په ترکي کې د یوې ډوبې شوې کښتۍ مړي له اوبو راایستل شوي او تر اوسه چې د ۲۴ کسانو پيژندګلوي شوې، نو معلومه شوې چې ټول دغه ۲۴ کسان افغانان و.
دا جهاز قریب یوه میاشت مخکې د ترکي په وان سیند کې غرق شوی و او له ډېر لټون وروسته یې د ۵۸ سورلیو مړي پیدا شوي او له اوبو راایستل شوي دي.
په انکارا کې د افغانستان سفارت چارواکو ویلي چې مړي ډېر وخت د اوبو لاندې پاته و او اوبو خراب کړي دي، نو ځکه د پېژندګلو کار یې آسانه ندی. خو سره له دې هم، د ۵۸ مړو له جملې نه چې د ۲۴ پېژندګلو شوې ده، نو ټوله یې افغان مهاجر ګڼل شوي دي. په جهاز کې ښایي اتیا کسان سپاره و، او د نورو مړیو د موندنې دپاره کار روان دی.
ویل کیږي چې د ترکي حکومت یو شمېر مړي چې حالت یې ډېر خراب و، په موقته توګه ښخ کړي دي. دا هم ویل کیږي چې په مړیو کې یو شمېر یې ماشومان دي.
د افغانستان د خارجه وزارت وایي چې کوشش کوي د مړو شویو افغان مهاجرو مړي کابل ته انتقال کړي.
ترکي کې ګڼ شمېر افغان کډوال اوسیږي او یو شمېر افغانان او د نورو هېوادونو شهریان د ترکي له لارې، په غېرقانوني ډول یورپ ته مهاجرت کوي. خو دا لاره ډېره خطرناکه ګڼل کیږي او وخت ناوخت د مهاجرو د غرقېدو خبرونه مخې ته راځي.
