د پاکستان ولسمشر ويلي په افغانستان کې اوربند د سيمه ييزې سولې دپاره مثبته نښه ده او په افغانستان کې سوله او ثبات زمونږ ګډ هدف دی.
د پاکستان ولسمشر ممنون حسېن نن د يکشنبې، اتوار په ورځ په چين کې د شنګهايي همکارۍ غونډې ته په وېنا کې ويلي، پاکستان د افغانستان د سولې په اړوند خپل رول لوبوي.
نوموړي ولسمشر وويل پاکستان او افغانستان په افغانستان کې د سولې راوستو دپاره په دوه اړخيزه جامع تګلاره کار کوي.
افغان ولسمشر اشرف غني د زيارت، پنجشنبې په ورځ د روژې د ۲۷م نه د وړوکي اختر د پينځمې پورې د يو اړخيز اوربند اعلان کړی ؤ.
او طالبانو د خالي، د شنبې په ورځ د اختر په درېو ورځو کې دافغان ځواکونو په ضد د اوربند اعلان کړی دی.
افغان ولسمشر د طالبانو د اوربند د اعلان په غبرګون کې ويلي، مونږ نه يوازې د دې بلکې د هر هغه اقدام چې د وينې د بهېدو مخنيوی کوي، هر کلی کوو.
نوموړي ويلي ، همدارنګه زه له نړيوالې ټولنې، په ځانګړي ډول د آمريکا د متحدو ايالتونو، د بريتانيې له دولت، اروپايي ټولنې او د اسلامي کنفرانس سازمان څخه هم مننه کوم چې زمونږ له اوربند څخه يې ملاتړ کړی دی.
دوه ورځې امریکا په پاکستان غږ کړی ؤ چې د افغان دولت او طالبانو ترمنځ د سولې په خبرو کې مرسته وکړي.
د امریکا د ملي امنیت په شورا کې د جنوبي او مرکزي اسیا د څانګې یوې لوړ پوړې مشرې لیزا کرټېس د زیارت یا پنجشنبې په ورځ یو سیمینار ته په وینا کې د دواړو هېوادونو ترمنځ د وروستیو خبرو په اړه وویل، چې امریکا د افغان سولې لپاره په هر اړخیز ډول هلې ځلې کوي.
"مونږ د سولې په بهیر کې د پاکستان د مرستې غوښتنه وکړه او مونږ د پاکستان په بنیادي امنیتي اندېښنو باندې هم پوهېږو او دا باید باوري شي چې د سولې په هر ډول بهیر کې دې د دوی ګټې هم په نظر کې ونیول شي".
اغلې کرټېس وړاندې وویل، د پاکستان ګټې په افغانستان کې د طالبانو له بیا راپورته کېدو سره نه ترلاسه کېږي.
د پاکستان د بهرنیو چارو د دفتر وياند ويلي يواځې فريقېن په افغانستان کې سوله او ثبات راوستی شي.
ډاکټر محمدفېصل ويلي د پاکستان په خپله د افغانانو په مشرۍ په سولې په اړوند د وروستيو ګامونو بشپړ ملاتړ کوي.
نوموړي د افغانانو وروڼو او خوېندو دپاره د روژې په میاشت او بيا په اخترکې د سولې او خوشحالۍ څرګندونه کړې ده.
د پاکستاني رسنيو ترمخه سبا د دوشنبې، ګل په ورځ د افغانستان پوځي او استخباراتي چارواکي د پاکستان سفر کوي او او د نهې، سه شنبې په ورځ به د پاکستان د پوځ مشر جنرال قمرجاوېد باجوه د کابل سفر کوي او افغان ولسمشر اشرف غني سره به ويني.