د پاکستان د خارجه چارو وزیر شاه محمود قریشی د پاکستان او چین ترمنځ د سی پیک په منصوبه د امریکې اندېښنې رد کړي او ویلي یې دي چې سي پېک د لوبې اړولو او د پاکستان د اقتصادي ترقۍ یوه منصوبه ده، او که امریکا غواړي، نو د سي پېک لاندې د ځانگړي اقتصادي زون په جوړښت کې شامېلېدی شي.
د اتوار/یکشنبې په ورځ د پنجاب صوبې په سویلي ښار ملتان کې، میډیا سره د خبرو په ترڅ کې، د پاکستان د خارجه چارو وزیر شاه محمود قریشي وینا وه چې د سي پېک په حقله، د جنوبي ایشیا دپاره د امریکې د ځانگړې استازې اېلېس وېلز له دریځ سره اتفاق نه لري.
قریشي وویل: "مونږ نه گڼو چې د سي پېک قرضې به د پاکستان د قرضو پیټی لا نور سېوا کړي. د سي پېک منصوبه به جاري وي، او پاکستان دا لا نوره هم غځولې ده، او مونږ گڼو چې دا پروجه د پاکستان د اقتصادي ترقۍ دپاره اړینه ده. او دا د لوبې د اړولو یوه منصوبه ده. مونږ دا هم غواړو چې د سي پېک لاندې، په خصوصي اقتصادي زون کې که امریکا یا کوم بل هېواد پانگه اچول غواړي، نو د هغې په لاره کې به هېڅ خنډان نه وي."
د سویلي ایشیا دپاره د امریکا ځانگړې استازې اېلېس وېلز د تېر زیارت/پنجشنبې په ورځ پاکستان ته خبرداری ورکړی و چې د چین او پاکستان ترمنځ د اقتصادي لارې، سي پېک، جوړېدو سره به چین ته گټه ورسیږي، خو پاکستان د دې منصوبې له کبله، له اوږدې مودې زیان موندلی شي.
د سویلي ایشیا دپاره د امریکا د خارجه وزارت استازې
پرون د پاکستان د منصوبه بندۍ وفاقي وزیر اسد عمر هم په کراچۍ کې د اېلېس وېلز دغه بیان ته خپل غبرگون ښکاره کړی و او ویلي یې و چې پاکستان به د چین د دوستۍ څخه په شا نشي خو د چین او امریکا ترمنځ د څه قسمه کشمکش برخه به هم نه جوړیږي.
اسد عمر وویل چې "که چین په پاکستان کې سرمایه کاري کوي، نو دا په دې معنا نده چې گني مونږ د امریکې خلاف شوو. مونږ د نړۍ له ټولو ملکونو سره ښې اړیکې لرل غواړو."
ښکاره دې وي چې تېره ورځ په پاکستان کې د چین سفیر، یاو جېنگ هم د اېلېس وېلز دغو څرگندونو ته سخت عکس العمل ښودلی و، او ویلي یې و چې مېرمن وېلز کره علم نه لري او د سي پېک په اړه د هغې خبرې، د هغه په قول، "د غربي میډیا پر پروپگېنډا بنیاد لري".
د راپورونو ترمخه، په تېرو پنځو کلونو کې، چین په پاکستان کې د سړکونو، بندرونو، او د بیجلۍ د گرېډ سټېشنونو په بیا نوي کولو کې، شاوخوا شل اربه ډالره لگولي دي او د کال ٢٠٣٠ پورې به د سي پېک لاندې په پاکستان کې د چین سرمایه کاري، ٦٠ اربه ډالره ته ورسیږي.
امریکا او نور ناقدین د چین د بیلټ اېنډ روټ د منصوبې لاندې پروگرامونه، د پاکستان په ډول هېوادونو دپاره د قرضو یو جال بلي او وایي چې په اقتصادي مشکلاتو کې گیر پاکستان به، د چین د قرضو بېرته ادا کولو کې له مشکلاتو سره مخامخ کیږي. خو په اسلام آباد کې د چین سفیر دغه تشویش رد کړی او ویلي یې دي چې د واشنگټن او آی اېم اېف برعکس، چین په سیاسي بنیادونو چا ته قرضې نه ورکوي.