د کرتارپور په راهدارۍ پرانستلو خوشاله یم خو د افغانستان او پاکستان ترمنځه ازغن تار هم لرې کول غواړي: اسفندیار ولي خان
د عوامي نیشنل گوند مشراسفندیارولي خان ويلي د پاکستان د حکومت په کرتارپور کې هندوستانیانو ته په لاره پرانستلو خوشاله دی خو خفه په دې دی چې بلې خواته باړونه (ازغن تارونه) لگيژي.
هغه د وي او ای ډیوه سره په یو ځانگړې مرکه کې اوویل دوي د کرتارپور د راهدارۍ مخالفت نه کوي بلکې ددې حمایت کوي، هغه اوویل:
"چې کله عوام د عوامو سره میلاویدل شروع شي دملک اصل پالیسي بیا د دقې نه جوړېږي"
که څه هم اسفندیار ولي خان د کرتارپور لاره پرانستل د دوه رقيب هیوادونو هندوستان او پاکستان ترمنځه په نوې تگ لاره جوړیدلو کې یو پرمختگ وبللو خو د پاکستان د افغانستان سره په پله د ازغن تار د لگولو غندنه یې هم وکړه:
"خو دا یوه غندنه کوو چې یو اړخ ته خو راهدارۍ جوړېږي او بل اړخ ته چې دې نو باړ لگي"
هغه غوښتنه اوکړه چې د افغانستان پله دې هم داسې ویړیا شي لکه د کرتارپور:
"مونږ دا وایو چې دا باړونه هم لر کړئ هم دقسې راهدارۍ دلته هم ورکړئ لکه څینگه چې مو هلته ورکړه"
هغه اوویل د افغانستان او پاکستان تر منځه چې دوي باړ لگولی دی دغه لرې کول غواړي ، چې څنگه راهداري د هندوستان او پاکستان تر منځه جوړه شوه هم داسې که یوه وي که دوه وي که درې وي د پاکستان او افغانستان تر منځه دې جوړه شي.
د پاکستان د پوځ دریځ دادی چې د پاکستان او افغانستان په پوله یې ازغن تار ځکه ولگوو چې د پولې پورې راپورې د تر هگرو د تگ راتگ مخه ونیسي.
د پاکستان د پوځ دغه دریځ چې ښاغلي خان ته وریاد کړی شو نو هغه اوویل پوځ ته د خپل خیال اختیار دی او دی د خپل خیال اختیار لري، هغه اوویل دې ازغن تار د ترهگرو مخه نه ده نیولې:
" د ترهگرۍ مخه کله اونیولې شوه—دا پرون نه هغه بله ورځ چې زمونږ د باجوړ د صدر په کور د میزایل حمله وشوه کنه"؟
پاکستان تېرورځ د نومبر په نهمه د سيکهـ مذهب منونکو دپاره د کرتار پور لاره پرانستې ده.
د کرتار پور پوله د پاکستان د پنجاب صوبې په ختيځ او د هند د پنجاب رياست د گورداسپور د شمالي لویديځ په ختيځ کې د دواړو هېوادونو ترمنځ پرته علاقه ده.
پاکستان وايي د خواخوږۍ په بنياد يې د سيکهـ مذهب منونکو دپاره دا لار پرانسته او د پاکستان حکومت ويلي د سيکهـ مذهب منونکي د خپل روحاني مشر گورونانک قبر له د کرتار پور په لار بې د ويزې راتگ کولی شي.
د عمران خان په ضد احتجاج
د ښاغلي اسفندیار ولي خان عوامي نیشنل گوند په پاکستان کې د عمران خان د حکومت په ضد د شروع شوي اذادي مارچ نومې تحریک ملاتړ کوي.
په دې حقله د یو تپوس په ځواب کې اسفندیار ولي خان اوویل چې د وزیراعظم نه د استعفا اخستلو په حقله به د ټولو گوندونو د متفقه قرارداد ملگرتیا کوي.
هغه اوویل عوامي نیشنل گوند تل ويلي دي چې اوسنی حکومت د اولس منتخب نه دی خو داسې کومه لاره نه خپلول غواړي چې جمهوریت ته زیان واړوي.
د اذادي مارچ تابیا او مشري کونکي گوند جمعیت علما اسلام په مشر مولانا فضل الرحمان تور دی چې هغه د خپل رقيب عمران خان په ضد د تحریک په وخت مذهب د وسلې په توگه کاروي.
کله چې په دې حقله د ښاغلي خان نه تپوس وشو نو هغه اوویل، دوي د هر قسمه سخت دریځۍ مخالفت کوي او تل یې د خپل دې دریځ په وجه قربانۍ ورکړي دي خو د مولانا د"مذهبي کارډ" د استعمال په حقله د سکوټ ځواب په ځای ښاغلي خان اوویل ددې خبرې فیصله به د گوندونو په جوړه کړی شوې شریکه رهبر کمیټۍ کې کیږي.
د کرتارپور په راهدارۍ پرانستلو خوشاله یم خو د افغانستان او پاکستان ترمنځه ازغن تار هم لرې کول غواړي: اسفندیار ولي خان