د پاکستان تحریک انصاف ګوند مشر او پخواني کرکټر عمران خان له تېرې یوې اوونۍ په رسنیو کې د ده د واده په اړه پر خپرېدونکو ګنګوسو اخر خوله پرانیسته او ویې ویل چې دا د ده په ضد یو "ناوړه" کمپاین دې او تر شا یې د پخواني وزیراعظم نوازشریف لاس دی.
عمران خان د سه شنبې په ورځ په خپلو تازه ټویټونو کې وویل چې په رسنیو کې د ده د اولادونو او د بشرٰی بېګم د کورنۍ په اړه د خلکو تبصرو اندېښمن کړی او حیران دی چې آیا ده غلا کړې ده که څنګه چې د واده موضوع یې دومره زیاته څېړل کېږي. عمران خان په یوه ټویټ کې لیکلي:
"درې ورځې دې خبرې ته حیران وم، چې آیا ما کوم بېنک لوټلی، د قوم له خزانې مې غیرقانوني پیسې وړې دي، د ماډل ټاون غوندې پېښې د وژنو فتوا مې ورکړې ده او که مې هند ته د خپل هېواد رازونه ویلي دي."
1. For 3 days I have been wondering have I looted a bank; or money laundered bns in nation%27s wealth; or ordered a model-town-like killing spree; or revealed state secrets to India? I have done none of these but discovered I have committed a bigger crime: wanting to get married.
— Imran Khan (@ImranKhanPTI) January 9, 2018
عمران خان په یوه بل ټویټ کې د ده د واده په اړه د خلکو تبصرو ته "د رسنیو شیطاني او ناولی کمپاین" نوم ورکړی او د نوازشریف په شمول يې د جنګ-جیو ګروپ مشر میرخلیل الرحمن هم د ده په ضد په دسیسې تورن کړی دی، خو وایي د دوی دا هڅې ده ته هیڅ زیان نه شي رسولای.
2. The vicious, gutter media campaign led by NS & MSR mafia does not bother me as respect & humiliation come from Allah Almighty.
— Imran Khan (@ImranKhanPTI) January 9, 2018
عمران خان وایي بله ګناه یې نه ده کړې، یواځینۍ ګناه یې دا ده چې غواړي واده وکړي، خو وایي مخالفین یې چې د ده په ضد دا ډول هڅې کوي، دا ده ته لا نور توان ورکوي، چې د هغوی په وړاندې په هر میدان کې وجنګېږي.
6. All I ask of my well wishers and supporters is that they pray I find personal happiness which, except for a few years, I have been deprived of.
— Imran Khan (@ImranKhanPTI) January 9, 2018
کرکټر عمران خان دا څرګندونې په داسې وخت کې وکړې چې تر ده څو ګنټې مخکې پخواني وزیراعظم نوازشریف په اسلام اباد کې تر احتساب عدالت دباندې له رسنیو سره په خبرو کې وویل، دا ښه خبره نه ده چې عمران خان [د واده تر خبر وروسته] پټ او غلی شوی دی:
"زه پر چا شخصي نیوکې نه کوم خو هغه د خپلې ممکنه مېرمنې اولادونه مجبوره کړل چې خلکو ته د دوی د واده په اړه وضاحتونه ورکړي. که عمران خان واقعاً واده کړی وي باید ښکاره راشي او ويې مني".
د عمران خان د واده په اړه له تېرو څو ورځو راهیسې پر ټولنیزو رسنیو په زرګونو تبصرې شوې دی، چې ځینې خلک ورپسې خاندي، ځینې یې د هغه ذاتي معامله ګڼي او ځینې بیا وایي چې خان یو سیاسي شخصیت دی، باید خپل واده له خلکو پټ نه کړي
لیکوال او سیاسي څېړونکي خان زمان کاکړ پر خپله فېسبوک پاڼه د عمران خان د واده په اړه لیکلي:
"که عمران خان د ودونو لړۍ د خپل ګوند له جلسو لرې ساتلې وای، نو چا به یې پر شخصي ژوند خبرې نه کولای او هغه که د کرکټ د اتل کېدو ګټه په سیاست کې نه اخیستلای، نو چا به یې له واده سره کار نه لرلای."
دا ځل خلک پر عمران خان ځکه هم نیوکې کوي، چې وایي خلک د پیرانو لاسنیوي ته ورځي، خو ده ورسره د واده تار غزولی دی. د مرتضی علي شاه په نامه یوه تن پر ټویټر لیکلي:
"عمران خان یو ځل بیا پټ واده کړی دی او دا ځل یې له یوې داسې ښځې سره واده کړی دی، چې دی به هر وخت د روحاني زدکړې لپاره ورته".
Imran Khan has secretly married again, this time with a woman he used to visit 4 spiritual guidance, nikkah performed on the night of 1 January 2018 in Lahore (Sector Y of Defence Housing Authority), claims @UmarCheema1 - IK’s aides deny marriage report https://t.co/GaFjueoNem
— Murtaza Ali Shah (@MurtazaGeoNews) January 6, 2018
پاکستان تحریک انصاف ګوند د یکشنبې په ورځ خبر خپور کړ چې د ګوند مشر یې د پاکپتن د پیرانو د کورنۍ یوې مېرمنې بشرٰی منیکا ته د واده لپاره وړاندیز کړی خو د هغې د کورنۍ له خوا لا جواب نه دی ورکړل شوی.
بشرٰی منیکا ۴٠ کلنه ده او د پاکپتن له وټو کورنۍ سره تړاو لري. هغې له عمران خان سره د واده وړاندیز تایید کړی، خو وایي له کورنۍ او خپلو اولادونو سره تر مشورې وروسته به پرېکړه وکړي، چې له خان سره واده وکړي که نه.
د عمران خان د واده په اړه لومړی ځل د جنورۍ په ۶مه د پاکستان په انګرېزي ورځپاڼه (دي نیوز) کې خبر خپور شو. په رپوټ کې ویل شوي وو چې عمران خان په لاهور کې خپل دریم واده کړی او نکاح یې هم هغه مفتي سعید ور تړلې ده چې د ده د تېر واده نکاح یې تړلې وه.
عمران خان په ۵ اکتوبر ۱۹۵۲م کال په لاهور کې زېږېدلی او په خټه نیاری پښتون دی. لومړی واده یې په ۱۹۹۵م کال له یوې بریتانوۍ مېرمنې جمایما خان سره وکړ، چې دوه زامن ځنې لري. دویم واده یې په جنوري ۲۰۱۵م کال له یوې پښتنې جرنلسټې ریحام خان سره وکړ، خو کال یې نه وو پوره چې سره بېل شول.