ملګري ملتونه په یوکرېن کې د جنګ په ضد د امریکې او د یوکرېن په قراردادونو نن ووټونه کوي

ملګري ملتونه په یوکرېن کې د جنګ د ختمولو دپاره د امریکې او د یوکرېن په قراردادونو د ګل، دوشنبې، په ورځ ووټونه کوي. یورپين یونین د دواړو قراردادونو حمایت کوي او په کې غوښتنه شوې چې په یوکرېن کې دې جنګ ختم کړی شي.

د ملګرو ملتونو جنرل اسمبلي به اول د یوکرېن او بیا د امریکې په قرارداد ووټونه کوي. د دې وروسته به د ملګرو ملتونو سېکیورټي کاونسل یا امنیتي شورا هم په یو قرارداد ووټونه کوي.

امریکې غوښتنه کړې چې په یوکرېن کې جنګ دې په سمدستي ډول ختم کړی شي او د یوکرېن او د روس ترمنځ دې مستقل امن قایم کړی شي.

د امریکې د قرارداد په مسوده کې په یوکرېن د روس د یرغل ذکر نه دی شوی چې د نن نه درې کاله مخکې ګل، دوشنبې، په ورځ شروع شوی و.

د امریکې خارجه وزیر مارکو روبیو د جمعې په ورځ وویل په قرارداد کې ويل شوي دا جګړه ډارونکي ده، ملګري ملتونه دا جنګ ختمولی شي او دا چې امن ممکن دی.

روبیو په یو بیان کې وویل دا یوه موقعه ده چې د امن په لوري تګ دپاره تحریک جوړ کړی شي.

د یوکرېن په زیات جامع قرارداد کې ويل شوی چې په یوکرېن د روس یرغل د دریو کلونو راهسې دوامداره دی چې نه یوازې د یوکرېن دپاره تباه کن اثرات لري بلکې د نورو سیمو او د نړیوال ثبات دپاره هم مضمرات لري.

د یوکرېن په قرارداد کې په تاوتریخوالي کې د کمي، جنګ د خاتمې او د شخړې د پرامنه حل غوښتنه شوې. په قرارداد کې دا مطالبه هم شوې چې جنګ دې سږ کال ختم کړی شي.

د یوکرېن په قرارداد کې غوښتنه شوې چې د یوکرېن په اړه د ملګرو ملتونو وړاندې منظور کړی شوي قراردادونه دې په مکمله توګه نافذ کړی شي. په دغو قراردادونو کې دا غوښتنه هم شوې چې روس دې په نړیواله کچه د یوکرېن د سرحدونو څخه خپل ځواکونه ستانه کړي.

په ملګرو ملتونو کې د یوکرېن په اړه ووټونه په داسې حال کې کېږي چې توقعو ده د فرانس صدر اېمېنوېل مېکران د امريکې د دوره په مهال د صدر ډانلډ ټرمپ سره د یوکرېن په اړه خبرې اترې وکړي.

مېکران تېره هفته وویل هغه اراده لري چې ټرمپ ته ووايي د روس صدر ولادېمير پوټن په ضد هغه د کمزورۍ اظهار نه شي کولی.

د برطانيي وزیراعظم کېیر سټارمر هم دا هفته د امریکې دوره کوي. هغه په دې خبره ټینګار کوي چې د امن په کوښښونو کې دې د یوکرېن د خودمختارۍ خیال وساتل شي.

یوکرېن سره د ملاتړ د اظهار دپاره د یورپین کمېشن صدرې اورسوله وا ډر لېن، د یورپین کاونسل صدر اېنټونیو کوسټا، د کېنېډې وزیراعظم جسټن ټروډو، د ډېنمارک وزیراعظم مېټ قرېډرېکسن او د سپېن وزیراعظم پېډو سانچېز د ګل، دوشنبې، په ورځ د کیف دوره وکړه.

بلخوا د ګل، دوشنبې، په ورځ جنګ هم دوام لرلو او روس وویل د یوکرېن هغه ۲۳ ډرونز يې تباه کړي چې تېره شپه يې په روس حمله کې استعمال کړي وو.

د یوکرېن پوځ د ګل، دوشنبې، په ورځ د روس هغه ۱۱۳ ډرونز راغوځولي دي روس پې تېره شپه په یوکرېن حمله کړې وه.
یادونه: د دې خبر ځینې معلومات د ای پي، ای اېف پي او د روېټرز خبري ادارې نه اخیستل شوي دي