کورمه کې وسله وال برید شوی، درې عسکر وژل شوي

د افغانستان سره په پوله پرتې د خېبرپښتونخوا ناارامه کورمه ضلعه کې په نيم پوځي ځواک وسله وال بريد شوی، د درېو عسکرو وژل کېدو او څو نورو ژوبلېدو ويل شوي دي.

اې اېف پي خبري ادارې ويلي، ياده پېښه پرون په نهم مارچ شوې او يو پوليس چارواکي پېښه کې د څلورو عسکرو د وژنې او اووه ژوبلېدو ويلي وو.

د ډان ورځپاڼې د خبر ترمخه، په مينځنۍ کورمه کې په ټکري چينارک سيمه کې وسله وال بریډ کې درې امنیتي عسکر وژل شوي دي.

ورځپاڼې د پوليس سرچینو له قوله دغه خبر ورکړی دی. خو چارواکو په رسمي توګه په دغې اړه څه نه دي ويلي.

کورمه کې د تېر کال اکتوبر د 12مې راهسې د شيعه او سنيانو ترمنځ نښتې شوې، د ټل، پاړاچنار لاره تړل شوې، او د بيا د 21م نومبر راهسې په بېلابيلو پېښو کې د 135 نه زيات کسان وژل شوي او 180 نور ژوبل شوي وو، له دغې وروسته چې د کورمې لاره تړل شوې، تراوسه پورې بنده پرته ده.

د کورمې د شخړې هواري لپاره د جنورۍ په وړومبۍ نېټه کوهاټ کې د حکومت په مرسته شوې جرګه کې دواړو ټولنو د امن تړون لاسليک کړی وو، د يادې جرګې وروسته نورې جرګې شوي، د لارې پرانستو، وسلې راټولولو او مورچو ړنګولو پرېکړې شوي خو بيا هم کورمې په تلونکو قافلو وسله وال بريدونه شوي او حکومت بيا د جنورۍ په وروستيو کې په کورمه کې د عملياتو پرېکړې کړې وه.

په 21مه فرورۍ د خیبر پښتونخوا چیف سیکرټري شهاب علي شاه ویلي وو، پولیسو او امنیتي ځواکونو په کوزه کورمه کې د انتها خوښو پرضد په روانو په عملیاتو کې تر دې دمه 48 مشکوک کسان نیولي دي.

نوموړي د صوبې د پولیسو مشر حمید ذوالفقار سره د کورمې د وضعیت ارزولو لپاره کوهاټ ته تللی او هلته یې د لوړې کچې په یوه غونډه کې ګډون کړی وو.

د سرکاري بیان له مخې دغه غونډه کې پرېکړه شوې چې د وروستیو بریدونو ذمه واران به وځپل شي، او د ترهګرۍ ضد عملیاتو ته به لا زور ورکړل شي.

له دغې وړاندې د خېبر پښتونخوا وزیر اعلا علي امين ګنډاپور ويلي وو، په کورمه کې شخړه د ځمکو په سر نه ده بلکې په دې کې بهرني قوتونه لاس لري او هغوى دلته فرقه ييزو نښتو له هوا ورکوي او وسلې رالېږي خو نوموړي نه وه واضحه کړې چې دغه بهرنیو قوتونو نه مطلب څوک دي؟.

کورمه کې د امنيت په اړه د خېبرپښتونخوا په حکومت سختې نيوکې کيږي چې په سيمه کې په امنیت ټينګولو کې پاتې راغلی دی.

په کوزه کورمه کې په بېلابيلو علاقو کې د عملياتو کولو ويل شوي خو د کوزې کورمې اوسېدونکي وايي، عمليات دې په مينځنۍ او بره کورمه کې وکړل شي.