د خېبر پښتونخواه په ناامنۍ کې ښکېل سیمه شمالي وزیرستان کې د امنیتي ځواکونو په قافله ځانمرګی برید شوی، چې پکې ۲ امنیتي اهلکار وژل شوي او د ۲ ولسي کسانو په ګډون نېزدې لس تنه ژوبل شوي دي.
د روغتون سرچینې وایي چې د ځینو ژوبل تنانو حالت مرګونی دی.
د شمالي وزیرستان پولیسو دا پېښه تایید کړې ده.
د یادې ضلعې د پولیسو د مشر دفتر چارواکو وویل، دا پېښه نن ماښام د میر علي تحصیل په عیدک سیمه کې رامینځ ته شوې، چرته چې د یو ځانمرګي برید کونکي د چاودیدونکو توکو ډک ګاډی د امنیتي ځواکونو قافلې ته، دننه کولو سره سم درنه چاودنه شوې ده.
دسیمې ځايي خلک وایي چې د چاودنې غږ ډېر قوي وو، چې د لرې پرتو سیمو پورې اورېدل شوی، او د نږدې کورونو دروازو او دیوالونو ته یې هم سخت زیانونه اړولي دی.
د میر علي تاڼې چارواکي وايي په برید کې د امنیتي ځواکونو دوه ډبل کیبن ګاډي بشپړ ډول زیانمن شوي، او د پوځ یوه زغرواله (اینټي ماین) ګاډي ته هم تاوان اوښتی. د پېښې وروسته، سیمه سمدستي د امنیتي ځواکونو له لوري په ګیره کې اخستل شوې او د لټون عملیات روان دي.
د دوی په وینا د مرګ ژوبلو کره مالومات نه لري او ژوبل تنان د میرعلي ایف سي قلعې پوځي روغتون ته وړل شوي دي.
د روغتون سرچینې وایي چې د ځینو ژوبلو حالت خطرناک دی.
امنیتي سرچینې وايي د برید وروسته په ټوله سیمه کې امنیتي تدابیر سخت شوي، او د بریدکونکو د سهولت کار د موندلو لپاره عملیات دوام لري. تر دې مهال کومې وسله والې ډلې مسؤلیت نه دی منلی.
په شمالي وزیرستان کې په دې وروستیو کې په امنیتي ځواکونو بریدونه زیات شوي
تېره اونۍ د فبررۍ په ۲۴مه شمالي وزیرستان کې د وسله والو په یو برید کې څلور امنیتي عسکر وژل شوي چې زمه داري یې تحریک طالبان پاکستان منلې وه.
یاده دې وي د پاکستان وزیراعظم شهباز شریف ويلي، ترهګري به له بېخه ختموي او دغه ناورين ته به داسې قبر وباسي چې بيا سر راپورته نه کړی شي.
د ډان نیوز د راپور له مخې، شهباز شریف په اسلامآباد کې د یوې غونډې پر مهال د خېبرپښتونخوا په اکوړي سیمه په دارالعلوم حقانیه کې د جمعې په ورځ د شوي ځانمرګي برید غندنه وکړه او ویې ویل چې په دې برید کې د مولانا حامدالحق او نورو پاکستانیانو وژنه د افسوس وړ ده.
Forum