افغانستان کې د واکمنو طالبانو اسلام اباد کې سفارتخانې ويلي، د طالبانو سفير او خېبرپښتونخوا حکومتي وياند په دوه اړخيزه اړيکو او ګډو چېنلجونو د مخنیوي په موضوعاتو غږېدلي دي.
د طالبانو سفارتخانې ويلي، بېرسټر سېف سره د پلاوي د طالبانو سفير سردار احمد شکېب سره ليدلي، او د ليدنې ويډيو یې په اېکس خپره کړې ده.
سفارتخانې ويلي، ليدنه کې د پاکستان او افغانستان په دوه اړخيزه اړيکو، د دواړو هيوادونو د خلکو ترمنځ اړيکو پياوړي کولو، دوه اړخيزه تجارت، د ګډو چېلنجونو د مخنيوي دپاره د توان په لټون، او دواړو هيوادونو د سياسي او بااثره شخصيتونو په کچه خبرو په موضوعاتو بحث شوی دی.
بېرسټر سېف په خپله د دغه ليدنې په اړه څه نه دي ويلي، خو پاکستاني مطبوعاتو ويلي، بېرسټر سېف د طالبانو د مشرتابه دپاره د عمران خان پېغام رسولی دی. خو د پېغام کوم تفصيل نه دی ویل شوی.
ویل شوي، سېف ويلي، د قبايلي او سياسي مشرانو او علماو پلاوی افغانستان ته لېږل غواړي، او دواړو هيوادونو ترمنځ دوستانه اړيکو ته لېواله دي.
بېرسټر سېف د طالبانو د سفير سره په داسې وخت کې ليدلي، چې په 30مه جنورۍ نوموړي افغانستان سره مذاکراتو په اړه ويلي، "د مرکزي حکومت د منظورۍ وروسته به پلاوی يا وفد افغانستان ته لېږي، مقصد یې قبايلي ضلعو کې امن په ځای کول دي، مذاکرات به د قبايلي قومونو ترمنځ وي، د خوارج سره هیڅ مذاکرات نه شي کېدی".
د پاکستان د سېفران مرکزي وزير امير مقام د بېرسټر سېف خبرو ته په غبرګون کې ويلي وو، د خېبرپښتونخوا حکومت به په خپله خوښه د افغانستان سره خبرې وکړي خو عملي کوي به یې څوک؟.
مقام د ډان ټي وي په پروګرام کې ويلي وو، د تحريک انصاف حکومت وړاندې هم مذاکرات کړي وو، نتيجه کې یې وسله وال راوستل شو.
د خېبرپښتونخوا حکومتي وياند په داسې وخت کې د طالبانو د سفير سره ليدلي او افغانستان سره د مذاکراتو خبره کوي، چې پرون په څلورمه فرورۍ د پاکستان د پوځ مشر جنرل عاصم منير په مشرۍ د کور کمانډرانو غونډه کې بيا ژوره اندېښنه څرګنده کړل شوې، چې تحریک طالبان پاکستان چې پوځ یې د فتنه الخوارج په نوم يادوي، د پاکستان ضد ترهګرۍ دپاره د افغانستان خاوره په دوامداره توګه کاروي.
د پاکستان د کور کمانډرانو غونډې ټينګار کړی، افغانستان کې عبوري حکومت دې په ځای د دې چې رد وکړي، د ټي ټي پي پرضد کلک ګامونه پورته کړي، د پاکستان او خلکو د دفاع دپاره دې اقدامات او تګلاره جاري وساتي.
د پاکستان پوځ او حکومت دعوه کوي، د کله نه په افغانستان کې طالبان په واک کې راغلي، پاکستان کې ناامني او ترهګري سېوا شوې ده، او د افغانستان د خاورې نه پاکستان کې ترهګري کيږي، خو طالبانو د پاکستان دغه دعوې او تورونه تل رد کړي او ويلي یې دي پاکستان دې د خپلو ناکامو زمه واري په دوی نه ور اچوي.