د پېښې په اړه وویل، د جنوبي وزيرستان په لدها سیمه کې وسله والو [خوارجو] په امنيتي پوسته بريد کړی، د دوی بريد په شا تمبول شوی، پوځ ورته په زړورتيا ځواب ویلي، پينځه خوارج یې وژلي او او عسکر هم په نښته کې وژل شوي دي.

پوځ ویلي په علاقه کې د پاکۍ عمليات دوام لري.

له دې وړاندې د جنوبي وزيرستان نه امنیتي سرچينو وي او اې ډیوه ته تاييد کړې وه، چې دا بريد تېره شپه د بر جنوبي وزيرستان د لدها تحصيل په بوسپه کې پوسته باندې شوی وو.

بريد د شپږو عسکرو وژل کېدو او لسو نورو ژوبل شوي وو.

د سيمې نه ځايي خلکو وي او اې ډيوه ته ویلي، نن د ورځې په علاقه کې هيلي کاپټرې هم ليدل کیږي چې په هوا کې ګرځي.

د دوی په وينا وخت په وخت په علاقه کې د ډزو او درنو چاودنو غږونه هم اورېدل کېده.

د پاکستان د پوځ وياند لفټننټ جنرل احمد شريف چودري د روانې میاشتې په پينځمه نېټه ویلي وو، د روان کال په تيرو اتو میاشتو کې د ترهګرۍ ضد عملياتو کې د پوځ 193 افسران او عسکر وژل شوي دي.

د ترهګرۍ ضد عملياتو تفصيل یې ويلي چې"سږ کال په تيرو اتو میاشتو کې د استخباراتو په اساس د ترهګرۍ ضد 32,173 مختلف عملیات شوي او يواځې په تېره مياشت کې 4021 عمليات ترسره شوي، په تېره يوه میاشت کې د تحریک طالبان پاکستان 90 وسله وال وژل شوي دي".

هغه ويلي وو، "د ترهګرۍ ضد جګړه کې د پاکستان پوځ، پوليس او نورې قانون نافذونکې ادارې هره ورځ د 130 نه زيات عمليات کوي، او د اخري ترهګر د خاتمې پورې به جګړه روانه وي".