د امریکا او روس لوړ پوړو چارواکو د نهې، سه شنبې په ورځ سعودي عرب کې د دوه اړخيزه اړيکو او اوکراين او روس ترمنځ جګړې په سر خبرو دپاره ليدنې پيل کړي دي.
د دواړو خواو د ليدنو څخه تمه کيږي، چې دا خبرې لومړی قدم دی، او د دې لارې به د صدر ډانلډ ټرمپ او صدر ولاديمير پيوټن ترمنځ نېغ په نېغه خبرو ته چوکاټ برابر شي.
د امریکې د بهرنيو چارو وزير مارکو روبيو د امريکايي پلاوي مشري کوي، هغه سره د ملي امنيت سلاکار مايک وېلټز او د مينځني ختيځ استازی سټيو ويکووف هم مل دي.
د روس لخوا د بهرنیو چارو وزیر سرګۍ لاروف او د پيوټن لوړ پوړی مرستيال يوري اوشاکوف پلاوي کې شامل دي.
د اوکراين مشران دغو خبرو ته نه دي بلل شوي.
د اوکراين صدر ولاديمير زېلنسکي به د شورو، چارشنبې په ورځ د اوکراين دپاره د امریکې د استازي کېت کيلوګ کوربه وي.
د امریکې او روس اړيکو او لیدنو په يورپي مشرانو کې اندېښنه راپارولې او ويلي يې دي، د اوکراين د راتلونکې په اړه خبرو کې اوکراين شاملول پکار وو، او يورپي هيوادونو له په کې کردار پکار وو کوم ته چې دوی د خپل امنيت په لړ کې د پرمختګ په نظر ګوري.
د فرانس صدر ايمانويل مېکرون په دغه لړ کې پېرس کې د يورپي مشرانو غونډه بللې ده.
Forum