د پاکستان په قومي هوايي کمپنۍ پاکستان انټرنېشنل ایرلاینز، پي ايي ای، یورپ ته په پروازونو پابندي ختمه کړې شوه.
د وي او ای د اردو څانګې د رپورټ ترمخه د پي ايي ای ترجمان وویل د هوابازۍ د تحفظ یورپي ادارې د پي ايي ای انتظامیه او وزارت په رسمي ډول د خپلې فېصلې نه خبر کړو.
ترجمان وویل د پي ايي ای انتظاميي په تېرو څلورو کلونو کې د کوښښونو وروسته دا ګټه ترلاسه کړه. ترجمان زیاته کړه چې پي ايي ای به د پورپي قوانینو پابندي کوي.
د پاکستان د دفاع وزیر خواجه اصف هم په اېکس په یو پوسټ کې په پي ايي ای یورپ ته په پروازونو پابندۍ د ختمېدو اعلان کړی و.
د وي او ای ډیوه وېټس اېپ اېپليکېشن
خواجه اصف وویل د پي ايي ای نه علاوه د پاکستان ایر بلو نومې هوايي کمپنۍ ته هم یورپ ته د پروازونو اجازت ورکړی شو.
د يورپين یونین اېوي اېشن سېفټي اېجنسي یا د هوابازۍ د تحفظ ادارې په ۲۰۲۰ کې يورپ ته د پي اي ای په پروازونو په داسې حال کې پابندي لګولې وه چې په کراچۍ کې د پي ايي ای جهاز په حادثه کې د غورځېدو وروسته د هغه وخت د هوابازۍ وزیر غلام سرور خان ویلي وو چې د پي ايي ای د ۳۰ نه تر ۴۰ فیصد پایلټانو لایسنسونه یا اجازتنامې جعلي دي.
د وي او ای د اردو څانګې د رپورټ ترمخه د پابندۍ نه مخکې به پي ايي ای په يورپ کې پېرس، مېلان، بارسېلونا، اوسلو او کوپن هېګن ته پروازونه کول.
بي ايي ای د سختې مالي خسارې سره مخامخ ګڼل کېږي او حکومت يې خرڅول غواړي.