د خېبرپښتونخوا د مردان ضلعې پوليسو ادعا کړې چې د کم عمرې ماشومې سره په جنسي تيري او وژنه تورن ککړ تن يې نيولی دی.
د مردان په مدې بابا يونين کونسل فتو کلي کې نزدې يوه اوونۍ وړاندې شپږ کلنه ماشومه جينۍ د کوره بې درکه شوې او په دوېمه ورځ يې مړی د پټو نه ترلاسه شوی ؤ.
پوليس ویلي په طبي رپوټ کې مالومه شوې چې د ماشومې سره جنسي تيری شوی او د هغې وروستو وژل شوې ده.
د مردان د پوليسو مشر (ډي پي او) واحد محمود رسنيو سره په خبرو کې وويل، دوی د يادې پېښې په پلټنو کې نزدې د ۳۲۵ کسانو نه پوښتنې کړي او له هغې وروستو د ماشومې يو سکه او بل ناسکه تره نيول شوي دي.
هغه وويل د ماشومې ناسکه تره ۲۲ کلن خان محمد منلې چې هغه د ماشومې سره جنسي تيری کړی او بيا يې وژلې ده او له هغې وروستو يې د ماشومې د سکه تره نصرالله په مرسته بيا د هغې مړی په پټو کې غورځولی ؤ.
د وژل شوې ماشومې پلار په علاقه کې يوه دينې مدرسه چلوي او د ځايي خلکو په وېنا دغه ورور يې هم ورسره په مدرسه کې د استاذ په حېث دنده ترسره کوي.
په مردان کې د روان کال په لومړۍ میاشت کې هم د يوې څلور کلنې ماشومې سره جنسي تيری شوی او بيا وژل شوې وه.
په ياده پېښه کې نيول شوي ککړ تن ته تېره میاشت د مردان د ترهګرۍ د مخنيوي عدالت د عمر بند او لس لاکه روپو د بند سزا اورولې وه.
