په یوکرېن کې جنګ د ختمولو په اړه د امریکې او د یوکرېن مذاکرات په سعودي عرب کې شروع شول

په یوکرېن کې جنګ د ختمولو لارې چارې لټولو دپاره د امریکې او د یوکرېن چارواکو د نهې، سه شنبې، په ورځ په سعودي عرب کې خبرې اترې شروع کړې او توقعو ده چې روس سره جزوي ډزبندۍ دپاره به یوکرېن تجویز وړاندې کوي.

د یوکرېن په تجویز کې اوږدې فاصلې مزایل حملې ودرول او د تور سمندر په سیمه کې اور بند شامل دی.

د یوکرېن صدر ولادومېر زېلېنسکي د نهې، سه شنبې، د ورځ ملاقاتونو کې شریک نه و او د هغه د عملې مشر اندری یرمک، د یوکرېن خارجه وزیر اندری سېبها او د دفاع وزیر رستم عمروف او پوځي مشر پېلو پلیسا د زېلېنسکي په نمایندګۍ په مذاکراتو کې شرکت وکړو.

د مذاکراتو د شروع کېدو نه مخکې یرمک خبریالانو ته وویل یوکرېن د امن دپاره هر ګام اخیستلو ته تیار دی.
آیا یوکرېن د امنیت ضمانتونه غواړي؟ د دې پوښتنې په جواب کې یرمک هو وویل او زیاته يې کړه چې یوکرېن دا خبره یقیني کول غواړي چې روس جارحیت بیا تکرار نه کړي.

د امریکې خارجه وزیر مارکو روبیو او د قومي سلامتیا مشری مایک والټز د امریکايي پلاوي مشري وکړه. په سعودي عرب کې مذاکرات په داسې حال کې کېږي چې د امریکې صدر ډانلډ ټرمپ غواړي چې د یوکرېن جنګ دې زر ختم کړی شي.

روبیو د ګل، دوشنبې، په ورځ د دې امید اظهار وکړو چې یوکرېن سره په امریکايي امداد کې د ځنډ حل به زر راویستل شي.

روبیو وویل امریکا خبرې اورېدل او په دې څان پوهول غواړي چې یوکرېن په ممکنه توګه څه قسمه رعایتونه ورکولو ته تیار دی.

جدې ته د رسېدو نه مخکې روبیو په پوځي هوايي جهاز کې د خبریالانو سره د خبرو اترو په مهال وویل دا مهال چې هغه خبرې کوي نو یوکرېنیان استخباراتي معلومات ترلاسه کوي او په امداد کې د دمې حل موندل کېدی شي.

روبیو وویل ګوري به چې د یوکرېن دپاره څه قسمه مراعات ورکول ممکن دي. هغه زیاته کړه چې د جنګ پوځي حل نه شته او روس او یوکرېن دواړه به مشکل کارونه کوي.

د ګل، دوشنبې، په ورځ روبیو د سعودي عرب په ساحلي ښار جده کې د سعودي ولي عهد محمد بن سلمان سره ولیدل.
د دې نه مخکې محمد بن سلمان زېلېنسکي سره جدا ملاقات کړی و.

ټرمپ یوکرېن سره امداد دې خبرې سره مشروط کړی دی چې د امداد په بدل کې دې امریکا د یوکرېن نایابو قدرتي معدنیاتو ته لاس رسی ولري.

روبیو دا خبره واضحه کړه چې د نهې، سه شنبې، د ورځ د خبرو اترو توجو د یوکرېن په معدنیاتو نه ده.

روبیو د یوکرېن په موضوع د خبرو اترو په انتظام کې د برطانيی او د فرانس ستاینه هم وکړه.

د خارجه وزیر عهده د ترلاسه کولو وروسته سعودي عرب ته دا د روبیو دویمه دوره ده. هغه او روسي چارواکو د فېبرورۍ په ۱۸ نېټه په ریاض کې خبرې اترې کړې وې.

په سعودي عرب کې د خبرو اترو وروسته به روبیو د شورو، چهارشنبې، په ورځ د جي سېون تنظیم د خارجه وزیرانو په غونډه کې د شرکت دپاره کېنېډا ته ورځي.

یادونه: د دې خبر ځینې معلومات د ای پي، ای اېف پي او د روېټرز خبري ادارې نه اخیستل شوي دي