د پاکستان پوځ ويلي، د خېبرپښتونخوا په جنوبي ضلعه ډېره اسماعيل خان کې یې په دوه ځايونو کې عملیات کړي، اووه وسله وال يې وژلي دي.
پوځ پرون په 23مه فرورۍ ناوخته ويلي، د ډېره اسماعيل خان په درابڼ او مدې علاقو کې یې د استخباراتو په بنياد دغه عملیات کړي دي.
ويل شوي، امنيتي ځواکونو ته په درابڼ کې د وسله والو د موجودګۍ خبر وو، هلته یې عمليات کړي څلور خوارج یې وژلي دي. او بل د مدې په علاقه کې د وسله والو سره نښته شوې، درې خوارج وژل شوي دي.
د پاکستان پوځ تحریک طالبان پاکستان د خوارج په نوم يادوي.
پوځ د تېر په څېر دعوه کړې، د وژل شوو وسله والو څخه وسله ترلاسه کړل شوې او دوی په علاقه کې په ترهګرو بريدونو کې ککړ وو.
د پاکستان صدر اصف علي زرداري، وزيراعظم شهباز شریف او د کورنيو چارو وزير محسن نقوي د پوځ د عملياتو ستاينه کړې ده.
د پاکستان پوځ چې کومو سيمو کې عمليات کوي هلته جرنلسټان يا مطبوعات رسايي نه لري، ځکه د ازادو سرچينو څخه د عملياتو په اړه تاييد نه کيږي.
د خېبرپښتونخوا جنوبي او قبايلي ضلعو کې په وروستيو کې د ناامنۍ پېښې او په امنیتي ځواکونو بريدونه او ورسره د خلکو د تښتونو پېښې سېوا شوي دي.
د خېبرپښتونخوا ډېره اسماعيل خان ضلعه هم يوه د هغو ضلعو څخه ده چرته چې وخت په وخت د ناامنۍ پېښې کيږي.
ډېره اسماعيل خان د خېبرپښتونخوا د لکي مروت، ټانک او جنوبي وزيرستان، بلوچستان او پنجاب صوبو سره پولې لري.
Forum