د افغانستان یو لوړپوړی پلاوی د دې هېواد د تجارت د مرستیالې وزیرې په مشرۍ اسلام اباد ته تللی او هلته یې له پاکستاني چارواکو سره پر دوه اړخیز تجارت، افغان ټرانزټ او د تجارت په مخ کې د پرتو خنډونو پر حل خبرې کړې دي.
په افغان پلاوي کې د تجارت د مرستیالې وزیرې کاملې صدیقي په شمول د افغانستان د مالیې وزارت د ګمرکونو او محصولاتو د چارو مرستیال نجیب وردګ او نور لوړپوړي چارواکي شامل دي.
په اسلام اباد کې افغان سفیر ډاکټر عمر زاخېلوال پر ټویټر لیکلي، چې نن یې په یوه غونډه کې له ورغلي افغان پلاوي او پاکستاني تاجرانو سره خبرې کړې دي:
"د افغان پلاوي په موجودګۍ کې مو له افغان او پاکستاني تاجرانو سره ولیدل، په دوه اړخیز تجارت او ټرانزټ کې پراته خنډونه مو وڅېړل او په اسلام اباد کې مو د دغو مسایلو په اړه پر روانو رسمي خبرو بحث وکړ".
Met Pak-Afghan traders in presence of an official Afghan delegation comprising deputy ministers of Finance, Commerce & Agriculture & Head of Afghan Chamber of Commerce. Discussed currant impediments to bilateral trade & transit & ongoing official talks in Islamabad on the issues. pic.twitter.com/DwKb0CxuwO
— Dr Omar Zakhilwal (@DrOmarZakhilwal) May 9, 2018
په اسلام اباد کې د افغان سفیر مرستیال زردشت شمس پر ټویټر لیکلي، چې افغان پلاوي د نهې- سه شنبې په ورځ د پاکستان د ګمرکونو او محصولاتو د وزارت له لوړپوړو چارواکو سره ولیدل او دواړو غاړو له دوه اړخیز تجارت او ټرانزټ سره د مرستې ژمنه وکړه:
"د پاکستان د محصولاتو د مرکزي ادارې له مشر، غړو او نورو چارواکو سره مو ګټورې او له معنا ډکه ناسته وشوه او پر ټولو ستونځو او مسایلو په تفصیل سره بحث وشو او د حل لاره یې وسنجول شوه".
افغان پلاوي د شورو- چارشنبې په ورځ په اسلام اباد کې د پاکستان د ملي امنیت له سلاکار ناصر خان جنجوعه او د سوداګرۍ له وزیر پروېز ملک سره هم لیدلي او دواړو غاړو پر دې موافقه کړې چې نور باید دوه اړخیز تجارت له سیاسته بېل وساتي او د کاروبار لړۍ ته دوام ورکړي.
AFG delegation led by Dy Min Kamila Sidiqi & Dy Min Najib Wardak met with Pak Sec Commerce Mr.Dagha & other officials to discuss &resolve existing impediments in transit trade. The meeting was in positive spirit& both sides agreed to facilitate & address issues of Af-Pak traders. pic.twitter.com/gpGEuXiyiw
— Zardasht Shams 🇦🇫 (@shamszardasht) May 8, 2018
د وي.او.اې اردو د رپوټ له مخې ناصر جنجوعه افغان پلاوي ته باور ورکړی، چې پاکستان به د تجارت د ودې او ښه کېدو په برخه کې ورسره هیڅ ډول مرستې نه سپموي.
زردشت شمس لیکلي چې په دې ناسته کې هم دواړو لوړپوړو پاکستاني چارواکو ورسره ژمنه وکړه، چې له افغانستان سره د تجارت او ټرانزټ په برخه کې به ټول خنډونه له منځه یوسي.
د افغانستان د تجارت او مالیې وزارت تر دغه لوړپوړي پلاوي مخکې په تېرو دوو میاشتو کې د افغانستان نورو حکومتي او پوځي چارواکو هم پاکستان ته سفرونه کړي او په بدل کې یې د پاکستان د پوځ د مشر او وزیراعظم شاهد خاقان عباسي په شمول پاکستاني چارواکي هم کابل ته تللي او دواړه هېوادونه د خپلو خرابو اړیکو د ښه کولو په هڅه کې دي.