امریکې او برطانيې د نهې- سه شنبې، په ورځ په رسمي توګه الزام ولګولو چې ایران روس ته په یوکرېن کې استعمال دپاره د نږدې فاصلې بېلېسټېک مېزایل ورکوي، دواړو ملکونو وویل داسې اقدامات به کوي چې ماسکو ته مېزایل په ورکولو کې ککړو خلکو ته سزا ورکړی شي.
د امریکې خارجه وزیر اېنټني بلېنکن برطانيې ته د سفر په مهال په لندن کې د برطانيي خارجه وزیر ډېوېډ لېمي ترڅنګ وېنا کې وویل د ایران په ضد د پابندیو اعلان به د نهې، سه شنبې، په ورځ وکړی شي.
بلېنکن وویل بېلېسټېک مېزایل روس ته رسېدلي دي او امکان دی چې په اینده هفتو کې به په یوکرېن کې د یوکرېنیانو خلاف استعمال کړی شي. هغه زیاته کړه چې روس ته د ایراني مزایلو رسد روسي ځواکونو ته دا صلاحیت ورکوي چې دغه وسله د جنګ د محاذ نه د لرې هدفونو په ضد استعمال کړي.
بلېنکن او لېمي به د شورو، چهارشنبې، په ورځ په شریکه د یوکرېن دوره کوي او د یوکرېن دفاع مضبوطولو په موضوع به د صدر ولادېمير زېلېنسکي او د نورو یوکرېني چارواکو سره خبرې کوي. روس کوښښ کوي چې د هېواد په کرسک سیمه کې د یوکرېن د پېش قدمۍ مخه ونېسي. یوکرېني ځواکونو په کرسک کې په سلګونو میله علاقه نیولې ده.
د امریکې صدر جوبایډن یوکرېن ته اجازت ورکړی دی چې د امریکې ورکړی شوي وسله په خپله دفاع کې په محدوده کچه علاقه کې د روس دننه استعمالولی شي. خو یوکرېن خپله وسله په روس کې دننه د هدفونو په ضد استعمالوي او د نهې، سه شنبې، په ورځ د یوکرېن په حملو کې د روس دننه د تر ماسکو پورې سیمې وویشتل شوې.
یوکرېن سره د ملاتړ د اظهار دپاره کییف ته د بلېنکن او لېمي د مشترکه سفر وروسته به د برطانيي وزیراعظم کېير سټارمرد جمعې په ورځ په وایټ هاوس کې د امریکې صدر جوبایډن سره ملاقات کوي چې په کې به د یوکرېن په مرسته هم خبرې کېږي.
روس ته د ایراني مېزایلو د انتقال په اړه خبرې د تېرې هفتې په اخېره کې مخې ته راغلې. د دې ترڅنګ داسې رپورټونه هم وویل د امریکې استخباراتي معلوماتو دې خبرې ته اشاره کوله چې روس ته د ایراني مېزایلو انتقال دوام لري.
لېمي روس ته د ایران د مزایل په ورکړی کېدو د تشویش اظهار وکړو او دا يې د تاوتریخوالي زیاتېدو وبلل.
ایران د دې خبرې تردید کړی چې روس ته په یوکرېن کې استمعال دپاره وسله ورکوي.
په متحده قومونو یا ملګرو ملتونو کې د ایران مېشن په یو وروستي بیان کې وویل ایران د یوکرېن په شخړه کې بوختو فريقېنو ته وسله ورکول غېر انساني کار ګڼي ځکه چې د دې له امله انساني تلفات زیاتېږي، بنیادي سهولتونه تباه کېږي او د جنګ بندۍ دپاره مذاکرات لرې کېږي.
د امریکې د استخباراتي ادارې سي ايي ای مشر وېلیم برنز چې د خالې، شنبې، په ورځ یې د برطانوي همکارانو په یو ځای وېنا کوله، د روس، چین، ایران او د شمالي کوریا زیاتېدونکي دفاعي تعلقات يې د تشویش وړ وبلل، او ویې وېل دا نه یوازې یوکرېن بلکې په منځني ختیځ کې د مغربي ملکونو اتحادیان هم د خطر سره مخامخ کوي.
وایټ هاوس وخت په وخت داسې استخباراتي معلومات شایع کړي چې ښایي شمالي کوریا په یوکرېن کې د استعمال دپاره روس ته ګوله بارود او مېزایلې ورکړې دي او تهران ماسکو ته حمله کوونکي ډرون ورکړي او روس سره يې د ډرون کارخانه په جوړولو کې مرسته کړې ده.
Forum