د افغانستان د کونړ ولایت سره د ډېورند پر کرښې د افغان او پاکستاني ځواکونو ترمنځ د وروستیو وسله والو نښتو په باب، د دواړو هېوادونو له خوا بېلې بېلې دعوې مخې ته راغلي دي.
د پاکستان سرکاري رېډیو رپوټ ورکړی چې د افغانستان امنیتي ځواکونو له کرښې پورې غاړې څخه د مارټر (هاوان) گولیو او درنو ماشینگڼو ډزو کې شپږ پاکستاني عسکر او پنځه پاکستاني شهریان چې یوه ښځه هم په کې شامله ده، زخمیان کړي دي.
د پاکستان د سرکاري رېډیو د رپوټ ترمخه، افغان ځواکونو دا ډزې د کونړ ولایت د ناړۍ ولسوالۍ څخه د چترال سیمې "پر عامو وگړو" کړي دي، چې پاکستاني ځواکونو یې هم په جواب کې د افغان ځواکونو پوسټونه وهلي دي.
خو د افغانستان اړخ ته بیا د دغو سرحدي نښتو په اړه، په دې څو وروستیو ورځو کې بل ډول رپوټونه ورکړل شوي دي.
د کونړ د والي ویاند عبدالغني مصمم وايي چې:" د پاکستاني سرتېرو د هاوان (مارټرو) په مرمیو [افغانستان کې دننه] درې مېرمنې وژل شوي او دوه مېرمنې، یو ماشوم او یو بل نارینه ټپيان شوي دي."
د کونړ په ولایتي شورا کې د ناړۍ ولسوالۍ استازي ملک شیر زمین هم امریکا غږ ته ویلي:" نښته د یکشنبې (اتوار) په مازدیګر هغه مهال پیل شوه چې افغان سرتېرو په صفري نقطه کې د پاکستاني سرتېرو لخوا د امنیتي پوستو د جوړېدو مخه ونیوله."
افغان حکومت پر پاکستان غږ کړی چې د "ډیورېنډ کرښې ته نژدې" افغان غاړې ته د توغندیو او راکټونو بریدونه ودروي.
د ولسمشر اشرف غني ویاند صدیق صدیقي د نهې یا سې شنبې په ورځ (اکتوبر۲۹) په خپل ټویټر کې ولیکل: "د افغانستان حکومت د ډیورېنډ فرضي کرښې ته په نژدیو سیمو کې د پاکستاني پوځ د توغندیو بریدونه غندي او د نړیوالو قوانینو خلاف یي بولي."
افغان حکومت ډیورنډ فرضي کرښې ته پر نږدې سیمو د پاکستاني پوځیانو راکټي بریدونه د بین المللي قوانینو ښکاره نقض بولي او هغه په شدت محکوموي. موږ سمدستي د پاکستان له لوري د دغه ډول اقداماتو د درېدو غوښتنه کوو.
— Sediq Sediqqi (@SediqSediqqi) October 29, 2019
ښاغلي صدیقي د پاکستان له حکومت څخه غوښتي چې د توغندیو ویشتل دې سملاسې بند کړي: "موږ له پاکستان څخه د دا ډول اقداماتو د سملاسي بندولو غوښتونکي یو."
په اسلام آباد کې د افغانستان سفیر، عاطف مشعل هم پر خپل ټویټر لیکلي: "مونږ د ډیورند کرښې ته څېرمه د پاکستان لخوا گولۍ اورول، په کلکه غندو، دې ډزو په کونړ کې عامو خلکو ته ځاني زیان اړولی دی. دا د تیري کولو یو غیرانساني عمل، او د انټرنیشنل قوانینو خلاف ورزي ده. مونږ د تشدد او همدا راز پر خیالي کرښې باندې د اغزن سیم د غځولو فوري ختمېدو غوښتنه کوو. دا دواړه له یو اړخه دي."
We strongly condemn the Pakistani shelling near the Durand Line which has caused civilian casualties in Kunar. It is an inhuman act of aggression and violation of international laws. We want an immediate end to the violence & also fencing over the imaginary line. Both unilateral.
— Atif Mashal (@MashalAtif) October 29, 2019
مخکې له دې هم په کونړ کې افغان سرحدي ځواکونو له پاکستاني ځواکونو سره د جګړې خبر ورکړی و.
مخکې هم د ډیورېنډ کرښې په شاوخوا کې د پاکستان او افغانستان سرحدي ځواکونو نښتې او شخړې کړې وې.
افغان حکومت له دې کبله څو وارې د پاکستان سفارت چارواکي هم احضار کړي (رابللي) او اعتراض یې ورته کړی دی، خو پاکستان ادعا لري چې دوی هغې غاړې ته د ورتلونکو ترهګرو مخه نیسي.
په دې رپوټ کې د وي او اې افغان سرویس هم مرسته کړې ده