د اسلام اباد په سفر د ترهګرۍ د مالي مرستو او غېر قانونه پېسو لېږلو د څار نړیواله ډله د پاکستان په هغو ګامونه مطمئن نه ده کوم چې پاکستان په دغه اړوند پورته کړي دي.
د (فاينانشل اېکشن ټاکس فورس، اېف ای ټي اېف) د اسيا پېسفک څانګې د اسلام اباده غوښتي چې که د اېف ای ټي اېف د خړ فهرست څخه وتل غواړي نور ګامونه به پورته کوي.
د ځايي ميډیا ترمخه د اېف ای ټي اېف څانګې د پاکستان په قانوني او اداره جاتي انتظاماتو کې نيمګړتياوې ترلاسه کړي او د ګټو نه ترلاسه کوونکو ډلو د څار يا جانچ دپاره د هېواد د موجوده قانوني نظام په کمزورتيا يې اندېښنه څرګنده کړې ده.
يادې ډلې منلې چې په کومو برخو کې قانوني چوکاټ پياوړی دی هلته بيا د مالي بهير د کمولو دپاره کوم عملي نظام نشته، او دغه ډول د ځمکو په کاروبارونو کې هم دا کار عام دی او د غټو کاروباريانو معاملات د قانوني چوکاټه بهر دي.
د ډان د راپور ترمخه د پاکستان د امنيت او تبادلې کمېشن (اېس اي سي پي) د اېف ای ټي اېف پلاوي ته ویلي چې د ځمکو کاروباريان يې د اختياره بهر دي.
د ورځپاڼې ترمخه د اېف ای ټي اېف څانګې په غېر قانوني لاره د پېسو لېږلو يا مني لانډرنګ د مخنيوي په لړ کې هم کمی محسوس کړی دی.
نړیوال پلاوي ويلي بايد د تجارتي مرکزونو سره د مذهبي او نورو تنظیمونو لخوا د چندو دپاره د اېښودی شوؤ صندقونو بشپړ ريکارډ ولرل شي او د پېسو د هر قسمه کاروبار ريکارډ هم خوندي شي.
د پېښور پوهنتون د اقتصادي څانګې استاز پروفېسر ډاکټر ذلاکت خان وايي د اېف ای ټي اېف په کاري پلان د عمل لپاره بايد چې د پاکستان حکومت د هېواد ټول معيشيت په ريکارډ کې راولي ځکه چې د معيشيت ډير کم اړخونه د ليک لوست لاندې دي.
ويل شوي که حکومت د پاکستان نوم د خړ فهرست نه ويستل او د تور نوملړ نه ژغورول غواړي نو د معشيت په ريکارډ کې د راوستو لپاره به ورته قانون سازي کول وي.
د ايشيا پيسفک ګروپ نهه کسيزه ډله دا مهال د پاکستان په ۱۲ ورځني سفر ده چې د راتګ مقصد يې د اسلام اباد لخوا د ترهګرو د مالي مرستو او د پېسو په غېر قانوني ډول د مخنوي لپاره د پورته کړو ګامونو جاج اخستل دي، دوی په دغه اړوند د پاکستاني چارواکو څخه پوښتنې هم کوي.
پاکستان له به د راتلونکي کال ستمبر د مياشتې پورې د ترهګرو د مالي مرستو او مني لانډرنګ د مخنوي په حواله د اېف ای ټي اېف په ١٠ نکاتي کاري پلان عمل کول وي.
پاکستان د تېر جون په مياشت کې د اېف ای ټي اېف په کاري پلان د بشپړ عمل باور ورکړی ؤ.
