یوې امریکایي ورځپاڼې خبر ورکړی چې د امریکا هوایي ځواک په تیرو څو کلونو کې، خوا او شا ۴٠ هاموي گاډي په افغانستان کې ویجاړ کړي، او دا هغه گاډي و چې امریکې پخپله، د افغانستان پوځ ته ورکړي و، خو وروسته د طالبانو په لاس کې لویدلي و.
یو اېس اې ټوډې اخبار لیکلي چې دا معلومات ورته په افغانستان کې د میشت بهرني پوځي ائتلاف چارواکو ورکړي دي.
ورځپاڼه زیاتوي چې طالبان په وار وار د افغانستان په بیلابیلو برخو کې د افغان ځواکونو پر پوستو حملې کړي او بیا یې له هغو پوستو نه امریکایي وسلې، پوځي تجهیزات، او د هاموې په شان گاډي له ځانه سره وړي دي. وروسته بیا په هماغو وسلو او گاډو یې نورې حملې کړي دي.
خو د افغانستان د دفاع وزارت یو ویاند، جنرل محمد رادمنش، امریکا غږ ـ ډیوه ته وویل چې کله طالبان په کوم برید کې له افغان ځواکونو وسلې او مهمات یوسي، نو افغان ځواکونه بیرته پر هغو حمله کوي، هغه له لاسه وتلې وسلې، گاډي، او مهمات، بیرته ترلاسه کوي او که یې ونشو کړای، نو پرې بمباري کوي او په بشپړه توگه یې له منځه وړي، خو دا نه پرېږدي چې طالبان ترې گټه واخلي.
جنرل رادمنش دا هم وویل چې افغان ځواکونو په دغسې متقابلو بریدونو کې، د طالبانو زیاتې وسلې او مهمات ترلاسه کړي او یا له منځه وړي دي.
د ائتلاف ځواکونو چارواکي هم وایي چې که په ځمکنیو بریدونو کې له لاسه وتلي تجهیزات بیرته لاسته ورنشي، نو بیا یې په هوایي بریدونو ویجاړوي. د یو اېس اې ټوډې ورځپاڼې په حواله، د ٢٠١٥ له جنوري نه تر اوسه ۴٠ هاموې گاډي چې د طالبانو سره و، د امریکې په هوایي بریدونو کې تباه شوي دي.
تندلاري چې امریکایي وسلې، مهمات، او گاډي قبضه کوي، نو نه یوازې دا چې په هغه سره یې قوت زیاتیږي، بلکې کولای شي د هغو نه په گټه اخیستلو، ځان د امریکایي یا افغان ځواکونو په شکل جوړ کړي او د بریدونو د ترسره کولو په خاطر، د تلاشي له پوستو هم تیر شي.
د ٢٠٠٥ کال راپدیخوا، امریکې افغان ځواکونو ته ٩٥ زره پوځي گاډي اخیستي دي، او هر هاموې گاډی، د امریکې حکومت ته کابو ٧٠ زره ډالره تمامیږي.
د امریکې د دفاع وزارت یو څارگر وایي چې د دغو گاډو حساب اوس د ائتلاف ځواکونو سره نشته. خو د افغانستان د دفاع وزارت ویاند امریکا غږ ـ ډیوه ته وویل چې د دوی سره د هرې مرمۍ او هرې وسلې او گاډي حساب شته.
