د ترهګرۍ د مالي مرستو او د پېسو په غېرقانوني لېږد د څار دنړیوالې ادارې ایف ای ټي ایف په پېرس کې د روانې غونډې په پائ کې به پرېکړه کېږي چې ایا د پاکستان نوم د ادارې د خړ فهرست څخه وويستل او که نه؟
د پاکستان چارواکي هيله لري چې د ترهګرۍ د مالي سرچينو وچولو او پېسو د غېرقانوني لېږد د مخنیوي په برخه کې د پاکستان وروستيو ګامونو ته په کتلو سره ویلی شي چې د پاکستان نوم به د زياتې څارنې یا خړ نوملړ څخه وویستل شي.
سږکال دجون میاشت کې په يوه غونډه کې ايف ای ټي اېف پرېکړه کړې وه چې پاکستان به تر هغې د ادارې په خړ فهرست کې ساتل کېږي ترڅو چې د ايف ای ټي اېف تکنيکي ډلې د ترهګرۍ د مالي مرستو او پېسو د غېرقانوني لېږد د مخنیوي په برخه کې د پاکستان لخوا د پورته کړل شوؤ اقداماتو په موقعه جاج نه وي اخستی او ددغو ګامونو پخلی یې نه وي کړی.
د فنانشنل اېکشن ټاسک فورس تکنيکي ډلې د تېر ستمبر په مياشت کې د پاکستان سفر کړی ؤ او دغلته یې د اړونده چارواکو سره ليدل کړي وو او د پاکستان د ګامونو یې له نزدې ارزونه کړې وه.
تېره میاشت د پاکستان د بهرنیو چارو وزارت وېلي وو چې د ايف ای ټي اېف تکنيکي ډلې د پاکستان کاميابه دوره کړې او اسلام اباد تمه لري چې د اکتوبر په میاشت کې د ارزونې د عمل به منطقي نتيجې راوځي.
د اقتصادي چارو کارپوهان وايي که چيرې دپاکستان نوم د څار د ادارې د خړ نوملړ څخه وويستل شي نو ددغه هېواد شهرت او انځور به په نړيواله کچه وده ترلاسه کړي خو ځینې پوهان د پاکستان د اقتصاد اوسني بد وضعیت ته په کتلو سره وايي دا به د هېواد اقتصاد لپاره ګټې ونه لري.
اسلام اباد کې د اقتصادي چارو دڅېړنيزې ادارې پاکستان انسټیټیوټ اف ډوېلپمنټ اکنامک تجزیه کار شاهد محمود ډيوه سره خبرو کې وويل که چيرې د پاکستان نوم د ایف ای ټي ایف د خړ فهرست نه وويستل شي نو په پاکستان به د نړیوال سرمايه کارانو باور پرځاي شي.
ښاغلی شاهد محمود وايي نن سبا چې د پاکستان کوم حالات دي نو که د خړ فهرست څخه وځي هم خو د هېواد په اقتصاد به دا ګام څه اثر ونه لري.
هغه وایي د پاکستان بانډونه په نړيواله کچه څوک نه اخلي او چا چې اخستې دي هغوي یې هم د ارزښت نه لرلو له کبله خرڅوي.
دی وايي که په راتلونکي کې د پاکستان اقتصادي حالت ښه شي او په خړ فهرست کې نه وي نو بيا کېدای شي چې نړیوال سرمایه ګذاران دلته پانګونې ته توجو وکړي.
د فرانس سرښار پيرس کې د سنګا پور په مشرۍ د ايف ای ټي ایف د دوه ورځڼې غوندې نن د جمعې په ورځ وروستۍ ناسته ده او د غونډې په اېجنډا کې په نورو مساېلو د غور ترڅنګ به د ترهګرۍ د مالي مرستو او پېسو د غېرقانوني ترسيل د مخنیوي په لړ کې د پاکستان د پورته کړو ګامونو جاج اخلي او ددې د ارزونې په رڼا کې به پرېکړه کوي چې د پاکستان نوم د ترهګرۍ د مالي مرستو او پېسو د غېرقانوني ترسيل د څار خړ فهرست څخه وباسي او که نه.
پاکستان کال 2018 کې د ترهګرۍ د مالي سرچينو وچولو او پېسو د غېرقانوني لېږد د مخنیوي په تګلاره کې د نيمګړتيا و په تور کې د څارنې په خړ فهرست کې اچول شوی و او اداري په دې اړه پاکستان ته دوه غبرګ کاريز پلانونه ورکړي وو.
د انګرېزې ژبې ورځپاڼه اېکسپرېس ټريبيون پخپل رپورټ کې ليکي چې که د پاکستان په حکومت او سفارتي ټولنه کې د سرچينو په خبره باور وکړی شي نو احتمال شته چې پاکستان به د ايف ای ټي اېف د خړ فهرست نه وويستل شي.
که څه هم ځینې څېړونکي وايي چې د خړ نوملړ څخه وتل به د پاکستان په پرځېدلي اقتصاد په مجموعي توګه کوم اغېز ونه کړي خو وايي دې سره به په نړيوال کچ پاکستان څخه د تلونکو او راتلونکو پېسو د عمل څارنه او کره کتنه کمه شي.
د اقتصادي چارو خبریال طاهر امين ډيوه ته وایي پاکستاني چارواکي اټکل کوي چې د هېواد د ايف ای ټي ایف د خړ فهرست څخه د وتلو 95 فيصده امکانات دي او دا ځکه چې پاکستان د ايف ای ټي ایف په ټولو سپارښتنو بشپړ عمل کړی دی.
نوموړی وايي د پاکستان د ايف ای ټي ایف د خړ فهرست څخه د وتلو زياتې ګټې دي. دا به نړیوالو پانګه والو ته يو مثبت پېغام ورکړي او ددې ترڅنګ تمه ده چې د درجه بندۍ اېجنسۍ به هم
د پاکستان درجه بندۍ ته بيا کتنه وکړي.
ښکاره دې وى چې کال 2017 او کال 2022 کې د امریکا د مالي چارو رېګولېټري ادارې د پېسو د غېرقانوني لېږد د قانون د سرغړونو په تور کې د پاکستان په دوؤ لويو بېنکونو حبيب بنک او نېشنل بنک اف پاکستان په ترتيب ؤار ډول د 225 او 55 مېليونه ډالرو جرمانې لګولې وې.