د افغانستان د بهرنیو چارو سیاسي مرستیال حکمت خلیل کرزي له خپلې دندې استعفا ورکړې ده.
ښاغلي کرزي له دندې څخه د خپلې استعفا خبر د شورو یا چهارشنبې په ورځ په خپلې ټوېټر پاڼې باندې خپور کړی.
This morning, I submitted my resignation as the Deputy Minister of Foreign Affairs to the leadership of the National Unity Government. May God give me the strength to continue to serve Afghanistan. pic.twitter.com/iDPHnU3wy3
— Hekmat Khalil Karzai (@HekmatKarzai) October 17, 2018
"نن سهار مې د بهرنیو چارو د وزارت د مرستیال له څوکۍ څخه خپله استعفا د ملي یوالي د حکومت مشرانو ته واستوله. په دې هیله چې الله پاک ماته دا توان راکړي چې د افغانستان خدمت ته دوام ورکړم. "
حکمت خلیل کرزي په خپل استعفا لیک کې د خپلې استعفا د دلیل په اړه لیکلي دي.
"د ملي یوالي په حکومت کې د نظرونو ژور توپیر راته د خدمت زمینه لا ډېره محدوده کړېده. "
هغه وړاندې لیکلي، په دې حکومت خپل دوامداره شتون د افغانستان د خلکو د اساسي حقونو څخه ددفاع په برخه کې اغیز من نه ګڼم او باور لرم چې په داسې حالت کې به د خپل ولس ترڅنګ زما شتون ډېر اغیزمن او ګټور وي.
د افغانستان د ملي امنیت پخواني سلاکار محمد حنیف اتمر په دې اړه په ټوېټر باندې لیکلي دي:
"حکمت خلیل کرزي په ټولو سیمیزو او نړیوالو غونډو کې په پوره هوښیارتیا، ژمنتیا او ځانګړې سیاسي پوهې د افغانستان غوره استازیتوب وکړ او د هېواد له ملي ګټو څخه یې په سختو حالاتو کې دفاع وکړه. د بهرنیو چارو د وزارت د مرستیال په توګه د هغه خدمت به هر وخت د خلکو په یاد وي."
حکمت خلیل کرزی د افغانستان د بهرنیو چارو په وزارت کې یو غښتلی ځوان ډپلوماټ وو چې ډېر پرې حساب کېده او له همدې امله د افغانستان د ثبات په اړه ګاونډي پاکستان ته د څو مهمو حکومتي پلاوو مشري هم ورپه غاړه وه.