د پښتون ژغورنې غورځنګ د مهم مشر عارف وزیر د وژنې په ضد په پاکستان او افغانستان کې د مظاهرو نه ځانله نړیوالې ورچول (ان لاین) احتجاجي مظاهرې شوې دي.
په څرګند تاریخ کې لومړی ځل دی چې پښتانه دا ډول ورچول نړېوالې احتجاجي مظاهرې کوي.
هسې خو ان لاین غونډې د تېرو څو کلنو راهسې روانې دي خو د کوډ-19 وبا په ورځو کې ورچول مظاهرې رواج جوړېږي. څو ورځې وړاندې د بارتانیې لیبر ګوند هم دیوم مۍ یوه آن لاین مظاهره جوړه کړې وه.
د پښتون ژغورنې غورځنګ دا مظاهرې تر درې ساعتو پورې روانې وې چې د “زوم” ټیکنالوجۍ په لاره پکې د پښتنو ځیني سیاسي مشران او فعالان شریک وو.
د پښتون کونسل کنیډا یو غړي جوهر لونګین وي او ای ډیوه ته وویل دغه ان لاین مظاهره د فیس بک د لارې په ټوله نړۍ کې د څلویښت زره نه زیاتو کسانو وکتله.
د پښتون کونسل کنیډا صدر سراج خان ډیوه ته په لیکلي ځواب کې وویل په دې تاریخي مظاهره کې د امريکه ،برتانيه ،جرمني ، فرانس ،هالينډ ، روس ،سوېډن ،مډل اېسټ ،افغانستان ،او پاکستان څخه د پښتون ژغورنې غورځنګ فعالانو او نورو ملتپالو ګډون وکړو.
وي او ای ډیوه دغه مظاهره دفیس بک لارې هم څارله, چې ورته د نورو نه علاوه په ځانګړي ډول د پښتون ژغورنې غورځنګ د وژل شوي غړي ارمان لوڼي خور وړانګه لوڼۍ، د پاکستان د قامي اسمبلۍ پخوانۍ غړې بشرا ګوهر، بشر پالې ګلالۍ اسماعیل، دپي ټي ایم دپاکستان، اروپا او شمالي امریکا مشرانو ویناګانې وکړې.
پښتون ژغورنې غورځنګ ورچول مظاهرې شوي
د عارف وزیر د وژنې په ضد د ورچول مظاهرې تابیا په کنيډا کې دپښتنو یو تنظیم پښتون کونسل کنیډا او پښتون ژغورنې غورځنګ کنیډا څانګې کړې وه.
مظاهره چیانو د عارف وزیر د وژنې ذمه واري د پاکستان په امنیتي ادارو ور اچولې، خو د پاکستان ادارو دا ډول تورونه پخوا تل رد کړي دي.
بلې لوري ته په فیس بک په یوه ویډیو وینا کې د پښتون تحفظ موومېنټ مشر منظور پښتين ويلي د عارف وزير د قتل مقدمه به د پوځ او د رياست د مشرانو خلاف درج کوي.
ښاغلي پښتين وويل، ايف ای آر به د ادارو د مشرانو خلاف کوي ځکه چې د هغه په وينا دا هر څه د پوځ او د رياست د سربراهانو په ښوونه کيږي. د منظور پښتين دې تازه تور ته د پوځ لخوا سمدټکه ځواب نه دی ویل شوی خو د پاکستان د اطلاعاتو مرکزي وزير شېبلي فراز ویلي:
"زه په دې حقله هیڅ معلومات نه لرم، چې تفصیل تر لاسه کړم نو په دې اړه به بل وخت معلومات درکړم".
د جنوبي وزيرستان د پوليسو مشر تېره ورځ ويلي وو، د پېښې تحقيقات يې پيل کړي او په ورځ دوه کې به د پلټنو تفصيل ولس ته ښکاره کړي.
عارف وزیر د پښتون ژغورنې غورځنګ یو مشر او د دې غورځنګ د مخکښ او د قومي اسمبلۍ د غړي علي وزیر د تره زوی وو.
په عارف وزیر د مۍ په لومړۍ نېټه په واڼه کې ناڅرګندو کسانو وسلوال برید کړی وو. هغه په سخت ژوبل حالت کې د مۍ په 2مه د اسلام اباد په پیمز روغتون کې ساه ورکړه او د په 3مه د واڼه په غوا خوا سیمه کې پخپله پلارنۍ هدیره کې خاورو ته وسپارل شو.