فاټا کې د اصلاحاتو په سر په قامي اسمبلۍ کې په نهمه ورځ هم احتجاج وشو

پېښور/اسلام اباد — 

د پاکستان مرکزی حکومت فاټا ته د هايي کورټ او سپریم کورټ اختیار غځولو لپاره قامي اسمبلۍ ته د خپل لوظ باوجود هم د قانون سازۍ مسوده وړاندې نکړه او ددې پرضد په قامي اسمبلۍ کې د فاټا او د حزب اختلاف گوندونو غړو په نهمه ورځ هم احتجاج وکړو او د اسمبلۍ نه بهر ووتل. ددې ورسته د اسمبلۍ غونډه نه نامعلومه وخت پورې وځنډول شوه.

د زیارت، پنجشنبې، په ورځ په اسمبلۍ کې د احتجاج په اړه د خېبر ایجنسۍ د قامي اسمبلۍ غړي شاه جي گل افریدي وي او ای ډیوه ته وویل حکومت ورسره د کړي لوظ خلاف ورزي وکړه.

پرون راسره ډیره پښه وعده وشوه چې نن به دا بل راځي...خو نن بیا حکومت ناکام شو،" شاه جي گل وویل. ښاغلی گل په فاټا کې د اصلاحاتو لپاره کارکونکو رهبرانو په وړمبي صف کې دی. "د حکومت ناکام کیدل ددې خبرې غټه نتیجه ده چې هغه خپل کورم ( د اسمبلۍ د غونډې لپاره ضروري شمیره) هم نشي پوره کولی."

د شاه جي گل او د شهاب الدین خان د خبرو نور تفصیل د خبریال ارشد مومند په رپورټ کې اوریدی شئ

په قامي اسمبلۍ کې د احتجاج نه یوه ورځ وړاندې د فاټا سپریم کونسل په نامه یوې ډلې د وزيراعظم شاهدخاقان عباسي سره ولیدل خو ویل کیږي دغه غونډه څه نتیجې ته ونه رسیده.

د وزیراعظم سره په غونډه کې د فاټا سنېټر صالح شاه هم شامل و وی او ای ډیوه ته یې وویل چې فاټا ته دې د جدا صوبې درجه ورکړی شي.

شاه جي گل او د باجوړ نه د قامي اسمبلۍ غړی شهاب الدین خان وايي په سپریم کونسل کې مولانا فضل الرحمان د جمیعت علما اسلام گوند غړي شامل دي. دغه گوند وايي فاټا په خېبر پښتونخوا کې د شاملولو لپاره دې د سیمې د خلکو رای واخستل شي.

شهاب الدين خان وي او ای ډیوه ته ویلي په کونسل کې "هغه قبايلي ملکان شامل دي چې د حکومت نه ماجب (وظيفې) اخلي".

د فاټا د اصلاحاتو په سر په قامي اسمبلۍ کې احتجاج