افغان لیکوال او شاعر فاروق فردا په شلمه پېړۍ کې د برصغیر د پښتون سیاستوال او د خدایي خدمتګار تحریک د مشر عبدالغفار خان باچا ژوندلیک (زما ژوند او جدوجهد) له پښتو څخه دري ژبې ته ژباړلی، چې په کابل کې د سرحدونو او قبایلو وزارت چاپ کړی دی.
په دري ژبه چاپ شوی دغه کتاب ته د (خان عبدالغفار خان: زندگی، تلاش و مبارزه ی من) نوم ورکړل شوی او پر دوتنه (ټایټل) یې د باچا خان په لاس جوړ شوی انځور ورکړل شوی او د 500 ټوکو په شمېر په 662 مخونو کې چاپ شوی دی.
د کتاب ژباړونکي فاروق فردا د وي.او.اې ډیوه ویبپاڼې ته وویل، په افغانستان کې څلوېښت کلنې جګړې ورته په ډاګه کړه چې د تشدد له لارې هیڅ مشکل نه شي حل کېدای ځکه یې نو د دري ژبې لوستونکو ته د عدمِ تشدد د تګلارې د ور پېژندنې لپاره د باچا خان کتاب و ژباړه:
"دعدم تشدد ښېګني او په خلکو کې د همغږئ راوستلو دپاره لارې چارې خورا مهمې دي. زه د پښتون قوم پر ارزښتونو دغېر پښتانه قومونو د پوهولو د اصل په نظر کې نیولو سره وپتېیله چې تر دې ښه اثر بل نشته.ځکه مې هوډ وکړ اود ژباړې د پاره مې کار پېل کړ".
د عوامي نېشنل ګوند یوه مشر پخواني سنېټر او لیکوال افراسیاب خټک پر ټویټر د دې کتاب د ژباړه او چاپېدل د افغانستان د دري ژبې د لوستونکو لپاره ګټور بللي:
"دا کتاب به د دري ژبې ویونکي او لوستونکي د باچاخان له ژوند او مبارزې خبر کړي".
په (زما ژوند او جدوجهد) کتاب کې عبدالغفار خان د شلمې پېړۍ د دویمې لسیزې له پیله راهیسې د خپل شخصي ژوند، تعلیم، سیاسي مبارزې، خدایي خدمتګار تحریک، د هند د خپلواکۍ د مبارزې، د عدمِ تشدد د تګلارې او د پښتنو د قومي سیاسي ازادۍ په اړه په ساده ژبه د خپلې مبارزې بیان کړی دی.
پر ټویټر د فرهاد په نوم یو تن د باچا خان د ژباړل شوي کتاب لوستلو ته خپله لېوالتیا څرګنده کړې ده او لیکلي یې دي: "زه د فارسي ژبې ویونکی یم او تر اوسه مې د ده [باچا خان] په اړه یو څه لوستي دي. زه ډېر تږی یم چې د ده په اړه نور څه هم ولولم".
تر دې وړاندې د باچا خان د لیکلي ژوندلیک (زما ژوند او جدوجهد) لنډیز په لاهور کې سانج کتابخانې هم په اردو ژبه چاپ کړی، د دې تر څنګ په کوریایي، جرمني، انګرېزي، عربي او ځینو نورو بهرنیو ژبو هم ژباړل شوی او چاپ شوی دی.
ښاغلی فاروق فردا وایي تر دې د مخه یې هم د خان عبدالغفار خان د لنډو ویناوو یوه کوچنۍ رساله یا کتابګوټی هم په پښتو او دري دواړو ژبو ترتیب کړی، چې وایي یوه پر علم و ادب مین افغان حاجي خان د لسو زرو په شمېر چاپ کړی دی.
