د پاکستان پوځ ویلي د افغانستان څخه پاکستان ته داخلېدونکي درې وسله وال يې وژلي دي او د افغانستان په واکمنو طالبانو يې بیا غږ کړی چې وسله والو ته دې اجازت نه ورکوي چې افغان خاوره د پاکستان خلاف د ترهګرۍ دپاره استعمال کړي.
د پاکستان د پوځ د مطبوعاتو څانګې ايي اېس پي ار د نهې، سه شنبې، په ورځ په یو بیان کې وویل ځواکونو يې تېره شپه د شمالي وزیرستان په حسن خیلو سیمه کې د وسله والو یوه ډله معلومه کړه چې افغانستان څخه پاکستان ته د داخلېدو کوښښ يې کولو خو عسکرو ناکامه کړل.
ايي اېس پي ار وویل پاکستاني ځواکونو درې "خوارېج" ووژل.
د وي او ای ډیوه وېټس اېپ اېپليکېشن
د پاکستان پوځ د "خوارېجو" اصطلاح په عمومي توګه د کالعدم تحریک طالبان پاکستان، ټي ټي پي، د وسله والو دپاره استعمالوي او وخت په وخت وايي د ټي ټي پي وسله وال په پاکستان کې حملو دپاره د افغانستان خاوره استعمالوي.
د افغانستان واکمن طالبان د پاکستان دا خبره ردوي او وايي پاکستاني چارواکي دې په خپل هېواد کې په امن کې د ناکامۍ پړه په افغانستان نه وراچوي.
پاکستان په افغانستان کې په مبینه توګه په مېشت والو د ترهګرۍ الزام په داسې حال کې هم لګوي چې د دواړو ملکونو ترمنځ په پوله چې ډیورنډ کرښه هم بلل کېږي، يې ازغن تار لګولی، نوي قلعې او په سلګونو چېک پوسټونه يې جوړ کړي دي او وايي د دې ګامونو مقصد د وسله والو د حرکت مخه نیول دي.
د ګل، دوشنبې، په ورځ د دریو مبینه وسله والو د وژلو په اړه خپل بیان کې د پاکستان پوځ وویل پاکستان په مستقل ډول د افغانستان د عبوري حکومت نه غوښتنه کوي چې خپل لوري ته دې د پولې انتظام بهتر کړي او خپله ذمه واري دې پوره کړي چې خواریج افغان خاوره د پاکستان خلاف استعمال نه کړی شي.