اقتصادي کار پوهان د ډالر په مقابله کې د پاکستانۍ روپۍ د قدر نور کمېدو اندېښنه څرګندوي او وايي چې د حکومت د نړيوالې مالياتي ادارې (ايي اېم اېف) سره د قرض د خبرو نه کاميابېدو له امله روپۍ نوره غورځېدلې ده.
د پاکستانۍ روپۍ په مقابله کې ډالر نن د جمعې په ورځ ۱۴۲ ته رسېدلی او وروستو ويل شوي چې ډالر لږ راکم شوی دی. پرون د ډالر قيمت ۱۳۴ روپۍ ؤ.
د ډالر د قدر سېوا کېدو علت
د اقتصادي چارو کارپوهه حق نواز وايي پاکستان چې د ايي اېم اېف نه کوم قرض اخلي د هغې په شرطونو کې هم د روپۍ د قدر کمېدو ويل شوي دي.
بل لور ته پاکستانۍ ميډيا هم د ډالر قدر ناڅاپه سېوا کېدل د ايي اېم اېف نه د قرض اخيستو د شرطونو نتيجه ښايي.
خو د پاکستان حکومت په رسمي ډول د دې خبرې تاييد نه دی کړی.
ځیني راپورونه وايي ښايي چې پاکستان د قرضې اخیستو په لړ کې د ايي اېم اېف شرطونه مني او د ډالر قدر سېوا د هغې لړۍ ده.
د حکومت دريځ
د پاکستان د خزانې وزير اسدعمر د ډالر په مقابله کې د روپۍ د قدر کمېدو علت د تېر حکومت غلطې پاليسۍ ګڼي.
عمر وايي د ډالر د قيمت د زیاتوالي بنيادي وجه طلب او رسد دی مطلب چې د ډالر غوښته سېوا او راتګ يې کم دی، هغه وايي په تېر وخت کې په مصنوعي ډول د روپۍ قدر په ځای ساتل شوی ؤ.
عمر دا هم وويل چې تېر کال د کرنټ اکاؤنټ خساره ۱۹ اربه ډالره وه.
د ډالر د بيعې اغېزې
په پاکستان کې د بهرنيو پېسو د بدلوؤنکو د اتحاديې مشر ملک بوستان هم وايي چې د روپۍ قدر د ډالر په مقابله کې راکم شوی او دا به د پاکستان دننه د بنيادي ضرورتونو نه علاوه په بهرنیو قرضو کې اضافه وکړي او اغېزې به يې په عام اولس وي.
د مخالفه ګوندونو غبرګون
د پاکستان تحریک انصاف د حکومت مخالفه ډلو د ډالر د قدر په سېوا کېدو سختې نیوکې کړي دي.
د مسلم ليګ ن ګوند ویاندې مريم اورنګزېب ويلي د ډالر د قدر سېوا کېدو سره به ډېره زیاته ګراني راشي، او هغې په ټويټر ویلي، قام ته د ددرغو ويلو او دهوکې ورکولو په سر دې د عمران خان حکومت مستعفي شي.
هغې ویلي وخت او حالات ګواښي ورکوي چې د چرګې او د اګۍ سرکار به ونه چليږي او د حکومت چلول او د قام مسلې هوارول د عمران خان د وس خبره نه ده.
د پاکستان پيپلز ګوند سېنېټر مصطفی کهوکهر ویلي، د ډالر بيعه سېوا کېدل د معيشيت بربادي ده او د عمران خان سونامي لګيا ده ملک تباه کوي.
مخالفه ګوندونو د عمران خان د ۱۰۰ ورځو په کارکردګۍ هم سخت ټکونه کړي دي.
په نوي حکومت کې ډالر څومره ګران شوی
په پاکستان کې د جولايي د عامو انتخاباتو نه وړاندې ډالر په ۱۰۲ روپۍ وو، کوم چې په نګران حکومت کې ۱۳۰ روپو ته رسېدلی ؤ او د پاکستان تحریک انصاف د حکومت د راتلو وروسته ډالر دا وخت نزدې ۱۴۰ روپو ته رسېدلی دی.
